រថយន្ត ក្រុងក្រុមហ៊ុន ថោង ស៊ីន បុកម៉ូតូស្លាប់ម្នាក់ នៅផ្លូវជាតិលេខ៦

រថយន្ត ក្រុងក្រុមហ៊ុន ថោង ស៊ីន បុកម៉ូតូស្លាប់ម្នាក់ នៅផ្លូវជាតិលេខ៦

ខេត្តសៀមរាប ៖ គ្រោះថ្នាក់ចរាចរណ៍មួយ បានកើតឡើង ដោយសាររថយន្តក្រុងរបស់ក្រុមហ៊ុន ថោង ស៊ីន ១គ្រឿងបានបុកម៉ូតូ១គ្រឿង ម៉ាកវ៉េវអាល់ហ្វា បើកឆ្លងផ្លូវ បណ្តាលឲ្យម្ចាស់ម៉ូតូ ដែលជិះម្នាក់ឯងស្លាប់ភ្លាមៗ នៅនឹងកន្លែងគួរឱ្យរន្ធត់ធ្វើឱ្យកកស្ទះចរាចរ មួយសន្ទុះធំ ទើបសមត្ថកិច្ច ចរាចរណ៍ទៅដល់ ។

ហេតុការណ៍ គ្រោះថ្នាក់ចរាចរណ៍នេះ កើតឡើងកាលពីវេលាម៉ោង១០ និង១៥នាទីព្រឹក ថ្ងៃទី០៩ ខែសីហា ឆ្នាំ២០១៥ នៅតាមបណ្តោយ ផ្លូវជាតិលេខ៦ ស្ថិតក្នុងភូមិកកោះ ឃុំគោគធ្លកក្រោម ស្រុកជីក្រែង ខេត្តសៀមរាប ។

លោកអនុសេនីយ៍ឯក គង់ អឿន នាយផ្នែកចរាចរណ៍ នៃអធិការដ្ឋាននគរបាល ស្រុកជីក្រែង បានប្រាប់«កោះសន្តិភាព» នៅរសៀលថ្ងៃទី០៩ ខែសីហានេះថា ជនរងគ្រោះមានឈ្មោះ ពេញ ហឿន ភេទប្រុស អាយុ៥១ឆ្នាំ មានទីលំនៅ ភូមិកំពង់ម្កាក់ ឃុំគោគធ្លកក្រោម ស្រុកជីក្រែង ខេត្តសៀមរាប បានបើកបរម៉ូតូ ម៉ាកវ៉េវអាល់ហ្វា ពណ៌ខ្មៅ គ្មានស្លាកលេខ ដឹកស្រូវមួយការុងចេញពីផ្ទះ កូនប្រសារឆ្លងកាត់ ថ្នល់ជាតិលេខ៦ ពីជើងមកត្បូង ត្រូវបានរថយន្តក្រុងរបស់ក្រុមហ៊ុន ថោង ស៊ីន មានទិសដៅពីលិចទៅកើតក្នុង ល្បឿនលឿន បុកចំពីក្រោយ បណ្តាលឲ្យម្ចាស់ម៉ូតូស្លាប់ភ្លាមៗនៅ នឹងកន្លែងកើតហេតុ ។

លោកបន្តថា ចំណែកអ្នកបើកបររថយន្ត ម៉ាកហ៊ីយ៉ាន់ដាយ ពណ៌សលាយក្រហម ពាក់ស្លាកលេខ ភ្នំពេញ3A-4388 បានឈប់រថយន្ត រួចបើកទ្វារចុះរត់បាត់ស្រមោល ។

លោកបន្ថែមថា ចំពោះសាកសព ត្រូវសមត្ថកិច្ចជំនាញបានប្រគល់ជូន ទៅក្រុមគ្រួសារ ដើម្បីយកទៅ ធ្វើបុណ្យតាមប្រពៃណី រីឯរថយន្ត និងម៉ូតូ សមត្ថកិច្ចនាំយកទៅរក្សាទុក នៅអធិការរដ្ឋាននគរបាល ស្រុកជីក្រែងដើម្បី រង់ចាំការដោះស្រាយទៅតាមផ្លូវច្បាប់ ៕