ពិធីករ-ពិធីការិនី ជាង ១០០នាក់ទទួលការបណ្ដុះបណ្ដាលពីការនិយាយ

ពិធីករ-ពិធីការិនី ជាង ១០០នាក់ទទួលការបណ្ដុះបណ្ដាលពីការនិយាយ

ពិធីករ-ពិធីការិនី ប្រមាណជាង ១០០នាក់ មកពីប្រព័ន្ធផ្សព្វផ្សាយនានា បានចូលរួមសិក្ខាសាលាស្ដីពី “តួនាទី-ក្រមសីលធម៌វិជ្ជាជីវៈអ្នកអត្ថាធិប្បាយវិទ្យុ-ទូរទស្សន៍” កាលពី ម្សិលមិញនេះ។

កម្មវិធីរៀបចំឡើងដោយសមាគមពិធីករ-ពិធីការិនីកម្ពុជា សហការជាមួយក្រសួងព័ត៌មាន ក្រោមអធិបតីភាពឯកឧត្ដម ខៀវ កញ្ញារិទ្ធ រដ្ឋមន្ត្រីក្រសួង និងឯកឧត្តម ជា ច័ន្ទបរិបូរណ៍ រដ្ឋលេខាធិការក្រសួង។ ក្រៅពីនេះ ក៏មានការអញ្ជើញចូលរួមពីវាគ្មិនរៀមច្បង អ្នកមានបទពិសោធន៍លើប្រព័ន្ធផ្សព្វផ្សាយមួយចំនួន ចែករំលែកបទពិសោធន៍រយៈពេលមួយព្រឹកពេញ។

សំ ផានិត ជាសិក្ខាកាមមួយរូបបាននិយាយថា ពិតជាមានការសោកស្ដាយប្រសិនមិនបានមកចូលរួមនាពេលនេះ ព្រោះមានអាថ៌កំបាំងជាច្រើនដែលខ្លួនមិនទាន់បានដឹងនាពេលកន្លងមក ពាក់ព័ន្ធទៅនឹងការអត្ថាធិប្បាយលើប្រព័ន្ធផ្សព្វផ្សាយ ក្នុងនោះមានទាំងក្រមសីលធម៌ជាដើម។ ” ផ្នែកខ្លះទៀត យើងមិនដែលបានជួប និងបានឭនោះទេ”។

“គិតថាវគ្គនេះផ្ដល់ចំណេះដឹងច្រើន អ្វីដែលខ្ញុំមិនបានដឹងពីមុន ពេលនេះភ្លឺភ្នែកហើយ ព្រោះមិនធ្លាប់បានដឹងមែន”។ នេះជាការលើកឡើងរបស់កញ្ញា ឆែ ដានី មកពីវិទ្យុមហាជន។ ពិធីការិនីរូបនេះ និយាយថា អនាគតទៅមិនអាចនៅកាន់កម្មវិធីដដែលនោះទេ តែងមានការផ្លាស់ប្ដូរ កញ្ញាអាចទទួលបានចំណេះដឹងជាច្រើនផ្នែកលើប្រពន្ធផ្សព្វផ្សាយ បើទោះមិនបានសព្វជ្រុងជ្រោយដោយសារពេលខ្លីយ៉ាងណាក្ដី។

ពិធីការិនីវិទ្យុជាតិ អ្នកនាង អោម មុនិកា បានសម្ដែងការយល់ឃើញថា សិក្ខាសាលានេះជាការជួបគ្នារវាងអ្នកធ្វើការលើប្រព័ន្ធផ្សព្វផ្សាយភាគច្រើន ព្រោះមិនងាយមានឱកាសបែបនេះទេ។ “យើងក៏អាចជជែកវែកញែកលើកំហុសឆ្គងនៃការនិយាយឲ្យបានត្រឹមត្រូវ ដែលជាផ្នែកមួយនៃការលើកស្ទួយវិស័យភាសាខ្មែរ”។ គេធ្លាប់ឮការនិយាយពីកំហុសរបស់ពិធីករ ប៉ុន្តែមិនសូវមានអ្នកចែករំលែកនោះទេ៕
ប្រភព Sabay

មុន បន្ទាប់

មតិយោបល់