ជិះម៉ូតូមកគប់រថយន្តគេបែកកញ្ចក់ ម្ចាស់ដេញតាមកៀរដួលម៉ូតូ ពលរដ្ឋស្មានថាចោរចាប់វាយទ្រមខ្លួន

ជិះម៉ូតូមកគប់រថយន្តគេបែកកញ្ចក់ ម្ចាស់ដេញតាមកៀរដួលម៉ូតូ ពលរដ្ឋស្មានថាចោរចាប់វាយទ្រមខ្លួន

រាជធានីភ្នំពេញ ៖ បុរស២នាក់ត្រូវបានប្រជាពលរដ្ឋចាប់បានវាយឡើងទ្រមខ្លួនដោយស្មាន ថាជាចោរ បន្ទាប់ពីបានជិះម៉ូតូម៉ាក TTX មួយគ្រឿងយកដុំថ្មគប់រថយន្តម៉ាកកាមរីហាយប្រ៊ិជ១គ្រឿងបែក កញ្ចក់នៅចំណុចជិតភោជនីយដ្ឋានហ្សង់អេលីហ្សេ ហើយត្រូវម្ចាស់រថយន្តបើកដេញតាមកៀរដួលនៅចំណុចម្តុំមុខ ភោជនីយដ្ឋានប៉ោកី ស្ថិតនៅតាមបណ្ដោយមហាវិថីព្រះមុនីវង្ស កែងផ្លូវលេខ២៨៨ កាលពីវេលាម៉ោងប្រមាណ១០និង៤៥នាទីយប់ ថ្ងៃទី៩ វិច្ឆិកា ២០១៥ ។

ប្រភពពីសមត្ថកិច្ចបានឲ្យដឹងថា បុរសទាំង២នាក់ដែលត្រូវប្រជាពលរដ្ឋចាប់វាយឡើងទ្រមស្មានថាជាចោរ នេះនៅមិនទាន់ត្រូវបានស្គាល់អត្តសញ្ញាណនៅឡើយទេ ព្រោះសមត្ថកិច្ចកំពុងធ្វើការសាកសួរនៅឡើយ ដោយបុរសទាំង២នាក់ជិះម៉ូតូ១គ្រឿងម៉ាក TTX ពណ៌ខ្មៅ ពាក់ស្លាកលេខ ភ្នំពេញ 1BY-0455 ។

ប្រភពពីម្ចាស់រថយន្តដែលដេញតាមកៀរម៉ូតូរបស់បុរសទាំង២នាក់ ខាងលើបានឲ្យដឹងថា មុនពេលកើតហេតុម៉ោងប្រមាណជាជាង៩យប់ នៅម្តុំនាគបាញ់ទឹក មានរថយន្តឡង់គ្រីស័រ ៤៥០ ពណ៌ខ្មៅ ពាក់ស្លាកលេខ បាត់ដំបង 2A-3790 មួយគ្រឿងបានបើកមកប៉ះគូទរបស់រថយន្តរបស់គាត់ម៉ាកកាមរី ហាយប្រ៊ិជ ពណ៌ស ពាក់ស្លាកលេខ ភ្នំពេញ 2V-7791 ហើយគាត់ក៏ទារឲ្យជួយចេញថ្លៃខូចចំនួន១០០ដុល្លារ តែអ្នកបើកបរថាអត់មានលុយគ្រប់ទេ ដោយគាត់បានទូរស័ព្ទហៅគ្នីគ្នារបស់គាត់យកលុយមកឲ្យ ។ បន្ទាប់មកមានបុរស២នាក់ជិះម៉ូតូ១គ្រឿងម៉ាក TTX ពណ៌ខ្មៅ ពាក់ស្លាកលេខ ភ្នំពេញ 1BY-0455 បានមកដល់ហើយក៏បានសម្រួលគ្នាសងប្រាក់បញ្ចប់រឿងទៅ ។

ប្រភពដដែលបានបន្តទៀតថា បន្តពីបានទទួលការសងថ្លៃខូចខាតហើយគាត់(ម្ចាស់រថយន្តកាមរីហាយ ប្រ៊ិជ)ក៏បានបើករថយន្តមកអែបខាងតាមបណ្ដោយផ្លូវលេខ២៩៤ ម្តុំមុខភោជនីយដ្ឋានហ្សង់អេលីហ្សេ ក៏ត្រូវជន២នាក់ដែលជិះម៉ូតូម៉ាក TTX ខាងលើជិះមកដល់ហើយយកដុំថ្មគប់រថយន្តរបស់គាត់បណ្ដាលឲ្យបែក កញ្ចក់ គាត់ក៏បើករថយន្តដេញតាមរហូតដល់ចំណុចកើតហេតុខាងលើ ហើយបានកៀរម៉ូតូដួល ខណៈនោះបុរស២នាក់ក៏រត់គេចខ្លួនត្រូវបានប្រជាពលរដ្ឋនៅម្តុំនៅ ចាប់បាន ហើយស្មានថាចោរក៏នាំគ្នាវាយម្នាក់មួយដៃម្នាក់មួយជើងឡើងទ្រម ខ្លួនតែម្តងទៅ ។

ក្រោយពេលកើតហេតុ បុរសទាំង២នាក់ និងដែលជាប់ចោទគប់រថយន្តគេនេះ ត្រូវបានសមត្ថកិច្ចនាំខ្លួនទៅធ្វើការសាកសួរនៅប៉ុស្តិ៍នគរបាល រដ្ឋបាលបឹងកេងកង២ ដើម្បីធ្វើការដោះស្រាយតាមច្បាប់ ៕