ល្បិចថ្មី ឆ្នាំ២០១៦! ប្រាប់អ្នករត់ឌុបថា មានជំងឺលើសឈាម មិនហ៊ាន ជិះពីក្រោយ សុំឌុប ជិះយកទៅបាត់

ល្បិចថ្មី ឆ្នាំ២០១៦! ប្រាប់អ្នករត់ឌុបថា មានជំងឺលើសឈាម មិនហ៊ាន ជិះពីក្រោយ សុំឌុប ជិះយកទៅបាត់

ខេត្តបន្ទាយមានជ័យ ៖ បុរសម្នាក់ បានទៅកាន់អធិការ នគរបាលក្រុងប៉ោយប៉ែត ហើយអះអាងថា ត្រូវចោរយកម៉ូតូ ម៉ាកសង់ C125 ស៊េរីឆ្នាំ២០១៦ គេចទៅដោយសុវត្ថិភាព ដែលហេតុការណ៍ ភ្ញាក់ផ្អើលនេះ កើតឡើងនៅម្តុំខាងក្រោយ ភោជនីយដ្ឋានត្រជាក់ចិត្តថ្មី ក្នុងភូមិផ្សារកណ្តាល សង្កាត់ផ្សារកណ្តាល ក្រុងប៉ោយប៉ែត កាលពីវេលាម៉ោង ជាង១០ព្រឹក ថ្ងៃទី១៦ កុម្ភៈ ២០១៦ ។

ជនរងគ្រោះឈ្មោះ ឃុន ផាត អាយុ៣១ឆ្នាំ ជាអ្នករត់ម៉ូតូឌុប ស្នាក់នៅផ្ទះជួល ក្នុងភូមិកើតហេតុ ។ ស្តាប់ការរៀបរាប់ របស់ជនរងគ្រោះថា បើមិនបានចុះដល់ កន្លែងកើតហេតុ ប្រាកដជាមិនឱ្យគួរជឿ ។ ជនរងគ្រោះបន្តថា ដំបូងជនសង្ស័យម្នាក់ បានហៅឱ្យខ្លួន ដឹកពីចំណុច មុខរោងចក្រ ផលិតហាតឌីស ឆ្ងាយពីកន្លែងកើតហេតុប្រហែល៦០០ម៉ែត្រ ដោយជនសង្ស័យនិយាយថា សុំបើកម៉ូតូ ដោយខ្លួនឯង ព្រោះកើតជំងឺលើសឈាម មិនហ៊ានជិះពីក្រោយទេ ។ មិនតែប៉ុណ្ណោះ ថែមទាំងសុំមួកសុវត្ថិភាពពាក់ទៀត ។

ជនរងគ្រោះបន្តថា លុះដល់កន្លែងកើតហេតុ ស្រាប់តែជនសង្ស័យ ធ្វើជាទាញទូរស័ព្ទ ទំនងជាទម្លាក់លុយ បន្ទាប់មកក៏ឱ្យខ្លួន ជួយរើសលុយឱ្យ ។ ដោយមានឱកាសនោះ ជនសង្ស័យក៏បាន ជិះម៉ូតូគេចទៅបាត់ ដោយសុវត្ថិភាពតែម្តង ។

សាក្សីនៅកន្លែងកើតហេតុ ១-ឈ្មោះច្រឹក សុភី ភេទស្រី អាយុ២៤ឆ្នាំ និង ២-ឈ្មោះឡាយ សារ៉េត ភេទស្រី អាយុ៣៩ឆ្នាំ និងកម្មករជា ច្រើននាក់ទៀត ដែលបំរើការងារ នៅការដ្ឋានសំណង់ មួយកន្លែង ហើយបានឃើញហេតុការណ៍និយាយថា ជនរងគ្រោះ ត្រូវចោរយកម៉ូតូ ទៅបាត់មែន ។ ដោយពួកគាត់ ក៏មានការងឿងឆ្ងល់ដែរ ព្រោះជនសង្ស័យ បើកម៉ូតូគេចទៅ មានទាំងមួកសុវត្ថិភាព ។ ចំណែកជនរងគ្រោះ បានរត់តាមពីក្រោយ ស្រែកថាចោរៗ ៕