ចិន​៖ គូស្នេហ៍មួយគូ ពិតជាផ្អែមល្ហែម​ និងមានភាពប៉ិនប្រសព្វមែនទែន ក្នុងការយកឈ្នះ ការប្រកួតថើបគ្នាមួយ នៅក្នុងខេត្ត Chongqing។

ព្រឹត្តិការណ៍ដ៏គួរឲ្យភ្ញាក់ផ្អើលមួយ ត្រូវបានធ្វើឡើង ជាមួយនឹងការចូលពីសំណាក់ដៃគូស្វាមីភរិយា និងសង្សារ ប្រមាណ ២០គូ។ ការប្រកួតថើបគ្នានេះ តំរូវឲ្យអ្នកចូលរួមទាំងអស់ បង្កើតនូវស្ទីល ក៏ដូចជាទីតាំងប្លែកៗនៃការថើប ដើម្បីទាក់ទាញចំណាប់អារម្មណ៍ ពីសំណាក់អ្នកទស្សនាយ៉ាងច្រើនកុះករ ដែលកំពុងជក់ចិត្តក្នុងការថតរូប ។

ដោយឡែក ដៃគូសង្សារមួយគូ បានបង្ហាញនូវភាពប៉ិនប្រសព្វ បូករួមនឹងភាពជិតស្និទ្ធជាទីបំផុត ទទួលបានជ័យជំនះ នៅក្នុងការប្រកួតនេះ ដោយពួកគេទាំងពីរនាក់ រក្សាការថើបមាត់ទល់នឹងមាត់ បានរយៈពេល ដល់ទៅ ៥៦នាទី ជាមួយនឹងការប្តូរក្បាច់ ដ៏ពិបាកទ្រាំ ចំនួន ៧ទីតាំង។

ទោះបីឈ្នះឬចាញ់ក៏ដោយ ក៏អ្នកចូលរួមប្រកួតខ្លះ មិនភ្លេចនោះទេ ក្នុងការហូតទួរស័ព្ទដៃរបស់ពួកគេ មកថតរូប Selfie ទុកជាអនុស្សាវរីយ៍ផងដែរ។

គួរបញ្ជាក់ផងដែរថា ការប្រកួតថើបគ្នាលក្ខណៈបែបនេះ មិនមែនជាព័ត៌មានថ្មីនោះទេ នៅក្នុងប្រទេសចិន ដូច្នេះហើយ បានជាអ្នករៀបចំកម្មវិធី ខិតខំ រិះរកវិធី ធ្វើយ៉ាងណា ដើម្បីឲ្យការប្រកួត រឹងតែគួរឲ្យរំភើប និងប្លែកភ្នែក ដូចជា តំរូវឲ្យគូស្នេហ៍ប្រកួតក្នុងទឹក ឬបញ្ចូលទាំងគូស្នេហ៍ភេទទី៣ ជាដើម៕

ប្រភព៖ shanghaiist

ដោយ៖ កុសល

ខ្មែរឡូត