បីសំណួរត្រូវសួរខ្លួនឯងមុននឹងសម្រេចចិត្តរៀបការ

បីសំណួរត្រូវសួរខ្លួនឯងមុននឹងសម្រេចចិត្តរៀបការ

រៀបការគឺជារឿងធំបំផុតក្នុងជីវិតរបស់មនុស្សម្នាក់ៗ។ បើចេះតែឆិនឆៃធ្វើតាមតែចិត្តរបស់ខ្លួនមួយប្រាវ ទៅថ្ងៃមុខអ្នកងាយនឹងជួបរឿងរកាំរកូសរហូតដល់ដើរផ្លូវផ្សេងគ្នា ឬមើលមុខគ្នាមិនចំក៏មាន។ ដូច្នេះដើម្បីឲ្យសម្ពន្ធភាពប្ដីប្រពន្ធរបស់អ្នកស្ថិតស្ថេរយូរអង្វែងទាមទារឲ្យមានការសម្រេចចិត្តដ៏ត្រឹមត្រូវមួយមុននឹងកាន់ដៃគ្នាចូលរោងការ។ ខាងក្រោមជាសំណួរខ្លី ៣ ដែលអាចជួយដល់ការសម្រេចចិត្តរបស់អ្នកថា គួររៀបការ ឬមិនគួរ?

6a017ee8b739ab970d019b01f78058970b

១. តើខ្ញុំត្រៀមខ្លួនផ្ដល់ឲ្យគេនូវអ្វីដែលគេត្រូវការបានឬនៅ?

មនុស្សជាច្រើនចាប់ដៃគ្នាសម្លឹងមើលផលប្រយោជន៍គ្នាទៅវិញទៅមកដូចជាមានទ្រព្យសម្បត្តិ រូបសម្បត្តិ និងមុខរបរនឹងធឹងដែលអាចពឹងពាក់បាន។ តែការចាប់ដៃគ្នាជាគូអនាគតមិនគួរគិតតែចូលម៉្យាងទេ ត្រូវគិតថា អ្នកអាចបំពេញតម្រូវការរបស់ដៃគូរបស់អ្នកបានកម្រិតណា? នៅពេលដែលអ្នកបំពេញតម្រូវការដែលគេចង់បានច្រើនលើកច្រើនសា ចង់មិនចង់គេនឹងធ្វើល្អមកលើអ្នកវិញដូចគ្នា។ អ្នកគួរសម្លឹងរកដៃគូដែលមិនសូវគិតខ្លួនឯង មិនអាត្មានិយម និងចេះយល់ចិត្តគ្នាជាធំ។

២. តើយើងស្គាល់គុណតម្លៃគ្នាទេ?

មនុស្សម្នាក់កើតមកមានគោលដៅ តម្រូវការ និងគុណតម្លៃប្លែកៗពីគ្នា។ ដូច្នេះ រយៈពេលដែលអ្នកស្វែងយល់ចិត្តគ្នាមុនរៀបការ គួរស៊ើបសួរគ្នាទៅវិញទៅមកពីព័ត៌មានមួយចំនួនពាក់ព័ន្ធនឹងគោលដៅរៀងខ្លួន ចំណង់ចំណូលចិត្ត និងតម្រូវការរវាងគ្នានិងគ្នា។ បើអ្នកមានចំណុចខុសប្លែកគ្នា តែអាចរកចំណុចកណ្ដាលមួយស្របគ្នានោះមានន័យថា អ្នកចេះពិភាក្សា និងយល់ពីគ្នាបាន។

តែបើម្នាក់ៗ ទាមទារចង់បានអ្វីៗតាមតែចិត្តខ្លួនឯង ខណៈគំនិតរបស់ដៃគូសុទ្ធតែឆោតល្ងង់នោះ ជម្លោះនឹងកើតមានមិនចប់មិនហើយ ហើយថ្ងៃមួយប្រាកដជា Bye Bye ដាក់គ្នាមិនខាន។

ឥលូវគ្រាន់តែយកឧទាហរណ៍មួយមកពិចារណាក៏អ្នកអាចយល់បានដែរ។ ឧបមាថា អ្នកចង់បានកូនភ្លាមៗ តែដៃគូអ្នកចង់នៅខ្លួនទទេដើរលេងឲ្យសប្បាយឆ្អែតឆ្អន់សិនទើបគិតគូររឿងនេះ ភាពប្រទាំងប្រទើសក៏អាចនឹងអូសបន្លាយរយៈពេលវែង ខណៈដែលបន្លាក្នុងចិត្តនេះនឹងរុកកួនសុភមង្គលអ្នកដោយជៀសមិនផុត។

អីចឹងត្រូវសិក្សាស្វែងយល់រកចំណុចរួមដូចគ្នាឲ្យបានកាន់តែច្រើនកាន់តែប្រសើរមុននឹងសម្រេចកាន់ដៃគ្នាចូលរោង។

៣. សួរខ្លួនឯង ថាស្រឡាញ់គេដោយពិតប្រាកដដែរឬទេ?

រៀបការដោយក្ដីស្រឡាញ់ និងរៀបការដោយឪពុកម្ដាយផ្សំផ្គុំឲ្យជារឿងពីរផ្សេងគ្នា។ សម័យបច្ចុប្បន្ន កូនកំលោះកូនក្រមុំច្រើនជាអ្នកសម្រេចចិត្តលើអាពាហ៍ពិពាហ៍ខ្លួនឯងច្រើនជាង ការទុកដាក់ដោយឪពុកម្ដាយ។ អ្នកគួរជ្រើសរើសមនុស្សដែលខ្លួនស្រឡាញ់ និងយល់ចិត្តគ្នាច្បាស់។ ស្នេហាក៏មិនខុសពីការសាងសង់អគារមួយដែរគឺតម្រូវឲ្យអ្នកមានគ្រឹះដ៏រឹងមាំមួយនោះគឺ ក្ដីស្រឡាញ់។ បន្ទាប់ពីមានក្ដីស្រឡាញ់នេះហើយ អ្វីៗនឹងកាន់តែងាយស្រួល។ ចំណុចបន្ទាប់ អ្នកអាចសម្លឹងមើលកត្តាហិរញ្ញវត្ថុ មុខរបរ ការងារ ដែលចំណុចទាំងអស់នោះ អ្នកទាំងពីរអាចកំណត់ពេលវេលាជាក់លាក់ណាមួយសម្រេចរួមគ្នាឲ្យបានមុនសម្រេចរៀបការ។ ក្ដីស្រឡាញ់ផ្សារភ្ជាប់នឹងសេចក្ដីសុខផ្លូវភេទ ផ្លូវចិត្ត ដែលជាកត្តារួមផ្សំដ៏ធំនៃសុភមង្គលគ្រួសារមួយ ដូច្នេះគួរជ្រើសរើសមនុស្សដែលអ្នកស្រឡាញ់ និងស្រឡាញ់អ្នកដោយពិតប្រាកដ។

នៅមានចំណុច ណាទៀតដែលប្រិយមិត្តចង់បន្ថែម?

មុន បន្ទាប់

មតិយោបល់