ប្រើកុំព្យូទ័រច្រើន គួរថែរក្សាភ្នែកដូចម្តេចខ្លះ?

ប្រើកុំព្យូទ័រច្រើន គួរថែរក្សាភ្នែកដូចម្តេចខ្លះ?

កិច្ចការងារនៅមុខកុំព្យូទ័រមានសារៈសំខាន់ណាស់សម្រាប់ការងារច្រើនប្រភេទ។ ប៉ុន្តែ មានមនុស្សតិចតួចណាស់ដែលដឹងអំពីវិធីការពារភ្នែកពីការប្រើប្រាស់កុំព្យូទ័រ។ កញ្ចក់កុំព្យូទ័រនឹងបញ្ជូនពន្លឺពណ៌ខៀវដែលគ្រោះថ្នាក់មកអោយភ្នែករបស់មនុស្ស ហើយការដែលប៉ះពាល់នឹងពន្លឺនេះយូរអាចនាំអោយមានបញ្ហាដល់ភ្នែករបស់មនុស្សបាន។

ទោះបីជាយ៉ាងណាក៏ដោយ ការដែលអ្នកប្រើប្រាស់វិធីការពារធម្មតាៗដូចខាងក្រោមនេះ វានឹងជួយកាត់បន្ថយការរលាក និងបញ្ហាស្ងួតភ្នែករបស់អ្នកបាន ទោះបីជាអ្នកប្រើកុំព្យូទ័ររយៈពេលយូរក៏ដោយ។

លាងសម្អាតកញ្ចក់កុំព្យូទ័រ
ភាពកខ្វក់ ធូលីដី និងស្នាមម្រាមដៃលើកញ្ចក់កុំព្យូទ័រនឹងធ្វើអោយអ្នកកាន់តែពិបាកមើល។ បើសិនជាអ្នកមិនខ្វល់ពីរឿងនេះ ហើយចេះតែបន្តវាទៀតនោះ វាអាចក្លាយទៅជាទម្លាប់មួយ ហើយអាចនាំអោយមានរោគឈឺក្បាលរ៉ាំរ៉ៃ ក្នុងពេលប្រើប្រាស់កុំព្យូទ័រយូរពេកបាន។
រឿងដែលល្អនោះគឺថា បញ្ហានេះអាចចៀសផុតបានយ៉ាងងាយ។ ចូរចំណាយពេលមួយនាទីដើម្បីលាងសម្អាតកញ្ចក់កុំព្យូទ័ររបស់អ្នកអោយបានរាល់ថ្ងៃ ដើម្បីបន្ថយសម្ពាធក្នុងភ្នែកពេលកំពុងតែប្រើប្រាស់។

ប្រើពន្លឺអោយបានគ្រប់គ្រាន់
ពន្លឺភ្លើងច្រើនពេក ដែលចេញពីកុំព្យូទ័រផ្ទាល់ និងពន្លឺព្រះអាទិត្យ សុទ្ធតែធ្វើអោយភ្នែកធ្វើការកាន់តែខ្លាំង ដែលដូចគ្នានឹងការមើលពន្លឺព្រះអាទិត្យផងដែរ។
ដូច្នេះ ចូរដាក់កុំព្យូទ័រអោយឆ្ងាយពីបង្អួចទាំងខាងមុខ ឬខាងក្រោយបង្អួច ប៉ុន្តែអាចដាក់នៅចំហៀងបាន ព្រោះវាអាចជួយបន្ថយកុំអោយមានពន្លឺចាំងខ្លាំងជាងមុនដែរ។

ឧស្សាហ៍ព្រិចភ្នែក
តាមពិត ការដែលមិនសូវព្រិចភ្នែកច្រើនដងក្នុងពេលសម្លឹងមើលកុំព្យួទ័រមិនមែនជារឿងល្អឡើយ។ ដូច្នេះ ការព្រិចភ្នែកជាញឹកញាប់ និងច្រើនដងពិតជាសំខាន់ណាស់ក្នុងពេលប្រើប្រាស់កុំព្យូទ័រ ព្រោះវានឹងជួយផ្តល់សំណើមដល់ភ្នែក និងបង្ការកុំអោយមានបញ្ហាភ្នែកស្ងួត និងរលាកបាន។
បើសិនជាភ្នែកនៅតែមានអារម្មណ៍ថាស្ងួត ឬរលាកទៀត ចូរប្រើប្រាស់ទឹកបន្តក់ភ្នែកដែលចេញដោយគ្រូពេទ្យ។ ហើយបើសិនជាអ្នកកំពុងតែមានបញ្ហាស្ងួតភ្នែករ៉ាំរ៉ៃ ឬរមាស់ភ្នែក ចូរប្រើប្រាស់កុំព្យូទ័រយួរដៃ ជំនួសការប្រើប្រាស់កុំព្យូទ័រលើតុវិញ។ នៅពេលអ្នកសម្លឹងមើលកុំព្យូទ័រយួរដៃ ភ្នែកទំនងជាមានសំណើមកាន់តែច្រើនជាងធម្មតា។

គោរពតាមក្បួន ២០-២០-២០
វិធីសាស្ត្រមួយផ្សេងទៀតដែលសាមញ្ញនោះគឺប្រើពេលសម្រាក ២០ វិនាទី ជារៀងរាល់ ២០ នាទី ដើម្បីសម្លឹងអ្វីមួយក្នុងរយៈចំងាយ ២០ ហ្វីត (៦ ម៉ែត្រ) ពីអ្នក។ វិធីសាស្ត្រដ៏ងាយមួយនេះនឹងជួយអោយអ្នករក្សាបាននូវជាតិសំណើមក្នុងភ្នែកបាន ហើយក៏អាចបន្ថយសម្ពាធក្នុងភ្នែកដែរ។

ពិនិត្យសុខភាពភ្នែកអោយបានរាល់ឆ្នាំ
អ្នកគួរតែមានទម្លាប់ទៅជួបពេទ្យភ្នែក ដើម្បីពិនិត្យអោយបានយ៉ាងហោចណាស់ម្តងដែរក្នុងមួយឆ្នាំ។ ព្រោះវាអាចជួយបង្ការកុំអោយមានបញ្ហាភ្នែកបើសិនជាអ្នកមិនទាន់មានបញ្ហានៅឡើយ ហើយក៏អាចតាមដាននូវអ្វីដែលអ្នកកំពុងតែមានបានដែរ។

ញ៉ាំអាហារពណ៌បៃតង
ក្រៅពីវិធីដូចបានរៀបរាប់ខាងលើ មានវិធីសាស្ត្រផ្សេងមួយចំនួនទៀតដែលអាចជួយថែរក្សាភ្នែករបស់អ្នកបាន នោះគឺការបន្ថែមបន្លែពណ៌បៃតងដូចជា ស្ពៃស្ពីណាច ប្រូខូលី សណ្តែកខៀវ ... ក្នុងរបបអាហារ។ វាគឺជារឿងសំខាន់ណាស់ដែលការបង្ការ និងការថែរក្សាភ្នែកចាប់ផ្តើមនៅពេលវេលាដែលត្រឹមត្រូវ៕

ប្រភព៖ health.com.kh

មុន បន្ទាប់

មតិយោបល់