បង្ក្រាបគ្រឿងញៀន នៅក្រុងសួង ចាប់ខ្លួន៤នាក់ ដកហូតបានថ្នាំញៀន១៧កញ្ចប់

បង្ក្រាបគ្រឿងញៀន នៅក្រុងសួង ចាប់ខ្លួន៤នាក់ ដកហូតបានថ្នាំញៀន១៧កញ្ចប់

ខេត្តត្បូងឃ្មុំ ៖ មុខសញ្ញាជួញដូរ និងចែកចាយគ្រឿងញៀន ដ៏សកម្មម្នាក់ នៅទឹកដីត្រើយខាងកើត ទន្លេមេគង្គ ត្រូវបានសមត្ថកិច្ចចាប់ខ្លួន កាលពីវេលាម៉ោង៥ និង៤៥នាទីល្ងាច ថ្ងៃទី២៨ ធ្នូ ២០១៥ នៅភូមិសួងលិច សង្កាត់សួង ក្រុងសួង និងឈានទៅចាប់ខ្លួន បក្ខពួក៣នាក់ផ្សេងទៀត ព្រមទាំងដកហូតបានគ្រឿងញៀន សរុបទាំងអស់ចំនួន១៧កញ្ចប់ ។

លោកវរសេនីយ៍ទោ ឈន សុធន់ អធិការនគរបាល ក្រុងសួង បានឲ្យដឹងថា ជនសង្ស័យដែលត្រូវសមត្ថកិច្ចចាប់ខ្លួនមានឈ្មោះ គឹម ភក្តិ ភេទប្រុស អាយុ២៩ឆ្នាំ នៅភូមិសួងលិច សង្កាត់សួង ក្រុងសួង ។ ខណៈពេលចាប់ខ្លួន សមត្ថកិច្ចដកហូតបាន ថ្នាំញៀន៧កញ្ចប់ ហើយតាមរយៈការឆ្លើយសារភាពរបស់ជនសង្ស័យ សមត្ថកិច្ចឈានទៅចាប់ បក្ខពួកបាន៣នាក់ទៀត មាន ១-ឈ្មោះ សម្បត្តិ វ៉ាន់ដា ភេទប្រុស អាយុ២២ឆ្នាំ នៅភូមិជ្រៃបិទមាស សង្កាត់សួង ក្រុងសួង ជាមុខសញ្ញាទើបចេញពីពន្ធនាគារ, ២-ឈ្មោះ ធឿន ស្រីនី ភេទស្រី អាយុ២១ឆ្នាំ នៅភូមិមេម៉ាយ សង្កាត់បឹងកុក ក្រុងកំពង់ចាម ខេត្តកំពង់ចាម និង ៣-ឈ្មោះ ស្រ៊ុន ប៊ុនម៉េង ភេទប្រុស អាយុ២៣ឆ្នាំ នៅភូមិសួងលិច សង្កាត់សួង ក្រុងសួង ព្រមទាំងដកហូតបាន ថ្នាំញៀនចំនួន១០កញ្ចប់ទៀត ។

លោកអធិការនគរបាល ក្រុងសួង បានឲ្យដឹងទៀតថា ក្រោយពីសមត្ថកិច្ចរបស់លោក បានតាមដានជាច្រើនថ្ងៃ ទើបដឹងថា ជនសង្ស័យឈ្មោះ ភក្តិ បានធ្វើសកម្មភាពជួញដូរ និងចែកចាយគ្រឿងញៀន នៅក្នុងភូមិសួងលិច សង្កាត់សួង ព្រមទាំងបានហៅបក្ខពួក មកសេពគ្រឿងញៀនក្នុងផ្ទះរប់សខ្លួនថែមទៀត ។ រហូតមកដល់ល្ងាចថ្ងៃទី២៨ ធ្នូ ដឹងថាជនសង្ស័យរូបនេះ កំពុងតែស្ថិតនៅផ្ទះរបស់ខ្លួន សង្ស័យនាំគ្នាសេពគ្រឿងញៀន រូបលោកបានសុំគោលការណ៍ ពីលោកស្នងការនគរបាលខេត្ត ដើម្បីមានវិធានការចុះទៅបង្ក្រាបជាបន្ទាន់ ដោយបានសុំការអនុញ្ញាតពីលោកព្រះរាជអាជ្ញា អមសាលាដំបូងខេត្តផងដែរ ។ ក្រុមជនសង្ស័យគ្រាន់តែឃើញ កម្លាំងនគរបាលទៅពីចម្ងាយ អ្នកមើលផ្លូវបានប្រាប់បក្ខពួក ប្រញាប់នាំគ្នារត់គេចខ្លួន អស់៦ នាក់ ដោយចាប់បានតែឈ្មោះ គឹម ភក្តិ ស្ថិតនៅក្នុងផ្ទះតៀមសាងសង់ពីឈើ ព្រមទាំងដកហូតបាន ថ្នាំញៀន៧កញ្ចប់ ថង់វេចខ្ចប់មួយចំនួន ដបទឹកបរិសុទ្ធ ដែលច្នៃសម្រាប់ជក់គ្រឿងញៀន ដែកកេះ៤ ទូរស័ព្ទដៃសាំងសុង១គ្រឿង និងដាវសាមូរ៉ៃ៣ដើម ។

លោកវរសេនីយ៍ទោ ឈន សុធន់ បញ្ជាក់ថា រហូតមកដល់ ព្រឹកថ្ងៃទី២៩ធ្នូនេះ ជនសង្ស័យរូបនេះបានឆ្លើយសារភាព រូបលោកបានសុំគោលការណ៍ ពីលោកឧត្តមសេនីយ៍ត្រី ម៉ៅ ពៅ ស្នងការនគរបាលខេត្ត លុះនៅវេលាម៉ោងជិត១រសៀល ក៏បានធ្វើការឆែកឆេរដោយចាប់បាន ជនសង្ស័យ៣នាក់ទៀត ត្រង់ចំណុចផ្ទះជួលមួយកន្លែងនៅភូមិវិហារខ្ពស់ សង្កាត់សួង ក្រុងសូង ព្រមទាំងដកហូតបានថ្នាំញៀនចំនួន១០កញ្ចប់ ដែកកេះ៥ ព្រមទាំងថង់វេចខ្ចប់មួយចំនួន ។

ក្រោយពេលចាប់ខ្លួន ជនសង្ស័យទាំង៤នាក់ និងវត្ថុតាង ត្រូវបានសមត្ថកិច្ចជំនាញកសាងសំណុំរឿង បញ្ជូនទៅសាលាដំបូងខេត្ត ដើម្បីចាត់ការតាមនីតិវិធីច្បាប់ ៕