បង្ហាញមុខជនសង្ស័យជួញដូរគ្រឿងញៀន និងចោរកម្ម០៦នាក់

បង្ហាញមុខជនសង្ស័យជួញដូរគ្រឿងញៀន និងចោរកម្ម០៦នាក់

រាជធានីភ្នំពេញ ៖ ជនសង្ស័យ ជាមុខសញ្ញាគាស់ផ្ទះ ជួញដូរ ប្រើប្រាស់គ្រឿងញៀន និង អ្នកទទួលផលចោរកម្ម ចំនួន៦នាក់ត្រូវបានលោកវរសេនីយ៍ឯក ម៉ក់ ហុង អធិការនគរបាលខណ្ឌសែនសុខ ធ្វើសន្និសិតទកាសែតបង្ហាញមុខជាសាធារណៈ កាលពីព្រឹកថ្ងៃទី១០ ខែមិថុនា ឆ្នាំ ២០១៦នេះ។

ជនសង្ស័យដែលបង្ហាញមុខមាន ឈ្មោះ សម្បត្តិ ជា ហៅរត្ន័ ហៅមាំង ស្នាក់នៅផ្ទះជួលក្នុងសហគមន៍ភូមិសែនសុខ៥ សង្កាត់ ឃ្មួញខណ្ឌសែនសុខ ជាមុខសញ្ញាធ្លាប់គាស់ និងលួចទ្រព្យសម្បត្តិយ៉ាងសកម្ម ២.ឈ្មោះ អ៊ូច សុចិត្រធារី ភេទស្រី អាយុ៤៣ឆ្នាំ ជាអ្នកទទួលបញ្ចាំម៉ូតូចោរកម្ម ស្នាក់នៅភូមិសែនសុខ២ សង្កាត់ឃ្មួញខណ្ឌសែនសុខ ៣.ឈ្មោះ សេក ថុល ភេទប្រុស អាយុ៤៥ឆ្នាំ មុខរបររត់ម៉ូតូឌុប ស្នាក់ភូមិសែនសុខ២ សង្កាត់ឃ្មួញខណ្ឌសែនសុខ ជាអ្នកផ្សំគំនិត ៤.ឈ្មោះ រិទ្ធ គន្ធា ហៅស្រីលក្ខណ៍ ភេទស្រី អាយុ២៧ឆ្នាំ មានស្រុកកំណើតភូមិសំរោង ឃុំសំរោង ក្រុងតាខ្មៅ ខេត្តកណ្តាល ជាអ្នកប្រើប្រាស់គ្រឿងញៀន ៥.ឈ្មោះឆេង លក្ខិណា ហៅក្រឹម ភេទប្រុស អាយុ២៤ឆ្នាំ មុខរបរមិនពិតប្រកដ ស្នាក់នៅសហគមន៍ ភូមិសែនសុខ៥ សង្កាត់ឃ្មួញ ខណ្ឌសែនសុខ ជាអ្នកជួញដូរគ្រឿងញៀន និង៦.ឈ្មោះ អ៊ុង ម៉ាឡៃ ហៅ ពៅ ភេទប្រុស អាយុ២៤ឆ្នាំ ស្នាក់នៅសហគមន៍ ភូមិសែនសុខ៥ សង្កាត់ឃ្មួញខណ្ឌសែនសុខ ជាអ្នកជួញដូរ។

លោកវរៈសេនីយ៍ឯក ម៉ក់ ហុង អធិការខណ្ឌសែនសុខ បានឲ្យដឹងថាជនសង្ស័យទាំង៦នាក់ ត្រូវបានកម្លាំងនគរបាលស្រាវជ្រាវឃាត់ខ្លួនជាបន្តបន្ទាប់កាលពីថ្ងៃទី៧ និងទី៨ ខែមិថុនា បន្ទាប់ពីជនសង្ស័យ ធ្វើសកម្មភាពគាស់ផ្ទះ យកម៉ូតូនៅសង្កាត់ភ្នំពេញថ្មី និងគាស់ផ្ទះមួយកន្លែងទៀត យកប្រាក់អស់ប្រមាណ៥ពាន់ដុល្លារ និងសម្ភារះមួយចំនួន។

លោកអធិការបានឲ្យដឹងទៀតថា មុននឹងឈានទៅឃាត់ខ្លួនបានជនសង្ស័យ មុនដំបូងសមត្ថកិច្ចបានធ្វើការជ្រាវជ្រាវមុខសញ្ញាគ្រឿងប្រើប្រាស់គ្រឿងញៀន ហើយឃាត់ខ្លួនបានជនសង្ស័យប្រើប្រាស់គ្រឿងញៀនចំនួន២នាក់ កាលពីរសៀលថ្ងៃទី៧ ខែមិថុនា នៅសង្កាត់ឃ្មួញ។

លុះក្រោយមកជនសង្ស័យបានសារភាពថា ធ្លាប់ធ្វើសកម្មភាពគាស់ផ្ទះ យកម៉ូតូ និងយកម៉ូតូទៅបញ្ចាំ នៅព្រឹកថ្ងៃទី៨ខែមិថុនា សមត្ថកិច្ចក៏បានឃាត់ខ្លួន ជនសង្ស័យជាបន្តបន្ទាប់ចំនួន៤នាក់ទៀត ក្នុងនោះជាមុខសញ្ញា ជួញដូរគ្រឿងញៀន អ្នកផ្សំគំនិត និងម្ចាស់ទីតាំង ទទួលបញ្ចាំម៉ូតូចោរកម្ម ។

នៅព្រឹកនោះសមត្ថកិច្ចក៏បានធ្វើការឆែកឆេរដកហូតបានម៉ូតូចំនួន១៧គ្រឿងដែលពុំមានឯកសារគ្រប់ពីកុងស៊ីបញ្ចាំផងដែរ។លោកវរៈសេនីយ៍ឯក ម៉ក់ ហុង បានឲ្យដឹងទៀតថា ក្នុងការបង្ក្រាបជនសង្ស័យសមត្ថកិច្ចបានបំបែកសំណុំរឿងចំនួន៥ករណី នៅក្នុងនោះរួមមានជូញដូរ ប្រើប្រាស់គ្រឿងញៀន បើកទីតាំង ឲ្យមានការប្រព្រឹត្តិបទល្មើសគ្រឿងញៀន ទទួលផលចោរកម្ម និងមុខសញ្ញាគាស់ផ្ទះយ៉ាងសកម្ម។

ជាការលើកទឹកចិត្តដល់កម្លាំងសមត្ថកិច្ចដែលខិតខំបង្ក្រាបបទល្មើស លោក ប៉ឹល កុសល អភិបាលនៃគណៈអភិបាលខណ្ឌសែនសុខ ក៏បានជួយឧបត្ថម្ភទឹកប្រាក់ចំនួន១០០ដុល្លារ លោកវរៈសេនីយ៍ឯក ម៉ក់ ហុង ក៏បានឧបត្ថមចំនួន៣០ម៉ឺនរៀលបន្ថែមទៀតដល់កងកម្លាំងដែលមានស្នាដៃ៕