ក្រុមអភិរក្ស ប្រាសាទក្រៅ ឧទ្យានអង្គរ នៃអាជ្ញាធរអប្សរា ប្រទះឃើញ ព្រះពុទ្ធបដិមា២អង្គ

ក្រុមអភិរក្ស ប្រាសាទក្រៅ ឧទ្យានអង្គរ នៃអាជ្ញាធរអប្សរា ប្រទះឃើញ ព្រះពុទ្ធបដិមា២អង្គ

ខេត្តសៀមរាប ៖ ព្រះពុទ្ធបដិមា២អង្គ ស្ថិតក្នុងឥរិយាបថសមាធិ និងផ្ចាញ់មារ ធ្វើអំពីលោហធាតុ ត្រូវបានក្រុមអភិរក្សប្រាសាទក្រៅឧទ្យានអង្គរ របស់អាជ្ញាធរជាតិអប្សរាប្រទះ ឃើញកាលពីព្រឹកថ្ងៃទី២៥ ខែសីហា ឆ្នាំ២០១៥ នៅក្រោយព្រះអង្គធំ លើខ្នងភ្នំគូលែន ក្នុងខណៈពេលដែល ចុះពិនិត្យចម្លាក់ស្នាមព្រះបាទ ។ ព្រះពុទ្ធបដិមា ទាំងពីរអង្គនេះ១អង្គមានកម្ពស់២៧ សង់ទីម៉ែត្រ ទទឹង១៩សង់ទីម៉ែត្រ និង១អង្គទៀតមានកម្ពស់ ៣០សង់ទីម៉ែត្រ ទទឹង១៦សង់ទីម៉ែត្រ ។

លោក ហែម ម៉ៃ បុគ្គលិកបច្ចេកទេស នៃនាយកដ្ឋានអភិរក្សប្រាសាទ ក្រៅឧទ្យានអង្គរ ដែលបានប្រទះឃើញព្រះពុទ្ធបដិមានេះបានរៀបរាប់ថា នៅល្ងាចថ្ងៃទី២៤ ខែសីហា ឆ្នាំ២០១៥ គឺក្នុងពេលដែល លោកកំពុងបំពេញការងារនៅលើភ្នំគូលែន លោកតាអាចារ្យមួយរូប បានមកប្រាប់លោកថា មានក្មេងៗដែលដើរ បាញ់សត្វបានប្រទះឃើញរូបស្នាមព្រះបាទនៅផ្ទាំងថ្មធំ ខាងក្រោយព្រះអង្គធំ លើខ្នងភ្នំគូលែនប្រហែល១៥០ម៉ែត្រ ។

លុះពេលព្រឹកឡើងថ្ងៃទី២៥ ខែសីហា ដោយចង់ពិនិត្យឃើញឱ្យបានច្បាស់ ថាតើជាស្នាមព្រះបាទមែន ឬក៏អត់ លោកក៏បាននាំក្រុមការងារទៅ ពិនិត្យមើលជាក់ស្តែង ដោយឱ្យក្មេងៗដែលបានស្គាល់ កន្លែងនោះជាអ្នកនាំផ្លូវ ។

នៅពេលទៅដល់ ក៏បានប្រទះឃើញ ស្នាមព្រះបាទនោះមែន ស្នាមចម្លាក់ព្រះបាទនោះ ស្ថិតក្នុងរូបភាពមិនទាន់ឆ្លាក់រួចរាល់នោះទេ នៅលើផ្ទាំងថ្មដ៏ធំមួយ ។ ស្នាមចម្លាក់ព្រះបាទនេះ មានបណ្តោយ២,៥ម៉ែត្រ ទទឹង១,៣ម៉ែត្រ និងមានជម្រៅដល់ទៅ២,៨៥ម៉ែត្រ ។

លោកបានរៀបរាប់បន្តថា ដោយសារតែមានដើមឈើដុះពីលើ និងមានស្លឹកឈើជ្រុះកប់ច្រើន ហើយមានទឹកដក់ជ្រៅទៀតនោះ លោកក៏បានឱ្យក្មេងៗជួយបាចទឹកចេញ និងបោចឫសឈើសម្អាត ក៏បានប្រទះឃើញព្រះពុទ្ធបដិមា២អង្គទៀតនៅទីនោះ រួចក៏យកមករក្សាទុកនៅនាយកដ្ឋាន អភិរក្សប្រាសាទក្រៅឧទ្យានអង្គរ របស់លោកសិន ។

លោក ឈាន រដ្ឋា ប្រធាននាយកដ្ឋានស្តីទី អភិរក្សប្រាសាទក្រៅឧទ្យានអង្គរ បានបញ្ជាក់ប្រាប់ថា នៅពេលនេះព្រះពុទ្ធបដិមាទាំង២អង្គត្រូវបាន រក្សាទុកក្នុងនាយកដ្ឋាន របស់លោកនៅឡើយ ដោយរង់ចាំក្រុមជំនាញ បុរាណវិទ្យាធ្វើការសិក្សាវិភាគ ដើម្បីកំណត់អត្តសញ្ញាណ និងអាយុកាល នៃព្រះពុទ្ធបដិមានេះ ។ លោកបញ្ជាក់ទៀតថា នៅពេលនេះក្រុមអ្នកជំនាញ មិនទាន់ហ៊ានអះអាងច្បាស់លាស់ នៅឡើយទេថា តើព្រះពុទ្ធបដិមាទាំង២អង្គនេះកសាងនៅក្នុងសម័យ ឬឆ្នាំណានៅឡើយទេ ៕