ផ្ទះឈើ២ខ្នងត្រូវភ្លើងឆេះអស់ ដោយសារប្តីប្រពន្ធឈ្លោះគ្នា

ផ្ទះឈើ២ខ្នងត្រូវភ្លើងឆេះអស់ ដោយសារប្តីប្រពន្ធឈ្លោះគ្នា

រាជធានីភ្នំពេញ ៖ ផ្ទះឈើ២ខ្នងត្រូវបានអគ្គិភ័យ ឆាបឆេះអស់ទាំងស្រុង កាលពីវេលាម៉ោង ១១ និង២២នាទីយប់ ថ្ងៃទី២០ តុលា ២០១៥ ស្ថិតក្នុងភូមិដើមស្លែង សង្កាត់ច្បារអំពៅ២ ខណ្ឌច្បារអំពៅ ដោយសារតែប្តីប្រពន្ធឈ្លោះគ្នា ហើយធ្វើឱ្យរលំទៀនដែលកំពុងឆេះ ក៏បង្កជាអគ្គិភ័យនេះឡើយ ។

លោក យ៉ិន វុធ ចៅសង្កាត់ច្បារអំពៅទី២ បានឱ្យដឹងថា មុនពេលកើតហេតុគេឮប្តីប្រពន្ធ១គូដែលមានប្រពន្ធឈ្មោះ វ៉ា រ៉ានី ហៅតឿ អាយុ២៨ឆ្នាំ មុខរបរមិនពិតប្រាកដ (មិនស្គាល់ឈ្មោះប្តី) ឈ្លោះប្រកែកគ្នា បន្ទាប់មកក៏ធ្វើឱ្យរលំទៀនដែលដុតបំភ្លឺ បង្កជាអគ្គិភ័យនេះឡើង ។

ប្រភពពីប្រជាពលរដ្ឋដែលមានផ្ទះនៅជិតកន្លែងកើតហេតុបានឱ្យដឹងថា មុនពេលកើតហេតុគេឮសូរប្តីប្រពន្ធជាម្ចាស់ផ្ទះឆេះដែលមានប្រពន្ធ ឈ្មោះ តឿ បានឈ្លោះប្រកែកគ្នា មួយសន្ទុះក្រោយមកស្រាប់មានអគ្គិភ័យឆាបឆេះចេញពីផ្ទះឈើនោះ ហើយក៏រាលដាលទៅផ្ទះឈើ១ខ្នងទៀតអស់ទាំងស្រុងតែម្តង ។

ប្រភពបន្តទៀតថា ដោយសារតំបន់នេះមានផ្ទះញឹកស្អេក គ្មានផ្លូវសម្រាប់សម្រាប់ឡានទឹក អាចចូលទៅបាញ់ទឹកពន្លត់កើតនោះ ប្រជាពលរដ្ឋនៅម្ដុំនោះក៏នាំគ្នាវាយកម្ទេចផ្ទះទាំង២ខ្នងនោះ និងនាំគ្នាដងទឹកជះពន្លត់ដើម្បីកុំឱ្យឆេះរាលដាលដល់ផ្ទះដទៃទៀត ។ តែយ៉ាងណាក៏ភ្លើងបានឆេះផ្ទះឈើ២ខ្នងនេះអស់ទាំងស្រុងទៅហើយ ។

សូមបញ្ជាក់ថា ផ្ទះឈើ១ខ្នងទៀត ដែលរងគ្រោះឆេះអស់ទាំងស្រុងដែរនោះមានម្ចាស់ ឈ្មោះ កូយ ធី អាយុ៣៩ឆ្នាំ ជាស្ត្រីមេម៉ាយ មានមុខរបរជាអ្នកដើររើសអេតចាយ ព្រមទាំងមានកូន៧នាក់ក្នុងបន្ទុកទៀតផង ពិតជាគួរឱ្យអាណិតខ្លាំងណាស់ ៕