ប្រពន្ធចាស់ចោទប្ដី ក្មេងថាជិះម៉ូតូទៅដឹកស្រី បង្កជាជម្លោះ វាយតប់គ្នាផ្អើលពេញផ្លូវ

ប្រពន្ធចាស់ចោទប្ដី ក្មេងថាជិះម៉ូតូទៅដឹកស្រី បង្កជាជម្លោះ វាយតប់គ្នាផ្អើលពេញផ្លូវ

រាជធានីភ្នំពេញ ៖ ប្តីប្រពន្ធមួយគូ ដែលមានវ័យខុសគ្នា គឺប្ដីក្មេងជាងប្រពន្ធ បានឈ្លោះប្រកែកគ្នាយ៉ាងខ្លាំង រហូតឈានដល់ ការវាយតប់គ្នាថែមទៀត ហើយស្ត្រីជាប្រពន្ធបានប្រវាយប្រតប់ ដណ្ដើមយកម៉ូតូ ពីបុរសជាប្ដី ដោយបានចោទប្រកាន់ប្ដីថា ឆ្លៀតពេលដែលនាងរវល់ ប្ដីបានលួចយកម៉ូតូជិះចេញពីផ្ទះក្នុងបំណង ទៅដឹកស្រីស្នេហ៍ ចូលក្រេបទឹកឃ្មុំនៅផ្ទះសំណាក់ ប៉ុន្តែនាងបានដឹងទាន់ ក៏បានតាមហៅប្ដីឲ្យត្រឡប់មកផ្ទះវិញ ប៉ុន្តែប្ដីមិនព្រមមកតាម ទើបនាងជិះម៉ូតូឌុបតាម រហូតដល់ចំណុចភ្លើងស្តុប ហើយមានជម្លោះកើតឡើងជាមួយគ្នាតែម្តង ។

ហេតុការណ៍នេះ បង្កឲ្យមានការភ្ញាក់ផ្អើល កាលពីវេលាម៉ោង១ និង១០នាទីរសៀល ថ្ងៃទី២៩ ខែធ្នូ ឆ្នាំ២០១៥ នៅចំណុចភ្លើងស្តុប តាមបណ្តោយ មហាវិថីសហព័ន្ធរុស្សី កែងផ្លូវ២០០៤ ស្ថិតក្នុងភូមិតាងួន សង្កាត់កាកាប ខណ្ឌពោធិ៍សែនជ័យ រាជធានីភ្នំពេញ ។

ប្ដីប្រពន្ធមួយគូនេះ មិនបានប្រាប់ពីអត្តសញ្ញាណរបស់ពួកគាត់ឡើយ សូម្បីប៉ូលិសសួរក៏មិនប្រាប់ដែរ គឺពួកគាត់បានលាក់លៀមឈ្មោះតែម្ដង ដែលតាមមើលទៅប្ដី មានអាយុប្រហែល៣០ឆ្នាំ ចំណែកប្រពន្ធមានអាយុប្រហែល៤០ឆ្នាំ ។

ស្ត្រីជាប្រពន្ធ បានរៀបរាប់ប្រាប់សមត្ថកិច្ចនៅ ប៉ុស្តិ៍នគរបាល សង្កាត់កាកាបថា ប្តីរបស់គាត់ខិលខូចណាស់ ល្មោភស្រីណាស់ មួយថ្ងៃៗមិនគិតជួយការងាររកស៊ីអ្វីឡើយ គិតតែពីដើរញ៉ែស្រី ទាក់ស្រី មិនតែប៉ុណ្ណោះមានពេលមួយនោះ គ្មានលុយមួយរៀលទេ បាននាំស្រីទៅដេកនៅផ្ទះសំណាក់ គ្មានលុយឱ្យស្រី និងថ្លៃផ្ទះសំណាក់ គាត់បានចេញលុយឲ្យថែមទៀតផង ។ ការធ្វើបែបនេះ គឺបានទុកមុខឲ្យប្ដីមិនចង់ឲ្យប្ដីបាក់មុខខ្មាស់គេ ហើយគាត់តែងតែបានលួងលោមប្ដីឲ្យកែខ្លួន តែគាត់មិនព្រមកែទាល់តែសោះ ជាងនេះទៅទៀតធ្លាប់បានលក់ ម៉ូតូម៉ាក ហុងដា ឌ្រីម សេ១២៥ ស៊េរីឆ្នាំ២០១៤ មួយគ្រឿង យកលុយទៅដើរលេងស៊ីចាយអស់ទៀតផង ។

ស្ត្រីរូបនោះបានបន្តថា ដោយឡែកនៅថ្ងៃកើតហេតុ ខណៈពេលដែលគាត់កំពុងជាប់រវល់ការងារ ប្ដីបានលួចយកម៉ូតូ ម៉ាកហុងដា អាយខុន ពណ៌ខ្មៅលាយផ្កាឈូក១គ្រឿង ពាក់ស្លាកលេខ ព្រះសីហនុ 1C-3200 ដោយសារកន្លងមកប្ដីក្មេងធ្លាប់ខូចបែបនេះ ទើបក្រោយពីបានដឹងថា ប្ដីជិះម៉ូតូចេញពីផ្ទះ គាត់បានជិះម៉ូតូឌុបតាមក្នុងបំណងឲ្យត្រឡប់ទៅផ្ទះវិញ តែប្ដីមិនព្រមទៅ ទើបពេលតាមទាន់ ឈានដល់ការឈ្លោះប្រកែកគ្នា បែបនេះតែម្ដង ។ ចំណែកបុរសជាប្ដីវិញ បានបដិសេធរាល់អ្វីដែលប្រព្ធបានចោទប្រកាន់ទាំងអស់ ដោយគាត់និយាយថា ប្រពន្ធគាត់ចេះតែនិយាយបង្ខូចគាត់ប៉ុណ្ណោះ ។

ក្រោយពេលកើតហេតុ សមត្ថកិច្ចបានហៅប្តីប្រពន្ធមួយគូនេះ ទៅកាន់ប៉ុស្តិ៍កាកាប ហើយបានណែនាំ និងសម្រុះសម្រួល មួយសន្ទុះទើបត្រូវរ៉ូវគ្នាវិញ រួចហើយនាងជាប្រពន្ធ បានជិះម៉ូតូដឹកប្ដីត្រឡប់ទៅផ្ទះនៅឯ ខេត្តកំពង់ស្ពឺវិញ ប៉ុន្តែមិនមាននរណាបានដឹងថា ថ្ងៃក្រោយមានអ្វីកើតឡើងទៀតនោះឡើយ ៕