និស្សិតពេទ្យម្នាក់ចេញពីយាមប្រញាប់ ទៅដឹកប្អូនទៅប្រឡងបាក់ឌុប ត្រូវចោរឆក់កាបូប ដួលបោកក្បាលស្លាប់

និស្សិតពេទ្យម្នាក់ចេញពីយាមប្រញាប់ ទៅដឹកប្អូនទៅប្រឡងបាក់ឌុប ត្រូវចោរឆក់កាបូប ដួលបោកក្បាលស្លាប់

រាជធានីភ្នំពេញ ៖ យុវនិស្សិតពេទ្យម្នាក់ចេញពីយាមប្រញាប់ទៅដឹកប្អូនទៅ ប្រឡងបាក់ឌុប ត្រូវចោរឆក់កាបូបបណ្តាលឲ្យ ដួលម៉ូតូបោកក្បាល ស្លាប់ភ្លាមៗនៅកន្លែងកើតហេតុ កាលពីវេលាម៉ោង ៥និង៣០នាទីភ្លឺថ្ងៃទី២៤ សីហា តាមផ្លូវលេខ២៧១ សង្កាត់ទួលទំពូងទី១ ខណ្ឌចំការមន ។

នារីរងគ្រោះរហូតស្លាប់ឈ្មោះ ម៉ក់ ប៉ុនកន្និកា អាយុ២៣ឆ្នាំ ជានិស្សិតពេទ្យ ឆ្នាំទី៥ នៅសាលាថែទាំវិទ្យាសាស្ត្រសុខាភិបាល (សាលាពេទ្យ មិត្តភាពខ្មែរ-សូវៀត) មានទីលំនៅភូមិ ក្រាំងម្កាក់ ស្រុកអង្គស្នួល ខេត្តកណ្តាល ។

សាក្សីឃើញហេតុការណ៍បានឲ្យដឹងថា មុនពេលកើតហេតុ នារីរងគ្រោះ ជិះម៉ូតូ ហុងដាឌ្រីម ពណ៌ខ្មៅ ស៊េរី២០០៨ ពណ៌ខ្មៅ ពាក់ស្លាកលេខ កណ្តាល 1F-9283 បើកបរពីជើង ទៅត្បូង មកដល់ចំណុចខាងលើ មានជន២នាក់ ជិះម៉ូតូមួយគ្រឿង មិនចាំម៉ាកទិសដៅ ស្របគ្នាមកអែបហើយ ធ្វើសកម្មភាពឆក់កាបូប ពីនារីរងគ្រោះ តែឆក់មិនបានសម្រេចបណ្តាល ឲ្យដួលបោកក្បាល ទាំងអត់ពាក់មួក ការពារសុវត្ថិភាពស្លាប់ ភ្លាមៗនៅកន្លែង កើតហេតុ ដោយបានដោះមួកព្យួរនៅ ដៃចង្កូតម៉ូតូ ។ ចំណែកជនសង្ស័យ ជិះម៉ូតូរត់គេច បាត់ស្រមោល ។

ប្រភពព័ត៌មានពីសាច់ញាតិនាងរងគ្រោះ បានឲ្យដឹងថា ថ្ងៃកើតហេតុនាង បានចុះស្តារនៅ មន្ទីរពេទ្យមិត្តភាពខ្មែរ-សូវៀត ហើយជាវេន ប្រចាំការពេញ មួយថ្ងៃមួយយប់ ព្រឹកឡើងនាង ប្រញាប់ជូនប្អូនទៅ ប្រឡងបាក់ឌុប ក៏ជួបគ្រោះអកុសល បាត់បង់ជីវិតតែម្តង ។

សពត្រូវបានសាច់ញាតិដឹកយកទៅធ្វើបុណ្យតាមប្រពៃណីនៅស្រុកកំណើត ៕