ថៃ៖ តារាម៉ូដែលថៃ ២រូប កំពុងប្រឈមនឹងការដាក់ទោស និងរងការរិះគន់យ៉ាងខ្លាំងក្លា ពីសំណាក់សាធារណជន ចំពោះការថតវីដេអូរាំ កាយវិការស៊ិចស៊ីរបស់ពួកនាង នៅមុខប្រាសាទបុរាណឈ្មោះ Wat Chaiwatthanaram ដែលជាប្រាសាទមួយដ៏ទាក់ទាញ សំរាប់ភ្ញៀវទេសចរ ក្នុងចំណោមប្រាសាទនានា ដែលស្ថិតនៅខេត្តអយុធ្យា។

តារាម៉ូដែលទាំង២ កំពុងបញ្ចេញក្បាច់រាំរបស់នាងនៅមុខប្រាសាទបុរាណ

នាង Thannicha Nampanya អាយុ២៨ ឆ្នាំ និងម្នាក់ទៀតឈ្មោះ Nithikarn Chotethanapong អាយុ៣០ ឆ្នាំត្រូវប៉ូលិសខេត្តអយុធ្យា ធ្វើការកោះហៅ ក្រោយវីដេអូបញ្ចេញក្បាច់រាំ របស់ពួកគេធ្វើឲ្យផ្អើលពេញបណ្តាញសង្គម។ នៅក្នុងវីដេអូ គេឃើញស្រីស្អាតទាំង២ ដែលស្លៀតឈុតពណ៌ក្រហម រាំក្បាច់មើលទៅហាក់មិនសូវសមរម្យ នៅមុខប្រាសាទ ដែលគេចាត់ទុកជា បេតិកភណ្ឌជាតិ និងកន្លែងជាទីសក្ការៈរបស់ជនជាតិថៃ។

“ពួកយើងមិនបានយល់ច្បាស់ ព្រោះយើងគ្រាន់តែចង់ធ្វើលេងសើច ផ្តល់ភាពរីករាយ ដោយមិនបានគិតពីការប៉ះពាល់មុខមាត់ប្រទេស។ យើងខ្ញុំទាំង២ ពិតជាសុំទោស ដែលបានក្លាយជាគំរូដ៏អាក្រក់នេះ” តារាម៉ូដែលទាំង២ បានប្រាប់ក្នុងសន្និសីទសារព័ត៌មានដូច្នេះ។ នាងបានបន្តថា វីដេអូនោះបានថត កាលពីថ្ងៃទី១២ មិថុនា តែនាងមិនដឹងនោះទេថា ហេតុដូចម្តេចទើបបានជា វាបានត្រូវបែកធ្លាយ។

សាក្សីម្នាក់ ជាអ្នកលក់វត្ថុអនុស្សាវរីយ៍ ប្រាប់ឲ្យដឹងថា គាត់បានឃើញពួកនាង ដើរជាមួយបុរសម្នាក់ដែលជាជាងថតរូប ដោយដើរថតរូប ជុំវិញបរិវេណប្រាសាទ ហើយចុងក្រោយគឺថតវីដេអូរាំនោះតែម្តង។ គួរបញ្ជាក់ផងដែរថា តារាម៉ូដែលទាំង២ អាចជាប់ពន្ធនាគារចំនួន ១ខែ និងពិន័យជាប្រាក់ ប្រមាណ ១ម៉ឺនបាត (២៨២ ដុល្លារអាមេរិក)៕

វីដេអូនេះបានថត កាលពីថ្ងៃទី១២ មិថុនា

ក្រុមប្រាសាទបុរាណនៅខេត្តអយុធ្យា ប្រទេសថៃ

ប្រភព៖ បរទេស

ដោយ៖​ រ័ត្ន

ខ្មែរឡូត