ចោរចូលប្លន់ផ្ទះលក់ពូកផ្អើលទាំងព្រឹក អស់ប្រាក់៧ពាន់ដុល្លារ និងគ្រឿងអលង្ការមួយចំនួន

ចោរចូលប្លន់ផ្ទះលក់ពូកផ្អើលទាំងព្រឹក អស់ប្រាក់៧ពាន់ដុល្លារ និងគ្រឿងអលង្ការមួយចំនួន

រាជធានីភ្នំពេញ ៖ តាមសេចក្តីរាយការណ៍ពីអ្នកឆ្លើយឆ្លងព័ត៌មានកោះសន្តិភាពបានឱ្យដឹងនៅ មុននេះបន្តិចថា មានករណីចោរចូល ប្លន់ផ្ទះលក់ពូកមួយកន្លែង បណ្តាលឱ្យស្ត្រីម្ចាស់ផ្ទះរងរបួស បែកក្បាល រួចប្រមូលយកប្រាក់អស់ចំនួន៧ពាន់ដុល្លារ និងគ្រឿងអលង្ការមានខ្សែ.ក ខ្សៃដៃមាស៥ជី កាលពីវេលាម៉ោង ៧និង២៥នាទីព្រឹកថ្ងៃទី២៨ មករា ២០១៦ នេះ ស្ថិតនៅផ្ទះលេខ៥ ភូមិមិត្តភាព សង្កាត់ឫស្សីកែវ ខណ្ឌឫស្សីកែវ ។

ជនរងគ្រោះ ឈ្មោះ ចាប សុគន្ធា អាយុ៣៣ឆ្នាំ មុខរបរលក់ពូកស្នាក់នៅកន្លែងកើតហេតុខាងលើ ត្រូវចោរប្លន់ចាប់វាយនិងចាប់ក្បាល បោកផ្ទុបនឹងឥដ្ឋរងរបួស បែកក្បាលសន្លប់ស្តូកស្តឹង ខណៈពេលប្តីរវល់ ជូនកូនទៅសាលារៀននៅផ្ទះតែម្នាក់ឯង ។

ប្រភពបានបន្តថា មុនពេលកើតហេតុ ជនល្មើសមានតែម្នាក់ឯងដោយធ្វើជាចូលទៅទិញពូក ឃើញឱកាសស្ងាត់ក៏ធ្វើសកម្មភាព ដោយស្ទុះទៅចាប់ស្ត្រី ម្ចាស់ផ្ទះវាយ និងចាប់ក្បាលបោកផ្ទុបទៅនឹងឥដ្ឋ បែកក្បាលសន្លប់នៅនឹងកន្លែង រួចជនល្មើសចូលទៅរើកកាយ ក្នុងផ្ទះយកប្រាក់អស់ចំនួន ៧ពាន់ដុល្លារ និងគ្រឿងអលង្ការ មានខ្សែ.ក ខ្សៃដៃមាស៥ជី រត់គេចខ្លួនបាត់ស្រមោល ។

ក្រោយកើតហេតុ ស្ត្រីរងគ្រោះត្រូវបានគេបញ្ជូនទៅសង្គ្រោះនៅគ្លីនិកឯកជនក្បែរផ្ទះ ៕