lino11 ជុំ លីណូ ប្រកាសរកជំនួយឧបត្ថម្ភ

lino11 ជុំ លីណូ ប្រកាសរកជំនួយឧបត្ថម្ភ

ជុំ លីណូ កំពុងប្រកាសស្វែងរកជំនួយឧបត្ថម្ភ សម្រាប់ប្រារព្ធធ្វើពិធីបុណ្យមួយនៅក្នុងស្រុកភូមិរបស់ខ្លួននៅអំឡុងថ្ងៃទី ១៤ ខែ មិថុនា ខាងមុខនេះ។

តារាចម្រៀងរូបនេះ បានប្រាប់ Sabay នៅព្រឹកមិញថា ពិធីបុណ្យនេះ ក្នុងគោលបំណង ជំរុញឲ្យមានសាមគ្គីភាពរវាងអ្នកភូមិរបស់ខ្លួន ជាមួយភូមិដទៃទៀត តាមរយៈការបង្កើតឲ្យមានការប្រកួតកីឡាបាល់ទាត់ជាដើម ដោយសហការជាមួយព្រះគ្រូចៅអធិការ និង គណៈកម្មការវត្តអង្គមេត្រី ហៅវត្តព្រះឃ្លាំង។

ព្រះសង្ឃ និង គណៈកម្មការ ជាអ្នកដើរតួក្នុងការអប់រំ ប្រជាពលរដ្ឋ ឲ្យជៀសឆ្ងាយអំពីការប្រើប្រាស់គ្រឿងញៀន និង អំពើហិង្សាទាំងឡាយនៅក្នុងគ្រួសារ និង ហិង្សាផ្សេងៗទៀតនៅក្នុងភូមិឃុំ ហើយត្រូវដោះស្រាយបញ្ហាដោយសន្តិវិធី រាល់វិវាទទាំងឡាយ។

ទោះបីជាយ៉ាងណា ក្នុងនាមគណៈកម្មការរៀបចំកម្មវិធីនេះ លីណូ ធ្វើការស្នើឲ្យមានការចូលរួមឧបត្ថម្ភពីអ្នករួមអាជីព និង សប្បុរសជនទាំងអស់ ដើម្បីឲ្យពិធីនេះដំណើរការទៅបានដោយរលូន និង សល់បានបច្ច័យក្នុងការកសាងវត្តនេះ បន្តទៀតផងដែរ ទុកជាទីកន្លែងអប់រំផ្លូវចិត្តមួយយ៉ាងសំខាន់សម្រាប់អ្នកភូមិរបស់គេ។

ឆ្នាំកន្លងទៅ ក្រៅពីការចូលរួមកម្សាន្ត របស់ប្រជាពលរដ្ឋមកពីទីកន្លែងនានាជាច្រើននោះ ក៏មានអ្នកសិល្បៈខ្លះចូលរួមផងដែរ កាលរូបគេរស់នៅក្នុងទ្រនំផលិតកម្ម Sunday ។ បើទោះបីជាពេលនេះ រូបគេមករួមរស់ក្រោមដំបូលផលិតកម្ម Diamond Music យ៉ាងណាក៏ដោយ នៅតែមានសង្ឃឹមថា អ្នករួមអាជីព នឹងចូលរួមក្នុងសកម្មភាពនេះបន្តទៀត៕