ទៅរកឱសថ បុរាណក្នុងព្រៃ ត្រូវសត្វខ្ទីងវ័ធ របួសភ្លៅធ្ងន់ធ្ងរ

ទៅរកឱសថ បុរាណក្នុងព្រៃ ត្រូវសត្វខ្ទីងវ័ធ របួសភ្លៅធ្ងន់ធ្ងរ

ខេត្តប៉ៃលិន ៖ បុរសម្នាក់ត្រូវក្រុមគ្រួសារ និងអ្នកជិតខាងដឹកតាម ម៉ូតូបញ្ជូនទៅសង្គ្រោះ នៅមន្ទីរពេទ្យបង្អែកខេត្ត ខណៈបណ្តើរ សត្វសុនខ(ឆ្កែ)ចំនួន៥ក្បាលចូលទៅក្នុងព្រៃ ដើម្បីរកកាប់ឱសថខ្មែរបូរាណ (ដើមឈើព្រៃ)យកមកស្ងោរផឹក ស្រាប់តែវាក់នឹង សត្វខ្ទីង១ក្បាល ពណ៌ខ្មៅ ស្ទុះចេញពីក្នុងព្រៃរត់តម្រង់ ទៅវ័ធចំភ្លៅស្តាំជនរងគ្រោះបណ្តាលឱ្យធ្លាយគល់ភ្លៅ ព្យួរមនុស្សជាប់នឹងស្នែង រួចគ្រវីចុះឡើងៗ លុះជនរងគ្រោះប្រឹងតាំងស្មារតី ទើបដៃម្ខាងចាប់រោមវាជាប់ ហើយដៃម្ខាងទៀតយកកាំបិត កាប់ចំខ្ទង់ច្រមុះលិច១ថ្នាំងដៃ រួចសត្វខ្ទីងនោះក៏រលាស់បោកធ្លាក់ទៅលើដីរត់គេចខ្លួនតែម្តង ។

ហេតុការណ៍បុរសរងគ្រោះ ត្រូវសត្វខ្ទីងវ័ធឱ្យរបួសធ្ងន់នេះបានកើតឡើង កាលពីវេលាម៉ោង៨ និង៣០នាទីព្រឹក ថ្ងៃទី២២ ខែសីហា ឆ្នាំ២០១៥ កន្លងទៅនេះស្ថិតនៅ ចំណុចអូរស្លេវ ភូមិភ្នំដំបង សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន ។

ប្រភពព័ត៌មានបានឱ្យដឹងថា ជនរងគ្រោះមានឈ្មោះ ព្រាម សុខន ភេទប្រុស អាយុ៣៨ឆ្នាំ ជាកសិករ របួសធ្លាយភ្លៅស្តាំ ដេរអស់ច្រើនថ្នេរ ដែលមានប្រពន្ធឈ្មោះ សេង ពៅ អាយុ២៥ឆ្នាំ ស្នាក់នៅចម្ងាយពីកន្លែងកើតហេតុ ប្រហែល៧គីឡូម៉ែត្រ ក្នុងភូមិ-សង្កាត់ខាងលើ ។

សូមបញ្ជាក់ថា នេះជាលើកទីមួយហើយ ដែលនៅក្នុងខេត្តប៉ៃលិន មានករណីសត្វខ្ទីងវ័ធជនរងគ្រោះ បណ្តាលឱ្យរបួសធ្ងន់ធ្ងរ ខណៈបណ្តើរឆ្កែទៅ រកឱសថបុរាណ ដោយកាលពីមុនធ្លាប់ តែមានករណីជ្រូកព្រៃខ្វេះ និងខ្លាឃ្មុំខាំប៉ុណ្ណោះ ៕