កំពត៖ ជនជាតិចិនជាកម្មករ នៅរោងចក្រស៊ីម៉ងត៍ ខេស៊ីមែនម្នាក់ បានធ្លាក់ពីលើអគារកម្ពស់ ៨០ម៉ែត្រ ខណៈឡើងទៅទីនោះ ដើម្បីធ្វើការផ្សារជណ្តើរយន្ត ហើយដាច់ខ្សែក្រវាត់ នៅវេលាម៉ោង ១០និង៣០នាទីព្រឹក ថ្ងៃទី១០ ខែសីហា ឆ្នាំ២០១៥នេះ ក្នុងរោងចក្រស៊ីម៉ងត៍ ខេស៊ីមែន ភ្នំទទុង ស្ថិតក្នុងភូមិចង្កៀងខាងកើត ឃុំទទុង ស្រុកដងទង់ ខេត្តកំពត។

មន្ត្រីនគរបាល បានឲ្យមជ្ឈមណ្ឌលព័ត៌មានដើមអម្ពិលដឹងថា ជនរងគ្រោះ ឈ្មោះកៅ ហ្វីង ហ្វៀង (CAO WEN QIANG) ភេទប្រុស អាយុ៤១ឆ្នាំ ជនជាតិចិន ស្នាក់នៅក្នុងរោងចក្រ កន្លែងហេតុការណ៍ ខាងលើ។

មន្ត្រីនគរបាលដដែលបន្តថា ជនរងគ្រោះក្រោយធ្លាក់ស្លាប់ភ្លាម ត្រូវបានខាងក្រុមហ៊ុន នៃរោងចក្រស៊ីម៉ងត៍ ខាងលើ រួសរាន់ដឹកសព នាំយកទៅរាជធានីភ្នំពេញ យ៉ាងប្រញ៉ាប់ផងដែរ៕

ផ្តល់សិទ្ធដោយ ដើមអម្ពិល