ឆាយ វីរៈយុទ្ធថា នឹងធ្វើឱ្យទស្សនិកជនភ្ញាក់ផ្អើលក្នុងពេលឆាប់ៗ!

ឆាយ វីរៈយុទ្ធថា នឹងធ្វើឱ្យទស្សនិកជនភ្ញាក់ផ្អើលក្នុងពេលឆាប់ៗ!

តារាចម្រៀងពូកែដាក់មនោសញ្ចេតនា លោក ឆាយ វីរៈយុទ្ធ ប្រាប់ Sabay ថា លោកនឹងមានរបស់ថ្មីប្លែកជាទីទាក់ទាញពីទស្សនិកជនក្នុងពេលឆាប់ៗខាងមុខ។

ការលើកឡើងរបស់តារាចម្រៀងល្បីឈ្មោះរូបនេះ ខណៈដែលគេដឹងថា ផលិតកម្មសាន់ដេត្រៀមថតបីរឿងក្នុងឆ្នាំ ២០១៤ ក្នុងនោះរឿងទីមួយបានលេចចេញជារូបរាងហើយគឺ “សង្សារខ្មោច” មានលោក នីកូ និង កញ្ញា សុខ ពិសីជាតួឯក។

ហេតុផលអាចក្លាយជាតួឯកក្នុងខ្សែភាពយន្តពីររបស់សាន់ដេ ដែលនៅសល់ឬយ៉ាងណាទើបធ្វើឱ្យលោក ឆាយ វីរៈយុទ្ធលើកឡើងដូច្នេះ?

chay-Vireak-yuth

ឆាយ វីរៈយុទ្ធ ច្រៀងក្នុងកម្មវិធីកាលពីពេលកន្លងទៅ

លោក ឆាយ វីរៈយុទ្ធបានឱ្យដឹងថា ក្នុងពេលឆាប់ៗខាងមុខលោកនឹងបង្ហាញភាពប្លែកៗ និងថ្មីដើម្បីឱ្យប្រិយមិត្ត និងមិត្តៗយុវវ័យជាអ្នកគាំទ្ររបស់ខ្លួនរំភើបសប្បាយចិត្ត។ “តម្រូវការទីផ្សារបច្ចុប្បន្ន ដូច្នេះហើយខ្ញុំត្រូវតែរកអ្វីដែលថ្មី និងប្លែកជូនទស្សនិកជនដើម្បីកុំឱ្យពួកគាត់អុញទ្រាន់ ហើយបន្តគាំទ្រខ្ញុំតទៅទៀត”។

ទោះជាយ៉ាងណាក៏ដោយអតីតតារាចម្រៀងល្បីឈ្មោះក្នុងផលិតកម្ម M និង Bigman ខាងលើមិនព្រមបង្ហើបឱ្យដឹងថា តើការធ្វើឱ្យទស្សនិកជនភ្ញាក់ផ្អើលក្នុងពេលឆាប់ៗនោះអ្វីឡើយ។ លោកថាទស្សនិកជននឹងបានដឹងក្នុងពេលដ៏ខ្លីខាងមុខ។

នៅពេលចោទសួរថា តើការត្រៀមធ្វើឱ្យទស្សនិកជនភ្ញាក់ផ្អើលនោះ គឺមានការរៀបចំខ្លួនប្លែក បទចម្រៀងថ្មីៗជាទីទាក់ទាញ និង ការអាចក្លាយជាតួឯកក្នុងផលិតកម្មសាន់ដេឬយ៉ាងណា។ តារាចម្រៀងមានឈ្មោះដើម ប្រុក ឆោម អះអាងថា ចំណុចអស់ទាំងនេះក៏ជាការរួមចំណែកមួយផងដែរក្នុងការធ្វើឱ្យទស្សនិកជនចាប់អារម្មណ៍ក្នុងពេលខាងមុខ។

ម្ចាស់បទ “សង្សារលួចលាក់” ចង់ឱ្យប្រិយមិត្ត និង មិត្តៗយុវវ័យតាមដានសកម្មភាពរបស់ខ្លួនរៀងរាល់ពេលដើម្បីដឹងថា អ្វីដែលថ្មី និង ប្លែកលោកត្រៀមនឹងផ្ដល់ជូន។ លោកលើកឡើងថា ពេលនេះទាំងរូបលោក ក៏ដូចជាក្រុមហ៊ុនសាន់ដេកំពុងតែញាប់ដៃញាប់ជើងក្នុងការរៀបចំណីអារម្មណ៍ថ្មីដល់ទស្សនិកជនក្នុងពេលដ៏ខ្លីខាងមុខ។

chay-Vireak-yuth

មុននឹងឈរជើងនឹងដល់ពេលបច្ចុប្បន្ន លោក ឆាយ វីរៈយុទ្ធ ធ្លាប់ច្រៀងក្នុងផលិតកម្មជាច្រើនដូចជា ក្នុង ឆ្នាំ ២០០០ លោកបានបោះជំហានដំបូងចូលទៅកាន់ផលិតកម្ម រស្មីស្ទឹងសែន។

ក្រោយមកលោកបានចូលទៅច្រៀងក្នុងផលិតកម្ម Blue Diamond ។ កេរ្តិ៍ឈ្មោះរបស់លោក ឆាយ វីរៈយុទ្ធ ចាប់ផ្ដើមគេទទួលស្គាល់ច្រើននៅពេលឈានជើងមកចូលផលិតកម្ម M។ ក្រោយពីចាកចេញពីផលិតកម្ម M លោកបានបោះជំហានចូលទៅកាន់ផលិតកម្ម Big Man ហើយក្រោយមកច្រៀងក្នុងផលិតកម្ម សាន់ដេ ដល់ពេលបច្ចុប្បន្ន៕

ប្រភព Sabay

មុន បន្ទាប់

មតិយោបល់