គ្រូបង្វឹកក្រុមជម្រើសជាតិប្រេសីុលដឹកនាំកីឡាករហ្វឹកហាត់ទាំងទុក្ខក្រៀមក្រំ

គ្រូបង្វឹកក្រុមជម្រើសជាតិប្រេសីុលដឹកនាំកីឡាករហ្វឹកហាត់ទាំងទុក្ខក្រៀមក្រំ

យោងតាមប្រភពព័ត៌មានប៊ីប៊ីសីុចេញផ្សាយកាលពីថ្ងៃពុធ ទី១១ មិថុនា ឆ្នាំ២០១៤ បានឱ្យដឹងថា គ្រូបង្វឹកក្រុមជម្រើសជាតិប្រេសីុលលោក Luis Felipe Scolari កំពុងជួបទុក្ខជាន់លើទុក្ខដោយសារតែលោកបាត់បង់សាច់ញាតិជាទីស្រលាញ់២នាក់ក្នុងរយៈពេលប៉ុន្មានសប្តាហ៍ថ្មីៗនេះ ។

បន្ទាប់ពីចូលរួមរំលែកទុក្ខបុណ្យសពសាច់ញាតិរបស់លោកម្នាក់កាលពីចុងខែឧសភា គ្រូបង្វឹកវ័យ៦៥ឆ្នាំបានបាត់បង់ក្មួយប្រុសអាយុ៤៨ឆ្នាំ ម្នាក់បន្ថែមទៀត ដោយសារគ្រោះថ្នាក់ចរាចរណ៍ដែលបានកើតឡើង កាលពីថ្ងៃអង្គារ ទី១០ មិថុនា ឆ្នាំ២០១៤ នៅទីក្រុង Passo Fundo ។ នេះគឺជាបន្ទុកផ្លូវចិត្តដ៏ធ្ងន់ធ្ងរមួយទៀតសម្រាប់លោក Scolari ដែលកំពុងហ្វឹកហាត់កីឡាករត្រៀមបើកការប្រកួតជួបជាមួយក្រូអាសីុនៅថ្ងៃព្រហស្បតិ៍នេះ ។

គួររំលឹកដែរថា លោក Scolari បានចូលមកដឹកនាំក្រុមជម្រើសជាតិប្រេសីុលក្នុងឆ្នាំ២០១២ ។ សមិទ្ធផលរបស់លោកបានជួយឱ្យក្រុមប្រេសីុលឈ្នះពានរង្វាន់បាល់ទាត់ពិភពលោក ២០០២ និងពានរង្វាន់បាល់ទាត់ Confederation cup 2013 ថ្មីៗនេះ ក្រោយពីយកឈ្នះក្រុមម្ចាស់ជើងឯកបាល់ទាត់ពិភពលោកអេស្បា៉ញដោយលទ្ធផល ៣-០ ៕