ថៃ៖ តារាសម្តែងថៃល្បីឈ្មោះកញ្ញា Pancake Khemanit ជាញឹកញាប់បានធ្វើដំណើរមកកាន់ប្រទេសកម្ពុជាយើង ដើម្បីបំពេញការងារផ្ទាល់ខ្លួន ដូចជាការចូលរួមថតផ្សព្វផ្សាយពាណិជ្ជកម្មឱ្យបណ្តាក្រុមហ៊ុនធំៗមួយចំនួនជាដើម។

ហើយកាលពីប៉ុន្មានថ្ងៃមុននេះ កញ្ញាក៏បានវិលត្រលប់មកកម្ពុជាជាថ្មីម្តងទៀត ដើម្បីបំពេញការងាររបស់ខ្លួន។ ក្នុងនោះដែរ យើងអាចដឹងថាប្រហែលជាតារាសម្តែងស្រី Pancake មកថតស្ពតពាណិជ្ជកម្មរបស់នាង បើយោងតាមការផុសរូបភាពជាច្រើនបន្តបន្ទាប់នៅលើអ៊ីនស្តារក្រាមផ្ទាល់ខ្លួន។

ទន្ទឹមនឹងនោះ យើងឃើញរូបភាពគួរឱ្យចាប់អារម្មណ៍៍មួយសន្លឹករបស់នាងថតនៅម្តុំមាត់ទន្លេទីក្រុងភ្នំពេញ ហើយផុសនៅក្នុងអ៊ីនស្តារក្រាម ព្រមទាំងដាក់ Caption ពីលើនោះថា៖ 

«Just Walk ឡានស្ទះខ្លាំងណាស់ ក៏ចុះដើរតែម្តង! ស្ទះដូចជាផ្ទះយើងដែរ (ប្រទេសថៃ) ប៉ុន្តែបានបរិយាកាសយោង #មើលទេសភាព #មើលទីក្រុង #វិថីអ្នកដើរលេង…»។

ក្រៅពីនេះទៀត យើងក៏នៅឃើញតារាស្រីស្រស់ស្អាតរូបនេះបានធ្វើដំណើរកម្សាន្តទៅកាន់រមណីយដ្ឋានប្រវត្តិសាស្រ្តវត្តភ្នំផងដែរ ជាមួយអ្នកម្តាយរបស់ខ្លួន។

គួរឱ្យដឹងផងដែរថា នេះមិនមែនជាលើកទី១នោះទេសម្រាប់កញ្ញា Pancake នៅក្នុងការធ្វើដំណើរមកកាន់កម្ពុជា។ 

ហើយរាល់លើកតារាស្រីរូបនេះមកដល់ទឹកដីកម្ពុជា នាង និងម្តាយក៏តែងតែឆ្លៀតចូលមកអុជធូប ថ្វាយផ្កាសុំសេចក្តីសុខសេចក្តីចម្រើន នៅកន្លែងទីសក្ការៈបូជាវត្តភ្នំរបស់យើងជានិច្ច៕

ទស្សនាកម្រងរូបភាពខាងក្រោម៖