យកទូរស័ព្ទទើបឆក់បានទៅបញ្ចាំង ម្ចាស់ហាង ស្គាល់ម្ចាស់ទូរស័ព្ទ ជាភេទទី៣ ដូចគ្នា ត្រូវជាប់ខ្នោះ

យកទូរស័ព្ទទើបឆក់បានទៅបញ្ចាំង ម្ចាស់ហាង ស្គាល់ម្ចាស់ទូរស័ព្ទ ជាភេទទី៣ ដូចគ្នា ត្រូវជាប់ខ្នោះ

ខេត្តបន្ទាយមានជ័យ ៖ ជនសង្ស័យម្នាក់ឆក់ទូរស័ព្ទដៃបានសម្រេចរួចយក ទៅបញ្ចាំង ត្រូវបាន ម្ចាស់ហាងប្តឹងនគរបាលប៉ុស្តិ៍ សង្កាត់ព្រះពន្លាឱ្យចាប់ ឃាត់ខ្លួនប្រគល់ឲ្យ នគរបាលការិយាល័យ ព្រហ្មទណ្ឌកម្រិតស្រាល ដើម្បីចាត់ការបន្តតាម និតិវិធីច្បាប់។

លោកវរសេនីយ៍ត្រី ម៉ុល សុភេទ នាយការិយាល័យនគរបាល ព្រហ្មទណ្ឌ កម្រិតស្រាល ស្តីទីបានឲ្យដឹងថាជនសង្ស័យឈ្មោះ លឹម រ៉ាទ្រី ហៅរស់ ភេទប្រុស អាយុ២១ឆ្នាំ ជាកម្មករ រស់នៅភូមិគោរដ្ឋាន សង្កាត់អូរ អំបិល ក្រុងសិរីសោភ័ណ ខេត្តបន្ទាយមានជ័យ គឺជាជនដែល ប្រើប្រាស់គ្រឿងញៀន ។ កាលពី វេលាម៉ោង៩ និង៤០នាទីយប់ ថ្ងៃទី១១ ខែសីហា ឆ្នាំ២០១៥ នៅក្នុងបរិវេណវេទិការ ខេត្តបន្ទាយមានជ័យ ស្ថិតក្នុងភូមិ៣ សង្កាត់ព្រះពន្លា ក្រុងសិរីសោភ័ណ មានករណីចោរឆក់ ទូរស័ព្ទដៃម៉ាក Samsung Galaxy Note 2 ពណ៌ខ្មៅ ១គ្រឿង ដែលមានម្ចាស់ឈ្មោះ ផេង សារឿន ហៅតន ភេទប្រុស(ភេទទី៣) អាយុ២៧ឆ្នាំ នៅភូមិគាប សង្កាត់ទឹកថ្លា ក្រុងសិរីសោភ័ណ ដែលបង្កឡើង ដោយឈ្មោះ លឹម រ៉ាទ្រី ហៅរស់ ។ ក្រោយពីធ្វើសកម្មភាព ឆក់ទូរស័ព្ទដៃ បានសម្រេច ជននេះ បានរត់គេចខ្លួន ហើយយកទូរស័ព្ទ ដៃទៅបញ្ចាំទាំងយប់ ឲ្យឈ្មោះ ស ណាគ្រី ភេទប្រុស(ភេទទី៣) អាយុ៣៣ឆ្នាំ នៅភូមិសែសិន សង្កាត់អូរអំបិល ក្រុងសិរីសោភ័ណ ពេលនោះម្ចាស់ហាង បានពិនិត្យមើល ទូរស័ព្ទដៃ និងឃើញ រូបថតម្ចាស់ទូរស័ព្ទដៃដែល ស្គាល់គ្នានិងស្របពេល ដែលម្ចាស់ទូរស័ព្ទដៃ បានតេប្រាប់ផង នោះក៏ប្តឹង សមត្ថកិច្ចនគរបាល ប៉ុស្តិ៍នគរបាលរដ្ឋបាល ព្រះពន្លាឲ្យ ចាប់ខ្លួនតែម្តង រួមទាំងដកហូត បានវត្ថុតាង ទូរស័ព្ទដៃដែល ជនសង្ស័យឆក់ផងដែរ ។

នៅចំពោះមុខសមត្ថកិច្ចជនសង្ស័យបានសារភាពថាពិតជា បានឆក់យក ទូរស័ព្ទដៃគេមែន ខណៈពេលដែលម្ចាស់ទូរស័ព្ទកំពុង និយាយទូរស័ព្ទនៅ ក្នុងបរិវេណវេទិការ ខេត្តបន្ទាយមានជ័យ រួចបម្រុងបញ្ចាំង ក៏ត្រូវសមត្ថកិច្ច ចាប់ខ្លួនតែម្តង ។

លោកនាយការិយាល័យបានបញ្ជាក់ថា ជនសង្ស័យត្រូវបាន សមត្ថកិច្ចកំពុង កសាងសំណុំរឿង ដើម្បីបញ្ជូនទៅសាលាដំបូង ខេត្តបន្ទាយមានជ័យ ចាត់ការតាម និតិវិធីច្បាប់ ចំណែកទូរស័ព្ទដៃ សមត្ថកិច្ចបាន ប្រគល់ជូនម្ចាស់ដើមវិញនារសៀល ថ្ងៃទី១២ ខែសីហា ឆ្នាំ២០១៥នេះផងដែរ ៕