គ្រួសារក្រីក្រកូនភ្លោះ៣នាក់ សុំអំពាវនាវរកសប្បុរសជន

គ្រួសារក្រីក្រកូនភ្លោះ៣នាក់ សុំអំពាវនាវរកសប្បុរសជន

ឧត្តរមានជ័យ ៖ ទារក៣នាក់បានចាប់កំណើត លើគ្រួសារមួយដែលមានជីវភាពក្រីក្រ ដែលម្តាយឈ្មោះ ប៉ក់ ចាន់ណា អាយុ៣២ឆ្នាំ ចំណែកប្តីឈ្មោះ ស៊ឹម ប្រុស អាយុ៣៤ឆ្នាំ មុខរបរធ្វើស្រែចម្ការ មានទីលំនៅក្នុងភូមិកណ្តាលលើ ឃុំអន្លង់វែង ស្រុកអន្លងវែង ខេត្តឧត្តរមានជ័យ។ តាមការរៀបរាប់ពីស្ត្រីជាម្តាយ និងបុរសជាប្តីបានប្រាប់ថា ចាប់តាំងពីប្រពន្ធរបស់ខ្លួនមានផ្ទៃពោះនៅក្នុងខែដំបូងភ្លាម ទោះបីនៅក្នុងគ្រួសារដែលខ្វះខាតក៏ដោយ ទាំងពីនាក់ប្តីប្រពន្ធ សុខចិត្តដើរខ្ចីបុលលុយអ្នកភូមិជិតខាង នាំប្រពន្ធទៅពិនិត្យសុខភាពជារៀងរាល់ខែដែរ។

បុរសជាប្តីបានបន្តថា ក្រោយពេលប្រពន្ធជិតគ្រប់ខែ គ្រូពេទ្យបានប្រាប់ថា ទារកដែលនៅក្នុងផ្ទៃម្តាយនោះ មានរហូតទៅដល់៣នាក់ ហើយគ្រូពេទ្យបានឳ្យថ្នាំជួយបំប៉នសុខភាពទារក ឳ្យមានសុខភាពល្អគ្រប់គ្រាន់។ នៅពេលគ្រប់ខែឆ្លងទន្លេ ទាំងពីនាក់ប្តីប្រពន្ធរត់រកខ្ចីបុលលុយអ្នកភូមិបានមួយចំនួន នាំប្រពន្ធទៅសម្រាលកូននៅឯមន្ទីរពេទ្យកាល់ម៉ែត្រ(ភ្នំពេញ)នៅទី២៩ មិថុនា ២០១៦ ឥឡូវទារកទើបតែមានអាយុៈ១៥ថ្ងៃប៉ុណ្ណោះ។

ទាំង២នាក់ប្តីប្រពន្ធ បានលើកដៃសំពះដល់សប្បុរសជនទីជិតទីឆ្ងាយ ឯកឧត្តម លោកឧកញ៉ា លោកជំទាវ លោក លោកស្រី ជាពិសេសសម្តេចអគ្គមហាសេនាបតីតេជោ ហ៊ុនសែន ប្រមុខរាជរដ្ឋាភិបាល និងលោកជំទាវកត្តិព្រឹទ្ធបណ្ឌិត ប៊ុនរ៉ានី ហ៊ុន សែន ដែលលោកទាំងពីរតែងតែបានយកចិត្តទុក្ខដាក់ជួយចិញ្ចឹមដល់ទារកដែលមាន៣នាក់ក្នុងផ្ទៃម្ដាយតែមួយ៕

ប្រភព ៖ កោះសន្តិភាព

កំណត់ហេតុខ្មែរឡូត៖

គួររំលឹកដែរថា ដោយឡែកករណីមួយវិញទៀត គ្រួសារក្រីក្រមួយ ដែលមានតែម្តាយក្មេក ចាស់ជរា និងកូនប្រសារប្រុស កំពុងមានជំងឺបានលើកដៃសំពះ សុំក្តីមេត្តា ពីសប្បុរសជន ជិតឆ្ងាយ ព្រោះតែពួកគាត់ទាំង២នាក់ កំពុងជួបកង្វះខាតជាខ្លាំង ។ ដោយសារតែជីវភាព ពឹងផ្អែកលើកូនប្រសារប្រុស ធ្វើកម្មករសំណង់ តែពេលនេះបានធ្លាក់ខ្លួនមានជំងឺទៅហើយ ។ គ្រួសារនេះ រស់នៅក្នុងភូមិទ្រាត្បូង ឃុំស្រែថ្មី ស្រុករលាប្អៀរ ។

ក្នុងខ្ទមស្លឹក សង់លើដីរបស់គេ បងប្រុស កែវ យឿន អាយុ ៥៤ឆ្នាំ បានរាបរាប់ ថា កាលដើមឡើយ គ្រួសារគាត់មាន គ្នា៤នាក់ គឺ ប្រពន្ធ កូន ម្តាយក្មេក និងរូបគាត់ ។ កម្មអកុសល ប្រពន្ធគាត់ បានស្លាប់នៅឆ្នាំ ២០០១ ក្រោយមក កូនគាត់បានស្លាប់ នៅឆ្នាំ២០០៣ ។

ចាប់តាំងពីកូន និងប្រពន្ធគាត់បានស្លាប់ទៅ គាត់បានខំធ្វើការជាជាងសំណង់ ចិញ្ចឹមម្តាយក្មេក ឈ្មោះ ស៊ឹប ហឿង អាយុ៨៥ឆ្នាំ ដោយសង់កូនខ្ទម នៅក្បែរគ្នា លើដីរបស់គេ ដែលស្នាក់នៅមើលចាំដីឲ្យគេ ។ ក្រោយមកនៅអំឡុងឆ្នាំ២០១៣ គាត់បានធ្លាក់ខ្លួនឈឺ មួយថ្ងៃកាត់ មួយថ្ងៃកោរ គ្មានបានទៅធ្វើការជាងសំណង់ទេ ។

ដូចនេះជីវភាពកាន់តែដុនដាប ពេលខ្លះរកអង្កដាំបាយគ្មាន បានលោកមេភូមិ និងអ្នកជិតខាង ជួយផ្តល់អង្ករ និងម្ហូបអាហារ ចេះតែទ្រាំរស់ ពេលណាមានសុខភាពអាចទៅជួយកិច្ចការនៅសាលាបុណ្យក្នុងភូមិ បានប្រាក់បន្តិចបន្តួច គ្រាន់បានទិញអង្ករ ។ ដោយសារតែ ទុក្ខលំបាកកាន់តែខ្លាំងបែបនេះ រូបគាត់ និងម្តាយក្មេកសូមលើដៃសំពះ សុំក្តីមេត្តាពីសប្បុរសជនជិតឆ្ងាយ សូមមេត្តាជួយឧបត្ថមរូបគាត់ ដែលកំពុងជួបការ លំបាក នេះផង ព្រោះពួកគាត់គ្មានរំពឹង សាច់ញាតិណា ក្រៅពីបងប្អូនជាសប្បុរសជនឡើយ ។

លោក តុប ឆាន មេភូមិទ្រាត្បូង បានបញ្ជាក់ថា គ្រួសារនេះពិតជាក្រីក្រខ្លាំងណាស់ បន្ទាប់បុរសឈ្មោះ កែវ យឿន ធ្លាក់ខ្លួនឈឺ គឺដាច់បាយតែម្តង ។សព្វថ្ងៃបាន រូបគាត់ជាមេភូមិ ដើររៃអង្គាសអង្ករ ខ្លះឲ្យជាប្រាក់ យកមកឧបត្ថមគ្រួសារនេះ បាន ម្តង ពីរដែរ ក្នុងនាមលោកជាអាជ្ញធរ ភូមិសូមអំពាវនាវ ដល់សប្បុរសជន សូមមេត្តាជួយគ្រួសារខាងលើនេះផង គឺពិតជាក្រីក្រប្រាកដមែន ។

ក្នុងថ្ងៃនោះផងដែរ ដោយសារតែ មើលឃើញភាពលំបាកគ្រួសារនេះខ្លាំងពេក ភ្នាក់ងារយើងបាន ជួយឧបត្ថម ប្រាក់ចំនួន៤ម៉ឺនរៀល ផងដែរ និងសង្ឃឹមថា សប្បុរជន គ្រប់ទីជិតឆ្ងាយ នឹងមានក្តីមេត្តា ដល់គ្រួសារខាងលើនេះ យកបុណ្យផងចុះ៕