ស្វាយរៀង៖ មន្រ្តីនគរបាលខេត្តស្វាយរៀង បានបញ្ជាក់ប្រាប់ មជ្ឈមណ្ឌលព័ត៌មានដើមអម្ពឹល បន្ថែមថា នៅយប់ថ្ងៃទី១៦ ខែកញ្ញា ឆ្នាំ២០១៥ មានករណីគ្រោះថ្នាក់ចរាចរណ៏ រថយន្តដឹកកម្មករ បុករថយន្តដឹកកម្មករ បណ្តាលឲ្យរងរបួសធ្ងន់ស្រាល កើនឡើងដល់៧០នាក់ នៅក្រុងបាវិត ខេត្តស្វាយរៀង គិតមកត្រឹមព្រឹកថ្ងៃទី១៧ ខែកញ្ញានេះ។ មន្រ្តីនគរបាលបានអះអាងថា កម្មកររងគ្រោះធ្ងន់ស្រាល បានបញ្ជូនទៅកាន់មន្ទីរពេទ្យ និងគ្លីនិកជាច្រើនកន្លែង ហើយទើបតែប្រមូលព័ត៌មាន ពីបណ្តាមន្ទីរពេទ្យ និងគ្លីនិកទាំងនោះ។

កម្មករដែលរងរបួសទាំងអស់បានបញ្ជូនទៅកាន់មន្ទីរពេទ្យ៖
-សម្រាកនៅមន្ទីរពេទ្យ កែរ រដ្ឋា បាវិត ១១នាក់ ស្រី១០នាក់ របួសធ្ងន់៤នាក់ (ក្នុងនោះស្រី៣នាក់)
-សម្រាកនៅមន្ទីរេទ្យបង្អែក ជីភូ ៥៩នាក់ ស្រី៥០នាក់ របួសធ្ងន់៥នាក់់ (ក្នុងនោះស្រី៣នាក់)

ឧត្តមសេនីយ៏ស្នងការនគរបាល ខេត្តស្វាយរៀង បានបញ្ជាក់ថា មុនពេលកើតហេតុ មានរថយន្តដឹកកម្មករមួយគ្រឿង បានឈប់នៅលើផ្លូវពេលនោះ មានរថយន្តដឹកកម្មករ មួយគ្រឿងទៀត បានមកពីក្រោយ ហើយបុករថយន្ត ដែលឈប់នោះ បានបណ្តាលឲ្យរងរបួសធ្ងន់ និងស្រាល។ លោកស្នងការ បានបញ្ជាក់ទៀតថា ក្រោយកើតហេតុកម្លាំងនគរបាលរបស់លោក បានចុះទៅជួយអន្តរាគមន៏ភ្លាមៗ ដោយដឹកជនរងគ្រោះ ទៅកាន់មន្ទីរពេទ្យ ដើម្បីជួយសង្គ្រោះ៕

ផ្តល់សិទ្ធដោយ ដើមអម្ពិល