របៀបធ្វើអោយស្បែកស្អាត តាមបែបធម្មជាតិ

របៀបធ្វើអោយស្បែកស្អាត តាមបែបធម្មជាតិ

យដោយ www.health.com.khថ្ងៃទី08 មករា ឆ្នាំ2015

243

នៅពេលដែលអ្នកកំពុងតែព្យាយាមប្រើផលិតផល ក៏ដូចជាឡេថែរក្សាស្បែកគ្រប់ប្រភេទ ហើយនៅតែមិនទទួលបានលទ្ធផលល្អ ដូចការផ្សាយពាណិជ្ជកម្មនោះ អ្នកគួរតែស្វែងរកវិធីថ្មី តាមបែបធម្មជាតិវិញទៅ។ ដើម្បីអោយស្បែកមានភាពភ្លឺថ្លា និងស្រស់ស្អាតនោះ អ្នកត្រូវតែគិតអំពីអ្វីដែលអ្នកបានញ៉ាំ របៀបដែលអ្នកលាងសម្អាតស្បែក និងរបៀបផ្តល់សំណើម ព្រមទាំងផ្តល់ជីវជាតិដល់ស្បែកតែម្តង។ គ្មានការព្យាបាលណាមួយ ដែលធានាថា នឹងផ្តល់ភាពស្រស់ស្អាតដល់អ្នក ១០០ ភាគរយតែម្តងទេ។ ដូច្នេះហើយ យើងក៏បានលើកយកនូវវិធីសាស្ត្របែបធម្មជាតិដូចខាងក្រោមនេះ ដើម្បីអោយអ្នកអាចសកល្បងបាន។

កុំញិចដុំពកតូចៗលើស្បែក
វិធីសាស្ត្រដំបូងគេនោះ គឺធ្វើយ៉ាងណាលុបបំបាត់ការញិចដុំពកតូចៗលើស្បែក ព្រោះវាមិនគ្រាន់តែធ្វើអោយមុខក្រហមទេ តែក៏អាចធ្វើអោយបាក់តេរីសាយភាយ ដែលជាហេតុនាំអោយកើតមុន និងសម្លាកលើស្បែកបានដែរ។

លាងសម្អាតគ្រឿងតែងមុខ មុនពេលចូលគេង
បើសិនជាអ្នកចេះតែបន្សល់ នូវគ្រឿងតែងខ្លួននៅជាប់នឹងមុខ ហើយគេង នោះវាពិតជាធ្វើអោយជាតិពុលជាប់នៅក្នុងស្បែក និងរន្ធញើសជាមិនខាន។ ដូច្នេះ វិធីដែលល្អ គឺគួរតែធ្វើយ៉ាងណាអោយស្បែកមានឱកាសអាចដកដង្ហើមបាន តាមរយៈការលាងសម្អាតគ្រឿងតែងមុខ ចោលអោយអស់សិន មុនពេលចូលគេង។

ត្រូវតែសកម្មចំពោះខ្លួនឯង
ចូរលេងកីឡា ហាត់ប្រាណ ដើរ ឬជិះកង់។ រឿងនេះមិនមែនជាបញ្ហាក្នុងការជ្រើសរើសលំហាត់ប្រាណនោះទេ។ ប៉ុន្តែ ការធ្វើសកម្មភាពរាងកាយណា ដែលអាចអោយបែកញើសបាន សុទ្ធតែជារឿងល្អ ព្រោះវានឹងជួយលាងសម្អាតរន្ធញើស ព្រមទាំងផ្តល់តុល្យភាពអ័រម៉ូន ក្នុងរាងកាយផងដែរ។ ចូរចាំថា ត្រូវលាងមុខចេញ ក្រោយពីហាត់ប្រាណរួច។

លាងសម្អាត ច្រាស់ផាត់មុខរបស់អ្នក
តាមការសិក្សាមួយបានអោយដឹងថា ស្ត្រីច្រើនជាង ៧០ ភាគរយហើយ ដែលមិនធ្លាប់លាងសម្អាតច្រាស់ និងប៉ុងផាត់មុខនោះទេ។ ដូច្នេះ អ្នកគួរតែលាងសម្អាតវា អោយបានម្តងក្នុងមួយសប្តាហ៍ ជាមួយទឹកក្តៅឧណ្ហៗ និងសាប៊ូ បន្ទាប់មកចូរលាងជម្រះសាប៊ូចេញ ហើយទុកវាអោយស្ងួត។ មធ្យោបាយមួយនេះ នឹងជួយបំបាត់ភាពកខ្វក់ និងការកកើតបាក់តេរីបាន។

លាងសម្អាតទូរស័ព្ទរបស់អ្នក
ទូរស័ព្ទដៃ គឺជាមេនាំរឿង ជាពិសេស គឺជាអ្នកចម្លងមេរោគ និងភាពកខ្វក់ខ្លាំងជាងគេបំផុតតែម្តង។ រាល់ភាពកខ្វក់ និងបាក់តេរីទាំងអស់ ដែលចូលក្នុងដៃរបស់អ្នក វានឹងចម្លងទៅលើកញ្ចក់ទូរស័ព្ទរបស់អ្នកបាន ពេលនោះ វានឹងប៉ះលើមុខអ្នក បានយ៉ាងងាយតែម្តង។ ដូច្នេះ អ្វីដែលអ្នកគួរធ្វើ គឺជូតសម្អាតកញ្ចក់ទូរស័ព្ទអោយបានស្អាត ជាមួយនឹងទឹកសម្លាប់បាក់តេរី និងធ្វើយ៉ាងណាអោយទូរស័ព្ទអ្នកស្អាតល្អ៕

ប្រភព៖health.com.kh

មុន បន្ទាប់

មតិយោបល់