ស្រស់ស្រី ប្រាប់ថា ឈប់ទាក់ទង ខ្ញុំមានប្តីហើយ កាប់នាង មួយកាំបិត

ស្រស់ស្រី ប្រាប់ថា ឈប់ទាក់ទង ខ្ញុំមានប្តីហើយ កាប់នាង មួយកាំបិត

ខេត្តកំពង់ស្ពឺ ៖ បុរសម្នាក់ បានបង្កើតស្នេហា ជាមួយនារី ដែលរស់នៅក្នុងភូមិ ជាមួយគ្នា រហូតមានអនុស្សាវរីយ៏ផ្អែមល្ហែម អស់ពេលជាច្រើនខែ នៅពេលនាង ប្រាប់ការពិតថា នាងមានប្តីហើយ ធ្វើឲ្យបុរសនោះ កើតមានកំហឹងបាន ទាញកាំបិតផ្គាក់ កាប់នាងមួយកាំបិត រងរបួសជាទំងន់។ ករណីនេះកើតឡើង នៅវេលាម៉ោង៥ និង៣០នាទីថ្ងៃទី៣ កុម្ភះ ២០១៦ ស្ថិតក្នុងភូមិសង្កែលាក់ ឃុំស្វាយចចឹប ស្រុកបរសេដ្ឋ ខេត្តកំពង់ស្ពឺ។

បុរសដែលបង្កាត់ភ្លើងស្នេហ៏ ជាមួយប្រពន្ឋគេនេះ មានឈ្មោះឌុក ម៉ៅ អាយុ៣៥ឆ្នាំ រស់នៅកន្លេងកើតហេតុខាងលើ។ ចំណែកស្ត្រីរងគ្រោះ មានឈ្មោះ សក អាយុ៣២ឆ្នាំ រស់នៅភូមិឃុំ ជាមួយគ្នា។

ប្រភពពីសមត្ថកិច្ច ស្រង់សំដី ស្ត្រីរងគ្រោះ បានអោយដឹងថា អស់រយៈពេល ច្រើនខែមកហើយ ដែលគាត់មាន ទំនាក់ទំនង ជាមួយបុរសខាងលើ។ គាត់ចង់ប្រាប់ទៅ បុរសនោះដែរ ថាគាត់មានគ្រួសារ (ប្តី) ហើយ តែមិនដែលមានឱកាស បាននិយាយប្រាប់ ក៏ចេះតែទាក់ទងគ្នារហូតមក។

ប្រភពបន្តថា នៅថ្ងៃកើតហេតុ រូបគាត់បានណាត់ជួប បុរសខាងលើ ដើម្បីនិយាយគ្នា បញ្ចប់រឿង ព្រោះគាត់មិនចង់ធ្វើរបៀបនេះ តទៅទៀតទេ។ នៅពេលជួបគ្នា គាត់បាននិយាយប្រាប់ បុរសនោះថា បងឈប់ស្រលាញ់អូនទៀតទៅ ព្រោះអូនមានប្តីហើយ គ្រាន់តែនិយាយចប់ បុរសនោះ បានទាញកាំបិតផ្កាក់ កាប់មកលើរូបគាត់ ត្រូវស្មាខាងស្តាំ រងរបួសជាទំងន់។

សមត្ថកិច្ចបានអោយដឹងថា ក្រោយកើតហេតុ ជនសង្ស័យត្រូវបានសមត្ថកិច្ច ធ្វើការឃាត់ខ្លួន បានភ្លាមៗតែម្តង។ នៅចំពៅះមុខសមត្ថកិច្ច ជនសង្ស័យបានឆ្លើយ សារភាពថា មូលហេតុដែលគេ ប្រើអំពើហិង្សា (កាប់) ក៏ព្រោះតែខឹងនឹងនាង ដែលមកបង្កាត់ភ្លើងស្នេហ៏ ជាមួយរូបគេហើយ ចុងក្រោយបែរជា មកនិយាយថា ឲ្យខ្លួនឈប់ស្រាលាញ់ព្រោះនាងមានប្តីហើយ ធ្វើឲ្យរូបគេ មានកំហឹង ក៏ទាញកាំបិតកាប់នាង ដើម្បីស្រាយកំហឹង និងបញ្ឈប់ការទាក់ទងគ្នា។

មជ្ឈដ្ឋានប្រជាពលរដ្ឋ បានលើកឡើងថា មិនដែលមានអ្នកណា រស់នៅភូមិ ជាមួយគ្នា បែរជាមិនដឹងថា នាងមានឬមិនមានប្តី នោះទេ។ តាមការពិតម្នាក់ៗ សុទ្ឋតែដឹងរៀងខ្លួន ថាខ្លួនកំពុងធ្វើអ្វី តែនៅពេលមានរឿង ក៏ចេះតែនិយាយ បែបនេះទៅ។ បច្ចុប្បន្នជនសង្ស័យ ត្រូវបាននគរបាលខាត់ខ្លួន ដើម្បីកសាងសំណុំរឿង បញ្ជូនទៅកាន់សាលាដំបូងខេត្ត ចាត់ការពីបញ្ហា បង្ករបួសស្នាម លើអ្នកដទៃ ៕