លោក អៀង ស៊ីធុល ធ្លាក់ពីលើជណ្តើរ របួសជើងមិនអាចដើរបាន

លោក អៀង ស៊ីធុល ធ្លាក់ពីលើជណ្តើរ របួសជើងមិនអាចដើរបាន

រាជធានីភ្នំពេញ ៖ ព្រឹទ្ធាចារ្យសិល្បៈ បុរាណខ្មែរលោក អៀង ស៊ីធុល បានជួបឧប្បទ្ទវហេតុ រអិលធ្លាក់ពីជណ្តើរ ខណៈពេលលោក ឡើងទៅពិនិត្យដំបូលផ្ទះរបស់លោក បណ្តាលឱ្យរបួសជើងមិន អាចដើរ ឬអង្គុយបានឡើយ។

ដំណឹងអំពីគ្រោះថ្នាក់ របស់ព្រឹទ្ធាចារ្យសិល្បៈបុរាណរូបនេះត្រូវ បានផ្សព្វផ្សាយតាមបណ្តាញសង្គមហ្វេសប៊ុកពីសំណាក់លោក សុះ ម៉ាច ប្រធានសមាគមសិល្បករខ្មែរ។

បើតាមលោក សុះ ម៉ាច បានឱ្យដឹងថា លោកអៀង ស៊ីធុល ព្រឹទ្ធាចារ្យសិល្បៈបុរាណ និងជាអតីតប្រធានសមាគមសិល្បករខ្មែរ ពេលនេះមានទុក្ខលំបាកជាទម្ងន់ ពុំអាចដើរ ឬអង្គុយបាន និងមានអការចុកចាប់ ដោយលោកក្រោយពីគ្រោះថ្នាក់ចរាចរ ដោយសារម៉ូតូបុក ឥឡូវត្រូវគ្រោះថ្នាក់ចៃដន្យ ធ្លាក់ពីលើជណ្តើរទៀត។

លោកបញ្ជាក់ថា តាមរយៈការពិនិត្យរបួសលោក អៀង ស៊ីធុល អាចនឹងសម្រាកព្យាបាលរយៈពេល២ខែ ទើបអាចវិលមកកាន់សភាពដើមវិញ។ ក្នុងនាមប្រធានសមាគម សិល្បករខ្មែរលោក សុះ ម៉ាច នៅថ្ងៃច័ន្ទ ទី២១ខាងមុខនេះ លោកនឹងដឹកនាំក្រុមប្រឹក្សា ទៅសួរសុខទុក្ខលោក អៀង សីធុល ដោយផ្ទាល់ ដោយសារកន្លងមកលោកមានគុណបំណាច់ ធ្លាប់យកអំណោយជួយដល់អ្នកសិល្បៈ ក្រលំបាកឈឺថ្កាត់របួស ពិការ ស្លាប់ អំឡុងពេលលោកនៅកាន់ជាប្រធានសមាគមសិល្បករខ្មែរ៕