ឌុបសង្សារ ដើរលេង ថ្ងៃបុណ្យ នៃក្តីស្រឡាញ់ ជួបគ្រោះថ្នាក់ចរាចរណ៍

ឌុបសង្សារ ដើរលេង ថ្ងៃបុណ្យ នៃក្តីស្រឡាញ់ ជួបគ្រោះថ្នាក់ចរាចរណ៍

រាជធានីភ្នំពេញ ៖ ថ្ងៃបុណ្យនៃក្តីស្រឡាញ់ ដឹកសង្សារដើរលេង បើកម៉ូតូវ៉ារថយន្ត លឿនពេក ចាប់ហ្វ្រាំងមិនទាន់ ជ្រុលទៅបុករថយន្ត មួយគ្រឿងទៀត បណ្តាលឲ្យ ដួលរងរបួសធ្ងន់ម្នាក់ និងស្រាលម្នាក់ កាលពីវេលាម៉ោង១០ និង៣០នាទីយប់ ថ្ងៃទី១៤ កុម្ភៈ តាមបណ្តោយ មហាវិថីព្រះនរោត្តម កែងផ្លូវ២២២ សង្កាត់ជ័យជំនះ ខណ្ឌដូនពេញ ។

ម៉ូតូម៉ាកហុងដាស្គូពី ពណ៌ស ជិះគ្នា២នាក់ គូសង្សារ បើកបរក្នុងទិសដៅ ពីជើងទៅត្បូង ។ ចំណែរថយន្តរងគ្រោះម៉ាក COROLLA ពណ៌ស ស៊េរី២០១៦ ជិះម្នាក់ឯង ក្នុងទិសដៅ ពីត្បូងទៅជើង ។

សាក្សីដែលឃើញហេតុការណ៍ បានឱ្យដឹងថា មុនពេលកើតហេតុ គេឃើញបុរសម្នាក់ ដឹកសង្សារ ធ្វើដំណើរតាមបណ្តោយ មហាវិថីព្រះនរោត្តម លុះមកដល់ចំណុច ផ្លូវកែងលេខ២២២ ដោយសារតែ ម៉ូតូបើកលឿន ហើយវ៉ារថយន្តមួយគ្រឿង នៅពីមុខមិនចាំម៉ាក ស្របពេលរថយន្ត បើកបរបញ្ច្រាសទិសគ្នា បម្រុងបត់ឆ្វេង ក៏ត្រូវម៉ូតូបុកចំចំហៀងខាងឆ្វេង បណ្តាលម៉ូតូដួល រងរបួសធ្ងន់នារីម្នាក់ រីឯបុរស ដែលជាអ្នកឌុប រងរបួសស្រាល ចំណែកម៉ូតូនិងរថយន្តវិញ ខូចខាតទាំងស្រុង ។

ក្រោយពេលកើតហេតុ រថយន្តសង្គ្រោះ ដឹកយកជនរងគ្រោះ ទាំង២នាក់ ទៅព្យាបាលនៅ គ្លីនិកឯកជនមួយ រីឯម៉ូតូ និងរថយន្ត ត្រូវបានសមត្ថកិច្ច ស្ទូចយកទៅរក្សាទុក នៅចរាចរណ៍ជើងគោក ដើម្បីដោះស្រាយគ្នា នៅពេលក្រោយ ៕