យុវសិស្សម្នាក់ ត្រូវគេលបចាក់ស្លាប់ ដោយមិនដឹង មូលហេតុ នៅក្បែរសាលារៀន

យុវសិស្សម្នាក់ ត្រូវគេលបចាក់ស្លាប់ ដោយមិនដឹង មូលហេតុ នៅក្បែរសាលារៀន

ខេត្តព្រៃវែង ៖ យុវសិស្សម្នាក់ ត្រូវបានគេលបចាក់ពីក្រោយ បណ្តាលឲ្យ បាត់បង់ជីវិត ពេលដឹកដល់មន្ទីរពេទ្យ ដោយមិនដឹង ពីមូលហេតុ។ ហេតុការណ៍ចាក់សម្លាប់ សិស្សសាលា ខាងលើនេះ បានកើតឡើង កាលពីវេលាម៉ោង៩ និង៥៥នាទីព្រឹក ថ្ងៃទី១៥ខែកុម្ភៈឆ្នាំ២០១៥ នៅចំណុច ខាងក្រៅរបង ឈៀងខាងកើត វិទ្យាល័យ ព្រៃពោន ស្ថិតក្នុងភូមិព្រៃពោន ឃុំ ព្រៃពោន ស្រុកកំពង់ត្របែក ខេត្តព្រៃវែង។

យុវសិស្សរងគ្រោះ ត្រូវបានគេស្គាល់ថា ឈ្មោះ ជុំ រីឆាត ភេទប្រុស អាយុ១៩ឆ្នាំ មានទីលំនៅក្នុងភូមិរលួស ឃុំចាម ស្រុកកំពង់ត្របែក។

ប្រភពព័ត៌មាន ពីសមត្ថកិច្ច បានឲ្យដឹងថា យុវសិស្សរងគ្រោះ ត្រូវបានយុវសិស្សម្នាក់ ផ្សេងទៀត ដែលរៀនក្នុងវិទ្យាល័យព្រៃពោន ជាមួយគ្នា ឈ្មោះ លី សុធីរៈ ភេទប្រុស អាយុ១៨ឆ្នាំ ប្រើកាប៊ីកាំភ្លើង លបចាក់ពីក្រោយ ចំខ្នងផ្នែកខាងឆ្វេង បណ្តាលអោយ រងរបួសធ្ងន់ ហើយបានស្លាប់ ក្រោយពេលដឹក ដល់មន្ទីរពេទ្យ បង្អែកស្រុកកំពង់ត្របែក ចំណែកឯជនបង្ក ក្រោយពីលបចាក់ យុវជនរងគ្រោះហើយ បានរត់គេចខ្លួនបាត់ បន្សល់ទុក តែវត្ថុតាងកាប៊ី កាំភ្លើង នៅនឹងកន្លែងកើតហេតុ។

ទោះជាយ៉ាងណាក៏ដោយ ចំពោះហេតុការណ៍ សិស្សសាលា លបចាក់សិស្សសាលា ដូចគ្នា រហូតដល់ស្លាប់បាត់បង់ជីវិតនេះ សមត្ថកិច្ចនៅមិនទាន់ អាចបញ្ជាក់បានថា បណ្តាលមកពី មូលហេតុអ្វីនោះទេ ប៉ុន្តែបានអះអាងថា កំពុងតាម ប្រមាញ់ជនបង្ក ដើម្បីយកមកផ្តន្ទាទោស ទៅតាមផ្លូវច្បាប់ ហើយនៅពេលចាប់ ជនបង្កបាន យើងក៏អាចដឹងបាន ពីមូលហេតុពិតដែរ។

ដោយឡែក សាធារណៈមតិខ្លះ បានលើកឡើងថា គ្រាន់តែចង់ដឹង ពីមូលហេតុនោះ មិនចាំបាច់រងចាំ រហូតដល់ចាប់បានជនបង្ក នោះទេ គឺគ្រាន់តែចុះ ទៅសាកសួរ នៅក្នុងវិទ្យាល័យ ព្រៃពោននោះ ក៏អាចដឹងដែរ មិនដែលសុខៗ លបមកចាក់គេលេង នោះទេ វាទាល់តែមានភ្លើង ទើបមានផ្សែង៕