ភ្នំពេញ៖ កាលពីយប់ថ្ងៃព្រហស្បតិ៍ ទី៧ សីហា ឆ្នាំ២០១៥ ម្សិលមិញនេះ នៅលើទំព័រហ្វេសប៊ុក ទូរទស្សន៍ជាតិកម្ពុជា   National TV of Cambodia បានបង្ហោះពី គម្រោងមួយស្តីពីការបង្កើតខ្សែររថភ្លើង លើអាកាស នៅរាជធានីភ្នំពេញ ក្រោមកិច្ចសហការ រវាងកម្ពុជានិងជប៉ុន ដែលកំពុងតែធ្វើឲ្យ អ្នកប្រើប្រាស់បណ្តាញសង្គមហ្វេសប៊ុក មានការចាប់អារម្មណ៍យ៉ាងខ្លាំង។ 

ប្លង់ខ្សែរថភ្លើងលើអាកាសដែលគ្រោងនឹងដំណើរនៅរាជធានីភ្នំពេញ

យោងតាមទំព័រដដែលបានឲ្យដឹងថា ផែនការមេ គម្រោងរថភ្លើងលើអាកាសប្រភេទ AGT ចំនួន៣ខ្សែដោយ៖

ខ្សែទី១៖ ផ្តើមចេញពីចំណុចមហាវិថីកម្ពុជាក្រោម មហាវិថីព្រះមុនីវង្ស មហាវិថីសហព័ន្ឋរុស្ស៊ី និងរង្វង់មូលចោមចៅ។

ខ្សែទី២៖ ផ្តើមចេញពីមហាវិថីព្រះមុនីវង្ស រត់ស្របផ្លូវរថភ្លើង រួចបត់ឆ្វេងតាម ផ្លូវតាងកសាងចូលអាកាសយានដ្ឋានអន្តរជាតិភ្នំពេញ។

ខ្សែទី៣៖ ផ្តើមពីផ្សារថ្មី វិថីហ្សាលដឺហ្គោល វិថីព្រះមុនីរ៉េត ផ្លូវវេងស្រេង រង្វង់មូលចោមចៅ បត់មកអាកាសយានដ្ឋានអន្តរជាតិភ្នំពេញ។

បើសិនជាផែនការនេះ ចេញជារូបរាងមែននោះ វាគឺជាលើកដំបូងបំផុតហើយ ដែលកម្ពុជា មានសេវាដឹកជញ្ជូនសាធារណៈដែលប្រើរថភ្លើងលើអាកាស ដូចតាមបណ្តាប្រទេស អាស៊ានមួយចំនួនដូចជា៖ ថៃ សិង្ហបុរី និងម៉ាឡេស៊ី ជាដើម។ គេសង្ឃឹមថា គំរោងរថភ្លើងលើអាកាសនេះ នឹងចូលរួមចំនែកយ៉ាងសំខាន់ ក្នុងការកាត់បន្ថយការកកស្ទះចរាចរណ៍ ដែលបញ្ហាចំបងមួយ នៅរាជធានីភ្នំពេញសព្វថ្ងៃ៕

រូបគំរូរថភ្លើងលើអាកាស

រូបគំរូរថភ្លើងលើអាកាស

ប្រភព៖ ហ្វេសប៊ុក

ដោយ៖ រ័ត្ន

ខ្មែរឡូត