ភ្នំពេញ៖ បើទោះបីជាពេលនេះ ព័ត៌មានដែលថា តារាសម្តែងស្រី កញ្ញា ភិន សុដាលីស កំពុងតែមាន គម្រោងដឹកដៃបុរសសង្ហា លោក ប៉ែន ចំរ៉ុង ចូលរោងការ នៅដើមឆ្នាំ២០១៦នោះ បានធ្វើឲ្យមហាជន ជាច្រើនគិតថា ការចូលរោងការ របស់តារា២ដួងនេះ អាចនឹងធ្វើឲ្យ បុរសពោះម៉ាយ លោក ប៉ែន តុលា ដើរចេញពី គ្រួសារ លោក អ៊ិន សុភិន និងអាចធ្វើឲ្យទំនាក់ទំនង ជាឪពុកនិង កូនធម៌នេះ មានភាពរង្គោះរង្គើ ជាមួយគ្នាថែមទៀតផង ។

ទាក់ទងទៅនឹងបញ្ហានេះ លោក ប៉ែន តុលា ប្រាប់ LookingTODAY ឲ្យដឹងថា លោកផ្ទាល់បាន ដឹងហើយថា អតីតគូ ដណ្តឹង (ដាលីស) និងជ្រើសរើសយក លោក ប៉ែន ចំរ៉ុង ហើយខ្លួន និងទទួលយក រឿងគ្រប់យ៉ាង ដែលជាការ សម្រេច ចិត្តរបស់ ដាលីស តាំងពីដើមដល់ចប់ លោកមិនដែល បង្ខំនាងឡើយ។

អតីតតារាសម្តែង និងជាតារាបង្ហាញម៉ូដរូបនេះ បានប្រាប់ឲ្យដឹងថា «បើទោះពេលនេះ ដាលីស គាត់សម្រេចចិត្តជ្រើស រើសយក ចំរ៉ុង ហើយរៀបការ ជាមួយគ្នាក៏ដោយ ក៏ខ្ញុំអាចទទួលយក បានគ្រប់យ៉ាង ព្រោះខ្ញុំដឹងថា ថ្ងៃណាមួយ ការ សម្រេចចិត្តនេះ និងមកដល់ ហើយបើវាមកដល់ ក្នុងពេលឆាប់ក៏ល្អ សម្រាប់រឿង (រៀបការរបស់ដាលីស) នេះ វាមិនធ្វើឲ្យរង្គោះរង្គើ ឬប៉ះពាល់ ដល់ទំនាក់ទំនង រវាងពុកធម៌ និងខ្ញុំទេ ព្រោះថា ប៉ា សុភិន គាត់ស្រលាញ់ចាត់ទុកខ្ញុំ ដូចជា កូនគាត់ ហើយខ្ញុំគោរពគាត់ ដូចជាឪពុក មិនប៉ះពាល់អ្វីឡើយ »។

នៅពេលសួរ ថាប្រសិនបើ តារាសម្តែង ដាលីស ចូលរោងការតើ លោក ប៉ែន តុលា នៅបន្តរស់នៅ ក្រោមដំបូលផ្ទះតែមួយ ជាមួយគ្រួសារ ដាលីស ទៀត ឬយ៉ាងណា? សំណួរនេះ ត្រូវបានម្ចាស់សាម៉ីខ្លួន ប្រាប់ឲ្យដឹងទៀតថា សម្រាប់ រឿងនេះ លោកនៅមិនទាន់ អាចនិយាយមុនថា យ៉ាងណាទេ គួរតែរស់នៅទៀត ឬយ៉ាងណា លោកចាំមើលជាក់ស្តែង សិន ។ តែអ្វីដែលលោក អាចអះអាង បានគឺរឿងរៀបការនេះ ដាច់ខាតមិនមានឥទ្ធិពល ធ្វើឲ្យលោកត្រូវដើរចេញពីឪពុកធម៌ឡើយ ផ្ទុយទៅវិញលោក នឹងរក្សាទំនាក់ទំនង ជាមួយឪពុកធម៌ ឲ្យបានស្ថិត ស្ថេរយូរអង្វែង តរៀងទៅ ៕

ផ្តល់សិទ្ធដោយ ដើមអម្ពិល