កំពត៖ លោកគ្រូ ព្រំ ចាន់ថុល អាយុ ៣៥ឆ្នាំ បង្រៀន នៅវិទ្យាល័យវត្តអង្គរជ័យ បានធ្លាក់ខ្លួនក្លាយ ជាអ្នកជួញដូរ ថ្នាំញៀន ត្រូវបានកម្លាំងនគរបាលឃាត់ខ្លួន កាលពីយប់ថ្ងៃទី២១ ខែសីហា ហើយក៏ត្រូវបានកម្លាំងនគរបាល ការិយាល័យប្រឆាំងគ្រឿងញៀនខេត្តកំពត បានបញ្ជូនខ្លួនទៅកាន់សាលាដំបូងខេត្ត ដើម្បីចាត់ការតាមច្បាប់ នាព្រឹកថ្ងៃអាទិត្យ ទី២៣ ខែសីហា នេះផងដែរ។

មន្ត្រីនគរបាលជំនាញគ្រឿងញៀនខេត្ត បានប្រាប់ជ្ឈមណ្ឌលព័ត៌មានដើមអម្ពិលថា លោក ព្រំ ចាន់ថុល អាយុ ៣៥ឆ្នាំ មុខរបរធ្វើគ្រូបង្រៀន នៅវិទ្យាល័យវត្តអង្គរជ័យ មានទីលំនៅភូមិត្រពាំងខ្វា ឃុំភ្នំកុង ស្រុកអង្គរជ័យ ខេត្ត កំពត ត្រូវបានឃាត់ខ្លួន កាលពីវេលាម៉ោង១៩ និង៣០នាទីយប់ថ្ងៃទី២១ ខែសីហា ឆ្នាំ២០១៥ ត្រង់ចំណុចផ្ទះ សំណាក់ស្រះឈូក ស្ថិតក្នុងភូមិសុវណ្ណសាគរ សង្កាត់កំពង់កណ្តាល ក្រុងកំពត។

ជាមួយការឃាត់ខ្លួនសមត្ថកិច្ចដកហូតបាន គ្រឿង ញៀនប្រភេទម៉ាទឹកកក ចំនួន ៤កញ្ចប់តូច ទម្ងន់ ៩,៨២ក្រាម, ជញ្ជីងសម្រាប់ថ្លឹងថ្នាំញៀន ១គ្រឿង ម៉ាក Digital Scale, ទូរស័ព្ទដៃម៉ាក Nokia ចំនួន ៣គ្រឿង, ដបទឹកសុទ្ធ និងទុយោច្នៃសម្រាប់ជក់ ១កំប្លេ, បារីម៉ាយស៊ីវែន ១កញ្ចប់, ដែកកេះ២, ដែកឆាបឆ្នៃធ្វើកាំបិត ១ដើម និង កាបូប ដៃចំនួន២៕

ផ្តល់សិទ្ធដោយ ដើមអម្ពិល