ដឹងអត់ថា Bill Gates ចូលចិត្តអានសៀវភៅណាជាងគេទេ? (វីដេអូ)

ដឹងអត់ថា Bill Gates ចូលចិត្តអានសៀវភៅណាជាងគេទេ? (វីដេអូ)

អ្នកណាក៏ដឹងដែរថា លោក Bill Gates គឺជាមហាសេដ្ឋីអាមេរិកដ៏ជោគជ័យ និងមានទ្រព្យសម្បត្តិច្រើនជាងគេម្នាក់នៅលើពីពិភពលោក ពោលគឺមានប្រាក់ដល់ទៅ ៨៣,៣ ពាន់លានដុល្លារអាមេរិក។ ទន្ទឹមនឹងនេះគាត់ក៏ជាបុគ្គលមួយរូបដែលបានបរិច្ចាគទឹកប្រាក់យ៉ាងច្រើនសន្ធឹកសន្ធាប់ ដើម្បីធ្វើសកម្មភាពមនុស្សធម៌ជួយជនក្រីក្រនៅជុំវិញពិភពលោក ក្នុងនោះក៏មានប្រទេសកម្ពុជាដែរ។

អាថ៌កំបាំងនៃភាពជោគជ័យរបស់លោក បានធ្វើឲ្យមនុស្សគ្រប់គ្នា ជាពិសេសសហគ្រិន អ្នកជំនួញ រួមទាំងបញ្ញវន្តវ័យក្មេងចង់ស្វែងយល់ពីគន្លឹះដែលធ្វើឲ្យមហាសេដ្ឋីវ័យ៥៩ឆ្នាំរូបនេះ អាចក្លាយជាបុគ្គលមានទ្រព្យសម្បត្តិយ៉ាងច្រើនមហាសាលបែបនេះ។

សម្រាប់ប្រិយមិត្តវិញដែលមានបំណងចង់ស្គាល់ Bill Gates ឲ្យកាន់តែច្បាស់មែននោះ លោកអ្នកអាចសាកល្បងស្វែងយល់ពីសកម្មភាព ឬ ទម្លាប់របស់លោកមួយចំនួនដូចជាការអានសៀវភៅជាដើម ព្រោះថាកាលពីពេលថ្មីៗនេះមហាសេដ្ឋីរូបនេះបានបង្ហាញពិភពលោកពីសៀវភៅមួយក្បាលដែលគាត់ចូលចិត្តអានបំផុត។ តើនោះគឺជាសៀវភៅអ្វី?

ដោយបានចុះផ្សាយនៅលើគេហទំព័រសារព័ត៌មាន The Wall Street Journal លោកប៊ីលហ្គេតបានបង្ហើបថា សៀវភៅដែលលោកចូលចិត្តបំផុតនោះមានចំណងជើងថា «Business Adventures ឬ ដំណើរផ្សងព្រេងនៃមុខជំនួញ»។

អ្វីដែលគួរឲ្យចាប់អារម្មណ៍នោះ គឺថាសៀវភៅនេះមិនមែនជាសៀវភៅដែលទើបនឹងបោះពុម្ពផ្សាយនៅពេលថ្មីៗនេះឡើយ។ វាត្រូវបាននិពន្ធឡើងដោយលោក John Brooks និងបោះពុម្ពផ្សាយកាលពីអំឡុងទសវត្សទី៦០។ សៀវភៅនេះមិនមានការបោះពុម្ពផ្សាយលក់បន្តទៀតឡើយចាប់តាំងពី ឆ្នាំ១៩៧១មក។

ទោះបីជាយ៉ាងនេះក្ដី លោកប៊ីលហ្គេតបានបញ្ជាក់ថា សំណាងល្អលោកបានសៀវភៅនេះនៅក្នុងដៃនាឆ្នាំ១៩៩១។ លោកបានបង្ហាញចំណាប់អារម្មណ៍ថាវានៅតែមានតម្លៃស្របតាមបរិបទសម័យបច្ចុប្បន្នសម្រាប់អ្នកជំនួញ ឬសហគ្រិនទាំងឡាយដែលចង់ស្វែងយល់ពីមុខជំនួញ។

លោកបានបន្ថែមថាសៀវភៅ «Business Adventures» បរិយាយអំពីភាពខ្លាំង និង ភាពខ្សោយរបស់អ្នកដឹកនាំដែលត្រូវប្រឈមមុខ ដែលផ្ដោតភាគច្រើននៅក្នុងវិស័យមុខជំនួញដែលមានតម្លៃជាអត្ថន័យ តែមិនមែនមានតម្លៃលើអាយុកាលរបស់វានោះឡើយ។

សូមបញ្ជាក់ថាសៀវភៅ « Business Adventures » ក៏ជាសៀវភៅសំណព្វចិត្តមួយក្នុងចំណោមសៀវភៅល្អៗជាច្រើនទៀតដែលមហាសេដ្ឋីជាប់ចំណាត់ថ្នាក់ទីពីរនៅលើលោករបស់មិកស៊ីកូ គឺលោក Carlos Slim ធ្លាប់បានអានមុនលោក Bill Gates ទៅទៀត៕