ឃាត់ខ្លួនជនសង្ស័យ២នាក់ ពាក់ព័ន្ធករណីលួចឡាន ក្នុងមន្ទីរបរិស្ថាន ខេត្តមណ្ឌលគិរី

ឃាត់ខ្លួនជនសង្ស័យ២នាក់ ពាក់ព័ន្ធករណីលួចឡាន ក្នុងមន្ទីរបរិស្ថាន ខេត្តមណ្ឌលគិរី

ខេត្តមណ្ឌលគិរី ៖ ជនសង្ស័យ២នាក់ ក្នុងករណីលួចរថយន្ត នៅក្នុងមន្ទីរបរិស្ថាន ខេត្តមណ្ឌលគិរី ត្រូវបានកម្លាំងនគរបាលខេត្តមណ្ឌលគិរី ធ្វើការឃាត់ខ្លួនបានហើយ កាលពីល្ងាចថ្ងៃទី១៦ ធ្នូ ២០១៥ ក្នុងក្រុងសែនមនោរម្យ ។

លោក តូច យ៉ុន ស្នងការនគរបាល ខេត្តមណ្ឌលគិរី បានប្រាប់ឲ្យដឹងថា បន្ទាប់ពីមានសេចក្តីរាយការណ៍ ពីខាងមន្ទីរបរិស្ថានខេត្ត ថាមានករណី ក្រុមចោរចូលលួចរថយន្ត១គ្រឿង ម៉ាកកាមររី គូទស្វិត កាលពីថ្ងៃទី១៣ ធ្នូ ២០១៥ ភ្លាមនោះលោកបាន ចាត់ចែងកម្លាំងនគរបាលខេត្ត-ក្រុងធ្វើការស្រាវជ្រាវ ដើម្បីវែកមុខរកមុខសញ្ញាភ្លាមៗ រហូតដល់ថ្ងៃទី១៦ធ្នូម្សិលមិញនេះ សមត្ថកិច្ចក៏បានធ្វើការ ឃាត់ខ្លួនបានជនសង្ស័យ២នាក់ នៅក្នុងក្រុងសែនមនោរម្យ ខេត្តមណ្ឌលគិរី និងធ្វើការបញ្ជូនជនសង្ស័យទាំង២នាក់ ទៅកាន់ការិយាល័យព្រហ្មទណ្ឌ កម្រិតស្រាលខេត្ត ដើម្បីធ្វើការសាកសួរ ។

លោកវរសេនីយ៍ឯក ស៊ុម សោភ័ណ នាយការិយាល័យ ព្រហ្មទណ្ឌកម្រិតស្រាល នៃស្នងការដ្ឋាននគរបាលខេត្ត បានប្រាប់ឲ្យដឹងថា ជនសង្ស័យ២នាក់ ក្នុងករណីចូលលួចរថយន្ត នៅក្នុងមន្ទីរបរិស្ថានខេត្ត ដែលសមត្ថកិច្ចធ្វើការឃាត់ខ្លួននោះមានឈ្មោះ កែវ សុវណ្ណារា ភេទប្រុស អាយុ២៥ឆ្នាំ ជនជាតិខ្មែរ មានទីលំនៅភូមិដោះក្រមុំ សង្កាត់សុខដុម ក្រុងសែនមនោរម្យ ខេត្តមណ្ឌលគិរី និងម្នាក់ទៀតឈ្មោះ យន់ សុធា ភេទប្រុស អាយុ២៩ឆ្នាំ ជនជាតិខ្មែរ បច្ចុប្បន្នរស់នៅ ភូមិឃុំជាមួយគ្នា ។

តាមចំលើយជនសង្ស័យឈ្មោះ កែវ សុវណ្ណារា បានសារភាពថា បានជាខ្លួនចូលលួចរថយន្តនេះ ព្រោះឈ្មោះ យន់ សុធា បានសន្យាឱ្យប្រាក់គេ ចំនួន៥០០ដុល្លារ ចំណែកជនសង្ស័យឈ្មោះ យន់ សុធា បានឆ្លើយថាអត់បានស្គាល់ជនសង្ស័យឈ្មោះ កែវ សុវណ្ណារា ទេ ។

តែទោះបីជាយ៉ាងណា លោកនាយការិយាល័យ ព្រហ្មទណ្ឌកម្រិតស្រាល បាននិងកំពុងសាកសួរបន្ត ព្រមទាំងបានរៀបចំសំណុំរឿង បញ្ជូនទៅកាន់សាលាដំបូង ដើម្បីចាត់ការតាម និតិវិធីច្បាប់ ៕