ព្រហ្មទណ្ឌ កម្រិតស្រាល ខេត្តសៀមរាប បង្ហាញមុខសញ្ញា ក្រុមចោរលួច-ឆក់ មួយសំបុកធំ (មានវីដេអូ)

ព្រហ្មទណ្ឌ កម្រិតស្រាល ខេត្តសៀមរាប បង្ហាញមុខសញ្ញា ក្រុមចោរលួច-ឆក់ មួយសំបុកធំ (មានវីដេអូ)

ខេត្តសៀមរាប ៖ កម្លាំងការិយាល័យនគរបាល ព្រហ្មទណ្ឌកម្រិតស្រាល នៃស្នងការដ្ឋាននគរបាលខេត្ត បានបើកប្រតិបត្តិការចុះបង្ក្រាបបាន មុខសញ្ញាចោរឆក់ និងលួចមួយសំបុកធំ រហូតឈានឃាត់ខ្លួន បានជាបន្តបន្ទាប់ ដែលមានប្រុស-ស្រីចំនួន១១នាក់ កាលពីថ្ងៃទី១៥ ខែសីហា ឆ្នាំ២០១៥ ។

លោកវរសេនីយ៍ទោ ភឹង ចិន្តារ៉េត នាយការិយាល័យព្រហ្មទណ្ឌ កម្រិតស្រាលបានប្រាប់«កោះសន្តិភាព»ឱ្យដឹងថា ក្រុមចោរឆក់ និងលួច ដែលបង្ក្រាបបាននេះ ពុំមែនជាមុខសញ្ញាចាស់ ឬមានការចាត់ចែងពី មេខ្លោងណានោះទេ ពួកគេគឺចេញពីប្រភពញៀនថ្នាំ និងគ្មានមុខរបរពិតប្រាកដ ហើយមួយចំនួនទៀតគឺចាកចេញពី ផ្ទះសម្បែងចោលឪពុក-ម្តាយផងដែរ ហើយសកម្មភាពនេះ ពួកគេបានផ្លាស់ប្តូរគ្នាដើរលួច និងឆក់នៅក្នុងសង្កាត់ចំនួន៤ នៃក្រុងសៀមរាប ។

លោកបន្តថា ប្រតិបត្តិការចុះបង្ក្រាបនេះ គឺមានការលំបាកបន្តិច ប៉ុន្តែត្រូវបាន លោកឧត្តសេនីយ៍ទោ សត ណាឌី ស្នងការនគរបាលខេត្តសៀមរាប បានផ្តល់ជូននូវថវិកា ចំនួន៨០ម៉ឺនរៀល និងលោក ព្រហ្ម សាគុណ (នាយកក្រុមហ៊ុនឯកជន ឈ្មោះ រ៉ូយាល់ អវតា ឌីវេលុបមិន) ក៏បានផ្តល់ថវិកាចំនួន២០ម៉ឺនរៀលដែរ សម្រាប់លើកទឹកចិត្តដល់កម្លាំងសមត្ថកិច្ច របស់ការិយាល័យជំនាញ ។ ប្រាក់ដែលបានពីការឧបត្ថម្ភនេះ លោកបានផ្តល់ទៅឱ្យលោកអនុសេនីយ៍ទោ ជា ប៊ុនឡុង ចំនួន២០ម៉ឺនរៀល និង៦០ម៉ឺនរៀលទៀតផ្តល់ឱ្យ កម្លាំងសម្ងាត់ក្នុងមូលដ្ឋាន ដែលសហការ បានល្អ និងស្ងាត់ស្ងៀម ទើបឈានដល់ឃាត់ខ្លួនប្រុស-ស្រី បាន១សំបុកធំយ៉ាងដូច្នេះ ។

លោកបានបញ្ជាក់ថា ជនសង្ស័យប្រុស-ស្រីចំនួន១១នាក់ដែលបាន ឃាត់ខ្លួននេះមាន ទី១-ឈ្មោះ ស៊ុន ដារ៉ា ហៅទេព្យ ភេទប្រុស អាយុ១៨ឆ្នាំ មុខរបរមិនពិត មានទីលំនៅភូមិវាល សង្កាត់គោកចក ក្រុងសៀមរាប, ទី២-ឈ្មោះ ឆន ស៊ីរដ្ឋា ហៅជា ភេទប្រុស អាយុ១៨ឆ្នាំ មុខរបរមិនពិត រស់នៅភូមិវាល សង្កាត់គោកចក ក្រុងសៀមរាប, ទី៣-ឈ្មោះ ហម ធីតា ហៅហ្កិច ភេទស្រី អាយុ២៣ឆ្នាំ គ្មានមុខរបរ ស្នាក់នៅស្រុកកងមាស ខេត្តកំពង់ចាម, ទី៤-ឈ្មោះ ជា វណ្ណៈ ភេទប្រុស អាយុ៣៤ឆ្នាំ រស់នៅភូមិតាភុល សង្កាត់ស្វាយដង្គុំ, ទី៥-ឈ្មោះ សាន្ត ស៊ីម ហៅទឹកកក ភេទប្រុស អាយុ១៩ឆ្នាំ ស្នាក់នៅភូមិបឹងដូនប៉ា សង្កាត់ស្លក្រាម, ទី៦-ឈ្មោះ អ៊ឹង សុខា ភេទប្រុស អាយុ២១ឆ្នាំ រស់នៅភូមិត្រពាំងស្វាយ ឃុំលាងដៃ ស្រុកអង្គរធំ, ទី៧-ឈ្មោះ ឈុន មេងរ៉ូ ភេទប្រុសអាយុ២០ឆ្នាំ មានទីលំនៅភូមិខ្នារ សង្កាត់ជ្រាវ, ទី៨-ឈ្មោះ ជុំ រក្សា ភេទប្រុស អាយុ២៤ឆ្នាំ ស្នាក់នៅភូមិវត្តដំណាក់ សង្កាត់សាលាកំរើក, ទី៩-ឈ្មោះ ឡៃ រដ្ឋម៉ាណា ភេទប្រុស អាយុ២៧ឆ្នាំ រស់នៅភូមិពោធិ៍បុស្ស ឃុំលាងដៃ ស្រុកអង្គរធំ ខេត្តសៀមរាប, ទី១០-ឈ្មោះ អ៊ួង គន្ធា ភេទស្រី អាយុ១៩ឆ្នាំ មានទីលំនៅភូមិចុងកៅស៊ូ សង្កាត់ស្លក្រាម និងទី១១-ឈ្មោះ គង់ ស្រីលក្ខ ភេទស្រី អាយុ១៥ឆ្នាំ ស្នាក់នៅក្នុងក្រុងសៀមរាប ។

លោកបានបញ្ជាក់ទៀតថា ក្រោយពីធ្វើការឃាត់ខ្លួន បានជនសង្ស័យប្រុស-ស្រីចំនួន១១នាក់ ព្រមទាំងដកហូតបានវត្ថុតាង មួយចំនួនរួមមាន ម៉ូតូម៉ាកវីវ៉ា ពណ៌ខ្មៅ១គ្រឿងរបស់ជនសង្ស័យ ដែលជាមធ្យោបាយធ្វើ សកម្មភាពលួច និងឆក់ ព្រមទាំងសម្ភារមួយចំនួន ទៀតរបស់ភ្ញៀវក្នុងក្រុងសៀមរាប ។

បច្ចុប្បន្នជនសង្ស័យប្រុស-ស្រីចំនួន១១នាក់ និងវត្ថុតាង ត្រូវបានកម្លាំងជំនាញរៀបចំ កសាងសំណុំរឿងបញ្ជូន ជនសង្ស័យប្រុស-ស្រីចំនួន១០នាក់ទៅ សាលាដំបូងខេត្តដើម្បីចាត់ការ ទៅតាមនិតិវិធីច្បាប់ លើកលែងតែឈ្មោះ គង់ ស្រីលក្ខ ម្នាក់ដែលកម្លាំងជំនាញ បានបញ្ជូនទៅមណ្ទលកែប្រែ ដោយសាតែនាងជាអនីតិជន៕