ពលរដ្ឋដេញចាប់ចោរ លួចលុយចោរ សមត្ថកិច្ចចាប់ឃុំខ្លួនជាមួយគ្នា

ពលរដ្ឋដេញចាប់ចោរ លួចលុយចោរ សមត្ថកិច្ចចាប់ឃុំខ្លួនជាមួយគ្នា

ខេត្តស្វាយរៀង ៖ នៅវេលាម៉ោង២រសៀលថ្ងៃទី២៧ តុលា ២០១៥នេះ លោកវរសេនីយ៍ទោ កែវ សុថា នាយការិយាល័យ ព្រហ្មទណ្ឌកម្រិតស្រាល នៃស្នងការដ្ឋាននគបាល ខេត្តបានឲ្យដឹងថា រឿងចោរ ៥នាក់ប្លន់ ផ្ទះដូរលុយកណ្តាលថ្ងៃត្រង់ដេញ ស្ទាក់ចាប់បានម្នាក់នោះ សមត្ថកិច្ចនគបាល ស្រុកស្វាយទាប បានបំភ្លឺថា តាមពិតចោរមានតែម្នាក់ទេបានចូល លួចលុយក្នុង ទូដូរលុយមិន មែនជាករណីប្លន់ទេ គឺជាករណីលួច ។

លោក កែវ សុថា បន្តទៀតថា កាលពីថ្ងៃទី២៥ តុលា ២០១៥ វេលាម៉ោង១២ និង៣០ថ្ងៃត្រង់ មានចោរ១ម្នាក់ ជិះម៉ូតូ១គ្រឿងចូលលួច លុយផ្ទះដូរលុយ និងលក់គ្រឿងទេស ដែលមានម្ចាស់ឈ្មោះ នុត ផល្លី ភេទស្រី អាយុ៣៤ឆ្នាំ នៅភូមិដើមពោធិ៍ ឃុំកណ្តៀងរាយ ស្រុកស្វាយទាប ដោយលួចយកលុយពីក្នុង ទូដូរលុយ អស់៣លានរៀល និងប្រាក់៧០០ដុល្លា រួចរត់ឡើងជិះ ម៉ូតូគេចខ្លួន តែត្រូវអ្នកស្រុក បានឃើញក៏នាំ គ្នាស្រែកឆោឡោ និងនាំគ្នា៤នាក់ជិះម៉ូតូដេញតាមចាប់ចោរ និងប្តឹងសមត្ថកិច្ចព័ទ្ធចាប់ បានចោរម្នាក់ និងម៉ូតូម៉ាកស្កុបពី១គ្រឿង ពាក់ស្លាកលេខ ភ្នំពេញ ១AW-៩៨៦៣ ដែលចោរជិះមក ធ្វើសកម្មភាពលួច ។ ប្រភពបន្តទៀតថា ជនសង្ស័យឈ្មោះ ដួង សីហា ភេទប្រុស អាយុ២៩ឆ្នាំ ជាកម្មករមានទីលំនៅ បច្ចុប្បន្ននៅភូមិប្រសូត្រ២ ឃុំប្រសូត្រ ស្រុកស្វាយទាប ។

លោកនាយការិយាល័យព្រហ្មទណ្ឌកម្រិតស្រាលបន្តទៀតថា ដោយមានការចង្អុលបង្ហាញ ពីលោក ឧត្តមសេនីយ៍ត្រី កឹង ឃន ស្នងការនគបាលខេត្ត ដឹកនាំផ្ទាល់ពី លោកវរសេនីយ៍ឯក កុយ សុភាព ស្នងការរង នៃស្នងការដ្ឋាននគបាលខេត្ត បានចុះសហការ ជាមួយកម្លាំងអធិការដ្ឋាន នគបាលស្រុកស្វាយទាប ធ្វើការស្រាវជ្រាវ រកឃើញថា ការពិតចោរលួច មិនមែនជា ករណីចោរប្លន់ទេ ។ ចំណែកមនុស្ស ៤នាក់ទៀតគឺជា ប្រជាពលរដ្ឋដែលជាអ្នកដេញចាប់ចោរ ហើយពេលដេញទាន់ ចោរភ័យផ្តួលម៉ូតូរត់ ចូលព្រៃ ពលរដ្ឋ៣នាក់ ដេញតាមចោរ រីឯម្នាក់ឈ្មោះ កាន់ ប៊ុនធឿន ភេទប្រុស អាយុ៣៦ឆ្នាំ នៅភូមិដើមពោធិ៍ ឃុំស្វាយតាយាន ស្រុកកំពង់រោទិ៍ មិនបានរត់ដេញ តាមចាប់ចោរទេ គឺបានចូលទៅកន្លែង ម៉ូតូចោរហើយឃើញ លុយចោរលួចបាន ដាក់នៅក្នុង ប្រអប់ម៉ូតូក៏យក ដាក់ក្នុងកែបម៉ូតូរបស់ខ្លួន មិនបានប្រគល់លុយ ឲ្យសមត្ថកិច្ចទេ គឺប្រគល់ឲ្យ សមត្ថកិច្ចតែចោរ និងម៉ូតូ ។ ហើយនៅ វេលាម៉ោង៣រសៀល ឈ្មោះ កាន់ ប៊ុនធឿន បានយកលុយទៅ ទិញមាស៣ជីក្នុង ១ជីតម្លៃ ១៤០ដុល្លារ ស្មើ៤២០ដុល្លារ និងឈ្នួល១០ដុល្លារ សរុប៤៣០ដុល្លារ ។

លោកវរសេនីយ៍ទោ កែវ សុថា បន្តទៀតថា ការឈានដល់ចាប់ខ្លួនឈ្មោះ កាន់ ប៊ុនធឿន នេះគឺក្រោយ ពីសួរចម្លើយជន សង្ស័យឈ្មោះ ដួង សីហា បានឲ្យដឹងថា រូបគេលួយលុយបាន ដាក់ក្នុងប្រអប់ ម៉ូតូស្កុបពី ដែលខ្លួនជិះធ្វើសកម្មភាព តែមិនដឹងចំនួនប៉ុន្មានទេ ទើបសមត្ថកិច្ចជំនាញ ស្រាវជ្រាវ និងហៅពលរដ្ឋ ៤នាក់ដែល ដេញចាប់ចោរមក សាកសួរថា ក្នុងចំណាម៤នាក់នរណា ជាអ្នកទៅដល់ម៉ូតូមុនគេ ទើបដឹងថាឈ្មោះ កាន់ ប៊ុនធឿន ទៅដល់ម៉ូតូមុន ទើបឃាត់ខ្លួនមក សាកសួរ ជនសង្ស័យក៏ បានសារភាពថា ខ្លួនពិតជាបានលួច លុយបន្តពីចោរប្រាកដមែន និងរឹបអូសបានប្រា ក់ដុល្លារចំនួន៣០០ដុល្លារ ប្រាក់ខ្មែរ ៧សែនរៀល និងខ្សែកមាសទម្ងន់៣ជី ។ ដូច្នេះជនសង្ស័យឈ្មោះ កាន់ ប៊ុនធឿន ជាប់ចោទពីបទលួច ដែលមានស្ថានទម្ងន់ទោស តាមមាត្រា៣៥៦ នៃច្បាប់ក្រមព្រហ្មទណ្ឌ និងពីបទលប់បាត់វត្ថុតាង ដែលមានស្ថានទម្ងន់ទោស តាមមាត្រា៥៣៣ នៃច្បាប់ក្រមព្រហ្មទណ្ឌ ត្រូវជាប់ពន្ធនាគារ ចាប់ពី១ឆ្នាំទៅ៣ឆ្នាំ ។ ឯជនសង្ស័យឈ្មោះ ដួង សីហា ដែលលួច ដំបូងជាប់ចោទពីបទលួចដែលមានស្ថានទម្ងន់ទោស តាមមត្រា៣៥៦ត្រូវជាប់ ពន្ធនាគារពី៦ខែ ទៅ៣ឆ្នាំ ។

ជនសង្ស័យទាំង២នាក់ ត្រូវបានកម្លាំងជំនាញកសាងសំណុំរឿង និងវត្ថុតាងបញ្ជូនទៅ សាលាដំបូង ខេត្តនៅវេលាម៉ោង៣រសៀល ថ្ងៃទី២៧ តុលា ២០១៥ និងចេញដីការឃុំខ្លួនបណ្តោះអាសន្ននៅ ពន្ធនាគារខេត្ត កាលពីវេលាម៉ោង៥ល្ងាចថ្ងៃដដែល ៕