ម្ចាស់ទីតាំង ហ្គេមបាញ់ត្រី ខុសច្បាប់ បិទទ្វារ ចាក់សោខាងក្នុង មិនអោយចូល ឌឺអាជ្ញាធរ

ម្ចាស់ទីតាំង ហ្គេមបាញ់ត្រី ខុសច្បាប់ បិទទ្វារ ចាក់សោខាងក្នុង មិនអោយចូល ឌឺអាជ្ញាធរ

រាជធានីភ្នំពេញ ៖ កម្លាំងគណៈបញ្ជាការ ឯកភាពខណ្ឌទួលគោក នៅរសៀល ថ្ងៃទី១៦ ខែកុម្ភះ ឆ្នាំ២០១៦ នេះបានចុះបង្ក្រាប ទីតាំងបើកល្បែងហ្គេម បាញ់ត្រី១កន្លែង តែត្រូវម្ចាស់ទីតាំង បានបិទទ្វារផ្ទះ មិនឲ្យកម្លាំងគណៈបញ្ជាការ ចូលត្រូតពិនិត្យឡើយ ដែលទីតាំងនេះ នៅចំណុចក្បែរ នឹងហាងកាហ្វេភ្នំពេញ ១៥A តាមបណ្ដោយផ្លូវ២៥៥ ក្នុងសង្កាត់បឹងសាឡាង ខណ្ឌទួលគោក។

តាមប្រភពព័ត៌មាន ពីប្រជាពលរដ្ឋ ដែលរស់នៅក្បែរ នឹងទីតាំងបើកល្បែង ហ្គេមបាញ់នេះ បានឲ្យដឹង ផងដែរថា ជារៀងរាល់ថ្ងៃ មិនថាយប់ ឬថ្ងៃនោះទេ គឺសម្បូរណាស់ ក្រុមក្មេងស្ទាវ ដែលជិះម៉ូតូស៊េរីទំនើបៗ ចូលមកលេងហ្គេម អ្វីដែលគួរអោយ គត់សម្គាល់នោះ មិនត្រឹមតែចូលលេងហ្គេម ប៉ុណ្ណោះទេ ថែមទាំងប្រើប្រាស់គ្រឿងញៀន នៅក្នុងទីតាំងនេះ បន្ថែមទៀត ដែលបង្កភាពអសន្តិសុខ នៅក្នុងមូលដ្ឋាន ផងដែរ។

សូមបញ្ជាក់ថា អស់រយៈពេល ជាង៣ម៉ោងទៅហើយ អាជ្ញាធរក៏ដូចជា គណៈបញ្ជាការ នៅមិនទាន់មាន វិធានការនៅឡើយទេ ដោយគ្រាន់តែ យកឡាន របស់គណៈបញ្ជាការ មកដាក់នៅខាងមុខ ទីតាំងហ្គេមបាញ់ ត្រីនេះ។

ប្រជាពលរដ្ឋនៅទីនោះ បានធ្វើការរិះគន់ លោក ឯក ឃុនឌឿន អភិបាលខណ្ឌទួលគោក យ៉ាងចាស់មាត់ថា ការចុះចាប់ហ្គេមបាញ់ត្រី ខាងលើនេះ អាជ្ញាធរខណ្ឌ ហាក់ដូចជាធ្វើលេងៗ យ៉ាងម៉េចទេ ឬក៏មានអ្នកមានលុយអន្តរាគមន៍ បានជាមិនហ៊ាន កាត់សោរ ចូលចាប់ ហ្គេមបាញ់ត្រី ទាំងនោះអញ្ចឹង បែរជាបណ្តែតបណ្តោយ ឲ្យម្ចាស់ទីតាំងនោះ ចាក់សោរទ្វារឌឺ នឹងអាជ្ញាធរ បែបនេះ។

ប្រជាពលរដ្ឋបានបន្តថា បើថ្ងៃក្រោយ គ្រាន់តែចុះមកបន្លាច ឬបង្អើលលេងៗ បែបនេះ កុំចុះមកល្អជាង នាំអោយអ្នករកស៊ីខុសច្បាប់ ទាំងនោះ មើលងាយ និងរងការរិះគន់ ពីសំណាក់មហាជន អត់អំពើ៕