ឃាត់ខ្លួនជនជាតិវៀតណាម១៨នាក់ រស់នៅ និងធ្វើការខុសច្បាប់នៅ សង្កាត់បឹងទំពុន

ឃាត់ខ្លួនជនជាតិវៀតណាម១៨នាក់ រស់នៅ និងធ្វើការខុសច្បាប់នៅ សង្កាត់បឹងទំពុន

រាជធានីភ្នំពេញ ៖ ជនជាតិវៀតណាមប្រុស-ស្រី១៨នាក់ដែលរស់នៅ និងធ្វើការដោយខុសច្បាប់ ត្រូវបានសមត្ថកិច្ចឃាត់ខ្លួនដើម្បី រៀបចំសំណុំឯកសារ បណ្ដេញចេញពី ប្រទេសកម្ពុជា ។ ហេតុការណ៍ឃាត់ខ្លួន ជនជាតិវៀតណាមនេះធ្វើឡើងកាលពីរសៀលថ្ងៃទី២៧ ខែមករា ឆ្នាំ២០១៦ នៅចំណុចទីតាំង កែច្នៃឈើ៣កន្លែង នៅតាមបណ្ដោយផ្លូវប្រឡាយទឹកស្អុយ ស្ថិតក្នុងសង្កាត់បឹងទំពុន ខណ្ឌមានជ័យ ។

ប្រតិបត្តិការខាងលើនេះដឹកនាំដោយលោកឧត្តមសេនីយ៍ទោ អ៊ុក ហៃសីឡា ប្រធាននាយកដ្ឋាន ស៊ើបអង្គេត និងអនុវត្តនីតិវិធី និងចូលរួមសម្រប សម្រួលពីព្រះរាជអាជ្ញាររងអម សាលាដំបូងរាជធានីភ្នំពេញ លោក មាស ច័ន្ទពិសិដ្ឋ ។

លោកឧត្តមសេនីយ៍ទោ អ៊ុក ហៃសីឡា បានឲ្យដឹងថា ជនជាតិវៀតណាម១៨នាក់ ក្នុងនោះមានស្រី២នាក់ ត្រូវបានសមត្ថកិច្ចរកឃើញ ថារស់នៅ និងធ្វើការងារដោយខុសច្បាប់ ព្រមទាំង គ្មានលិខិតឆ្លងដែន និងឯកសារពាក់ព័ន្ធអ្វីទាំងអស់ ។

លោកបន្តថា ក្រោយពេលឃាត់ខ្លួន ជនជាតិវៀតណាមទាំងនោះត្រូវបានបញ្ជូនទៅអគ្គនាយកដ្ឋាន អន្តោប្រវេសន៍រង់ចាំចាត់ការ តាមផ្លូវច្បាប់នៅ ពេលក្រោយ ។

លោកឧត្តមសេនីយ៍ អ៊ុក ហៃសីឡា បញ្ជាក់ថា ចំពោះជនឆ្លងដែនខុសច្បាប់ណាដែលមាន តែលិខិតឆ្លង ដែនតែជាលក្ខណៈទេសចរណ៍ ហើយគ្មានលិខិត អនុញ្ញាតការងារត្រឹមត្រូវ ជននោះនឹងត្រូវធ្វើការផាកពិន័យ ចំនួន៥០ម៉ឺនរៀលចូលរដ្ឋ រួចរង់ចាំផុតទិដ្ឋការ ហើយធ្វើការបណ្តេញចេញ ។ ដោយឡែកចំពោះជនដែល គ្មានលិខិតស្នាមអ្វីទាំងអស់នោះ ជាក់ស្តែងដូចនៅ ពេលនេះ យើងនឹងកសាងសំណុំបែបបទស្នើ ទៅក្រសួងមហាផ្ទៃ សុំធ្វើការ បណ្តេញចេញពីកម្ពុជាតែម្តង ៕