ចាប់បញ្ជូន ជនសង្ស័យ ខាងកាប់ចាក់ យ៉ាងសកម្ម ទៅតុលាការ បន្ទាប់ពីរត់គេច ខ្លួនអស់រយៈ៧ខែ

ចាប់បញ្ជូន ជនសង្ស័យ ខាងកាប់ចាក់ យ៉ាងសកម្ម ទៅតុលាការ បន្ទាប់ពីរត់គេច ខ្លួនអស់រយៈ៧ខែ

ខេត្តបន្ទាយមានជ័យ ៖ ពាក្យចាស់លោកពោលថា ជង់មិនដែលភ្លេចកុកទេ មានតែកុកទេដែលភ្លេចជង់ ជាក់ស្តែងជនជាប់ចោទម្នាក់ ដែលគេធ្លាប់ដឹង និងស្គាល់ថា ជាជើងកាប់ចាក់យ៉ាងសាហាវ ឲ្យតែមានទំនាស់ជាមួយ គូបដិបក្ខ របស់ខ្លួន ត្រូវបានកម្លាំងនគរបាល ការិយាល័យព្រហ្មទណ្ឌកម្រិតធ្ងន់ នៃស្នងការដ្ឋាននគរបាលខេត្តបន្ទាយមានជ័យអនុវត្តតាមដីកា ចាប់ឃាត់ខ្លួនបញ្ជូនទៅសាលាដំបូង ខេត្តបន្ទាយមានជ័យ នៅល្ងាចថ្ងៃទី១៧ សីហា នេះពីបទហិង្សាដោយចេតនា មានស្ថានទម្ងន់ទោស បន្ទាប់ពីធ្វើសកម្មភាពកាប់ ទៅលើគូទំនាស់របស់ខ្លួនឲ្យរងរបួសធ្ងន់ រួចរត់គេចទៅសម្ងំលាក់ខ្លួន នៅខេត្តសៀមរាបរយៈពេលជាង ៧ខែកន្លងមក ។

លោកវរសេនីយ៍ឯក សិទ្ធ ឡោះ ស្នងការរងទទួលបន្ទុកការិយាល័យ កណ្តាលនគរបាលព្រហ្មទណ្ឌ បានឲ្យដឹងថា ជនជាប់ចោទឈ្មោះ អ៊ុន ភារុន ហៅអារ.កទា ភេទប្រុស អាយុ២១ឆ្នាំ នៅភូមិព្រៃប្ញស្សី សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ ។

កាលពីថ្ងៃទី០៣ ខែមករា ឆ្នាំ២០១៥ ជននេះរួមទាំងបក្ខពួកគេ មានគ្នា៣នាក់ បានធ្វើសកម្មភាពកាប់ប្រហារ ទៅលើគូទំនាស់របស់ខ្លួនឈ្មោះ យឹម តុលា ហៅមៀវ ភេទប្រុស អាយុ២៣ឆ្នាំ នៅភូមិ២ សង្កាត់កំពង់ស្វាយ ក្រុងសិរីសោភ័ណ នៅចំណុចមុខផ្សាររាត្រី ស្ថិតក្នុងភូមិព្រៃប្ញស្សី សង្កាត់ព្រះពន្លា បណ្តាលឲ្យរបួស ថ្ពាល់ខាងឆ្វេង ដាច់ស្លឹកត្រចៀកខាងឆ្វេង ចំក្បាលចំហៀងខាងឆ្វេង និងកែងដៃខាងឆ្វេង រងរបួសធ្ងន់ ។

ក្រោយពីធ្វើសកម្មភាពរួចជននេះ បានរត់គេចខ្លួនមួយរយៈ ពេលត្រឡប់មកវិញត្រូវបាន នគរបាលចាប់ឃាត់ខ្លួនតាមដីកាបង្គាប់ឲ្យចាប់ឃាត់ខ្លួន របស់តុលាការខេត្តបន្ទាយមានជ័យ ។ នេះគឺជាជនទី២ក្នុងចំណោម បក្ខពួកគេ៣នាក់ ដែលត្រូវបានចាប់ឃាត់ខ្លួន ។

នៅចំពោះមុខសមត្ថកិច្ច ជនសង្ស័យបានសារភាពថា ខ្លួនគឺពិតជាបានកាប់ទៅលើឈ្មោះ យឹម តុលា ហៅមៀវ ពិតប្រាកដមែនកាលពីអំឡុងខែមករា ឆ្នាំ២០១៥ បន្ទាប់ពីកាប់រួចគេក៏ បានរត់គេចខ្លួនទៅ ផ្ទះបងប្អូននៅឯខេត្តសៀមរាប បានរយៈពេលជាង៧ខែ ពេលត្រឡប់មកវិញក៏ត្រូវសមត្ថកិច្ច ចាប់ឃាត់ខ្លួនតែម្តង ។

លោកស្នងការរង បានបញ្ជាក់ថា ជនជាប់ចោទឈ្មោះ អ៊ុន ភារុន ហៅអារ.កទា ត្រូវបានកម្លាំងនគរបាលការិយាល័យ ព្រហ្មទណ្ឌកម្រិតធ្ងន់កសាង សំណុំរឿងបញ្ជូនទៅ សាលាដំបូងខេត្ត និងបានឃុំខ្លួនបណ្តោះអាសន្ននៅពន្ធនាគារខេត្ត រង់ចាំបើកសវនាការ កាត់ទោសតាមច្បាប់ ៕