ក្មេងប្រុសម្នាក់លោតទម្លាក់ខ្លួនពីលើសត្វ គោបាខ្ទាំសាច់ភ្លៅត្រូវពេទ្យ វះកាត់យកខ្ទុះចេញ ជិត១ចានគោម

ក្មេងប្រុសម្នាក់លោតទម្លាក់ខ្លួនពីលើសត្វ គោបាខ្ទាំសាច់ភ្លៅត្រូវពេទ្យ វះកាត់យកខ្ទុះចេញ ជិត១ចានគោម

ខេត្តប៉ៃលិន ៖ ក្មេងប្រុសម្នាក់ បន្ទាប់ពីលោតទម្លាក់ខ្លួនពីលើគោបាមួយក្បាល កាលពីជាងកន្លះ ខែមុនបណ្តាលឱ្យខ្ទាំភ្លៅខាងឆ្វេងហើម ឈឺចុកចាប់ រហូតទ្រាំមិនបានត្រូវ ឪពុកម្តាយបញ្ជូនទៅព្យាបាល នៅមន្ទីរពេទ្យបង្អែកខេត្ត កាលពី ថ្ងៃទី២១ កញ្ញា មកដល់វេលាម៉ោង ១០ និង៣០នាទីព្រឹក ថ្ងៃទី២៤ កញ្ញា ២០១៥នេះ ត្រូវលោក វេជ្ជបណ្ឌិតធ្វើការវះកាត់យកខ្ទុះចេញ បូមបានរហូតដល់ ជិត១ចានគោម ឯណោះ ។

ប្រភពព័ត៌មានបានឱ្យដឹងថា ក្មេងប្រុសដែលត្រូវវះកាត់ ឈ្មោះ ឌី សំណាង អាយុ១៣ឆ្នាំ ជាសិស្សរៀន ថ្នាក់ទី៤នៃសាលាបឋមសិក្សា ភ្នំស្ពុង មានឪពុក ឈ្មោះ បូ ចាន់ឌី អាយុ៣៥ឆ្នាំ ម្តាយឈ្មោះ អ៊ុក ឈៀប អាយុ៣៦ឆ្នាំ ជាកសិករ រស់នៅភូមិ ភ្នំស្ពុង ឃុំសាលាក្រៅ ស្រុកសាលាក្រៅ ។

សូមបញ្ជាក់ថា ក្មេងប្រុសរងគ្រោះបានលោតទម្លាក់ពីលើគោបាកាលពីវេលាម៉ោង៤ និង៣០នាទីរសៀលថ្ងៃទី១៣ កញ្ញា ខណៈជិះពី ឃ្វាលនៅឯវាល លុះដល់មុខផ្ទះក៏លោត បណ្តាលឱ្យខ្ទាំជើង ឆ្វេងរបួសតែម្តង ។

ប្រភពព័ត៌មានពីស្ត្រី ឈ្មោះ អ៊ុក ឈៀប បានរៀបរាប់ឱ្យដឹងថា គាត់មានគោញី និងឈ្មោល ចំនួន៥ក្បាល ដោយរៀងរាល់ថ្ងៃ តែងតែឱ្យកូនដេញទៅ ឃ្វាលក្បែរផ្ទះតាំងពីព្រឹក រហូតដល់ល្ងាចទើប ត្រឡប់មកវិញ មានវេចបាយទៅហូបនៅទីនោះ ផងដែរ ។

គាត់បន្តទៀតថា នៅល្ងាចថ្ងៃកើតហេតុ កូនគាត់ត្រឡប់មកពីឃ្វាលហ្វូងគោវិញ ដោយជិះពី លើគោបាមួយក្បាលយ៉ាងធំ លុះពេលមកដល់ ផ្ទះកូនប្រុសគាត់ មិនចុះតាមធម្មតាទេ គឺលោតទម្លាក់ ជើងមកមុន ពេលមួយសន្ទុះក្រោយមកស្រាប់តែ ឈឺចុកចាប់ជើង ខាងឆ្វេង ហើយនៅពេល ដេកយប់ មានការឈឺចុកចាប់ យ៉ាងខ្លាំងរហូតដល់ពេលព្រឹកថ្ងៃបន្ទាប់មក ទៀតនៅតែមិនបាត់ឈឺ ទោះបីផឹកថ្នាំបំបាត់ការ ឈឺចុកចាប់ យ៉ាងណាក៏ដោយ ។

គាត់បញ្ជាក់ទៀតថា រហូតមកដល់ថ្ងៃទី២០ កញ្ញានេះ ដោយសារតែកូនគាត់ដើរ ទៅឃ្វាលហ្វូង គោចេះតែពោលប្រាប់ថា ឈឺហួលភ្លៅខាង ឆ្វេងខ្លាំងទ្រាំមិនបាន ទើបគាត់ប្រាប់ប្តីឱ្យ ដឹកតាមម៉ូតូមក សម្រាកព្យាបាល នៅមន្ទីរពេទ្យបង្អែកខេត្ត ហើយឱ្យគ្រូពេទ្យ ចាក់ថ្នាំព្យួរសេរ៉ូម យ៉ាងណាក៏មិនបាត់ ទើបនៅព្រឹកថ្ងៃទី២៤ នេះ សម្រេចធ្វើការវះកាត់យកខ្ទុះ ចេញតែម្តង ដោយគ្រូពេទ្យប្រាប់ថា ឈាមកកក្លាយទៅ ជាខ្ទុះច្រើនណាស់ រហូតដល់ជិត១ចានគោមឯណោះ មានទាំងខ្ទុះស លាយខួរអណ្តែង ផងដែរ៕