នាង អ៊ីត បើកកកាយរឿងអត់សូវហ៊ានសម្ដែងស្និទ្ធស្នាលជាមួយ ពែកមី

នាង អ៊ីត បើកកកាយរឿងអត់សូវហ៊ានសម្ដែងស្និទ្ធស្នាលជាមួយ ពែកមី

ជារឿយៗ គេឃើញតែតារាកំប្លែងស្រីស្អាតក្នុងក្រុមកំប្លែងនាយ ពែកមី គឺនាង អ៊ីត ចាប់គូសម្ដែងជាគូស្នេហ៍ ឬស្វាមីភរិយាតែជាមួយនាយ ក្រូច ជាបងប៉ុណ្ណោះ មិនដែលសូវហ៊ានសម្ដែងបែបនេះជាមួយនាយ ពែកមី ឡើយ។ តើមានបញ្ហាអ្វី នៅពីក្រោយរឿងនេះ?

នាង អ៊ីត

សាមីខ្លួនខាងស្រី នាង អ៊ីត បានបកស្រាយបញ្ហានេះជាមួយ Sabay នៅរោងភាពយន្ត Cineplex ថ្មីៗនេះ ក្នុងឱកាសសម្ពោធរឿង “អស់ទាស់ហ្មងទីតា”។ អ៊ីត និយាយថា នាងទទួលស្គាល់បញ្ហានេះ ថាពិតជាឧស្សាហ៍សម្ដែងជាមួយនាយ ក្រូច មែន ប៉ុន្តែអត់មានបញ្ហាមិនល្អអ្វីនៅពីក្រោយរឿងដែលថា នាង មិនសូវហ៊ានសម្ដែងជាមួយ ពែកមីដែរ។

សេន ចិន្តា ហៅ អ៊ីត បញ្ចេញឲ្យដឹងបន្ថែមថា ការចាត់ចែងឲ្យអ្នកណាដើរតួជាគូជាមួយអ្នកណា គឺជាភារកិច្ចរបស់នាយ ពែកមី ជាប្រធានក្រុម ហើយការចាត់ចែងនេះ គឺយោងទៅលើសាច់រឿង និងភាពសមគ្នាក្នុងការសម្ដែងប៉ុណ្ណោះ។

“ខ្ញុំឧស្សាហ៍ចាប់ដៃគូជាមួយបងក្រូចសម្ដែង ដោយសារថាយើងសម្ដែងសម និងទៅស៊ីចង្វាក់គ្នាល្អ ឯបងពែកមី គាត់លេងសមជាមួយខ្ញុង អីចឹងហើយគេចេះតែដាក់ឲ្យលេងរៀងខ្លួនគ្នាអីចឹងទៅ ប៉ុន្តែម្ដងម្កាលខ្ញុំលេងជាមួយគាត់ដែរតើ!”។

នាង អ៊ីត

អ៊ីត បន្ថែមថា នៅក្នុងកម្មវិធី “រាត្រីកម្សាន្ត” នាង និងនាយ ពែកមី ពិតជាអត់ដែលសម្ដែងជាមួយគ្នាមែន ប៉ុន្តែនៅក្នុងកម្មវិធី “សំណើចតាមភូមិ” គឺពួកនាង បានជួបសម្ដែងជាមួយគ្នាម្តងម្កាលដែរ។ ដោយឡែករឿងថា នាងកំណាញ់ខ្លួនមិនសម្ដែងស្និទ្ធស្នាលជាមួយ ពែកមី អាចថាមកពីស្វាមីនាងប្រចណ្ឌ ដោយសារតែមេក្រុមតែងលេងស្និទ្ធនោះ ក៏មិនមែនដែរ។

តារាកំប្លែងមកពីខេត្តកំពង់ស្ពឺរូបនេះ ប្រាប់ថា ស្វាមីរបស់នាងអត់មានប្រចណ្ឌអីទេ ពួកនាងធ្វើការងារប្រកបដោយការយល់ចិត្តគ្នាទៅវិញទៅមក។ ចំពោះការសម្ដែង ប្រសិនបើមានការតម្រូវឲ្យសម្ដែងស្និទ្ធស្នាលនោះ ទោះជាមួយអ្នកណាក៏ដោយក្នុងក្រុម គឺនាង អាចសម្ដែងបានទាំងអស់ ។ “រឿងខ្លាច…អត់មានខ្លាចទេបង ព្រោះសិល្បៈតែប៉ុណ្ណឹង!”។

អ្នកនាង សេន ចិន្តា ហៅ អ៊ីត បានប្រឡូកចូលសិល្បៈតាំងពីឆ្នាំ ២០០៩។ កាលណោះ អ្នកនាង និងនាយក្រូចជាបង បានដាក់ពាក្យប្រឡងក្នុងកម្មវិធី “មហាកំប្លែង” ហើយជាលទ្ធផល គឺបានជាប់ទាំងពីរនាក់បងប្អូន។ អ្នកនាង រៀបការរួចហើយ តាំងពីមុនសិល្បៈជាមួយស្វាមីឈ្មោះ ឡេង ប៊ុនហម បច្ចុប្បន្ន មានកូនស្រីម្នាក់អាយុ ១១ឆ្នាំ។

ក្រៅពីអាជីពកំប្លែង អ៊ីត បានបើកក្រុមតន្ត្រីមួយដាក់ឈ្មោះ “តន្ត្រីស្រីអ៊ីត” នៅស្រុកកំណើតខេត្តកំពង់ស្ពឺ ហើយស្វាមីរបស់នាង គឺជាមើលការខុសត្រូវលើវង់តន្ត្រីនេះ៕

ប្រភព Sabay

មុន បន្ទាប់

មតិយោបល់