អេ ភូថង និងភរិយា បន្តលាតត្រដាង ពីជីវិតកម្សត់

អេ ភូថង និងភរិយា បន្តលាតត្រដាង ពីជីវិតកម្សត់

រាជធានីភ្នំពេញ ៖ បើទោះជាបានទទួលជំនួយម៉ូតូមួយគ្រឿង និងគ្រឿង ឧបភោគបរិភោគ ធ្វើឲ្យស្ថានភាពរស់នៅបានល្អប្រសើរ ជាងមុនបន្តិចក្ដី ក៏អតីតកីឡាករ ប្រដាល់ល្បីឈ្មោះ លោក អេ ភូថង និងភរិយា នៅតែមិនទាន់រួចផុតពីភាពក្រ លំបាកនោះឡើយ ។ អ្នកទាំងពីរថ្លែងថា ការរស់នៅសម្រាប់ តែប្ដីប្រពន្ធនិងកូន មិនចោទនោះទេ ប៉ុន្តែមកពីកូនសិស្សប្រមាណ ១៧នាក់នៅក្រោមបន្ទុកទើប នៅមិនទាន់រួចខ្លួន ។

លោក អេ ភូថង ថ្លែងថា ការបង្ហាញស្ថានភាពលំបាកក្នុង មួយរយៈចុងក្រោយ បានធ្វើឲ្យលោក ទទួលការអាណិតអាសូរយ៉ាងខ្លាំង ពីសំណាក់អ្នកធ្លាប់ គាំទ្រដោយមាន ទាំងព្រះសង្ឃ និងអ្នកស្នេហា ប្រដាល់ផង ។ ក្រុមសប្បុរសជន ទាំងនោះបានពួត ដៃគ្នាផ្ដល់ជាអង្ករ ត្រីសាច់ និងថវិកាតិចតួច ដោយមានទាំង អ្នកផ្ដល់ម៉ូតូមួយគ្រឿង បន្ទាប់ពីដឹង ថាលោកស្ទើរ តែគ្មានអ្វីជាបង្អែកក្នុងជីវិត កាលពីពេលថ្មីៗនោះ ទៀតផង។ អ្វីដែលបាន ស្ដែងឡើង លោកថា មិនមែនជាឆាក ល្ខោនដើម្បីស្រូបទាញ ជំនួយបម្រើឲ្យផល ប្រយោជន៍ផ្ទាល់ ខ្លួននោះទេ ប៉ុន្តែគឺជាខ្សែជីវិតដែលមនុស្ស ភាគច្រើនមិនបានដឹងថា នៅពីក្រោយការលា ឈប់ប្រដាល់ របស់លោក តើលោក មានជីវភាពបែបណា នោះឡើយ ។ ជារៀងរាល់ ថ្ងៃលោកថា មិនខុសពីជីវិត ដែលខ្វះមុខ ខ្វះក្រោយនោះទេ ដោយសារតែកូន៤នាក់ ហើយត្រូវចិញ្ចឹម ទំនុកបម្រុងកូន សិស្សចំនួន ១៧នាក់ទៀត ព្រោះតែចិត្ត មិនដាច់ឲ្យ កីឡាករគ្មានទីពឹងទាំងនោះធ្លាក់ខ្លួន តែលតោល ។ ជារឿយៗលោកតែងដឹកនាំកូនសិស្សចែកជើងគ្នាធ្វើសំណង់ដើម្បីដោះទ័ល និងបានបន្តជីវិតរស់នៅទីក្រុងភ្នំពេញ កុំឲ្យធ្លាក់ខ្លួនក្នុង សភាពកាន់តែយ៉ាប់ជាង នេះនៅពេល ទៅនៅឆ្ងាយពីក្រុង ។ គាប់ជួនជាលោក នៅតែរក្សាមហិច្ឆតា ចង់ដឹកនាំក្លិបប្រដាល់ «អេភូថងកីឡា» ឲ្យបានរស់រាន កុំឲ្យរលាយបាត់ផង ទើបលោកចេះតែស៊ូទ្រាំ លំបាកគ្រប់យ៉ាង ទម្រាំឆ្លងផុតមួយខែៗ ។

អតីតកីឡាករជើងខ្លាំងរូបនេះនិយាយថា ៖ «ការពិតបើតាមតែខ្ញុំ ជាមួយប្រពន្ធកូន គឺអាចរស់បាន ទោះមិនសូវស្រណុកបន្តិចក្ដី ប៉ុន្តែមកពីក្នុង ក្លិបខ្ញុំមានកូនអ្នក ស្រុកអ្នកភូមិសុទ្ធ តែជាអ្នកអត់យក មកផ្ញើឲ្យ ហាត់ប្រដាល់ ហើយមិនដឹងបោះ ចោលគ្នាទៅណា ទើបធ្វើឲ្យខ្ញុំពិបាក សឹងតែមានថ្ងៃ អត់បាយ នៅពេលមិន ទាន់មានអ្នកណាចាប់អារម្មណ៍ថាខ្ញុំអត់ ! ខ្ញុំនិយាយតាមត្រង់ រាល់ថ្ងៃខ្ញុំអត់ មែនទែន គឺអ្នកដឹងបានដឹង!» ។ លោកបាន សម្ដែងការដឹងគុណចំពោះ សប្បុរសជនដែលបាន ផ្ដល់ការ អាណិតអាសូរដល់លោក ហើយបានជួយ ជាអង្ករ ត្រីសាច់ បើទោះជាជំនួយទាំងនោះ មិនអាចឲ្យលោក និងកូនសិស្សទាំង ១៧នាក់នៅក្រោម បន្ទុករស់បាន យូរអង្វែងក្ដី ។ លោកមើលឃើញពី ជំហររស់រានសម្រាប់សិស្ស និងក្លិបទាំងមូល បន្ទាប់ពីមានការ ជ្រោមជ្រែងជាអង្ករ ត្រីសាច់ដែលពីមុនមកមិន ដែលនឹកស្មានថា នឹងមានអ្នកអាណិត អាសូរបែបនេះទេ ។ លោក អេ ភូថង បញ្ជាក់ថា ៖ «ការពិតកន្លងមកខ្ញុំ លំបាកណាស់ គឺនិយាយមិនរួច ប៉ុន្តែអត់ដែលហ៊ាន ឲ្យគេបង្ហោះអីទេ គឺទើបតែលើក ហ្នឹងដែលខ្ញុំអត់ពេកដាច់ចិត្ត ប្រាប់គេតាមត្រង់ ថាអ្វីដែល គេនិយាយ និងបង្ហោះនោះគឺជាការពិត ហើយក៏ឃើញថា មានអ្នកអាណិតមែន»។ យ៉ាងណាក៏ដោយ លោកអះអាងថា នឹងប្រឹងរកផ្លូវ ឲ្យសិស្ស និងក្លិបរស់បាន ដោយមិនពឹងលើជំនួយបែបនេះ ទៀតទេ ដើម្បីកុំឲ្យអ្នកជួយ ជ្រោមជ្រែងអស់សង្ឃឹម ពេលលោកនៅ តែគ្មានជំហានថ្មី ។ លោកបង្ហាញពីហេតុផល ដែលនាំឲ្យខ្លួន និងក្លិបរអិលធ្លាក់ ក្នុងសភាពក្រីក្រថា គឺបណ្ដាលមក ពីកូនសិស្សនៅ ក្នុងក្លិបរបស់លោក មិនសូវមានការ ជួយជ្រោមជ្រែងពី ប៉ុស្ដិ៍ទូរទស្សន៍ភាគច្រើន ដើម្បីឲ្យបាន ប្រដាល់ញឹកញាប់ ខណៈដែលលោកចាប់ តាំងពីបាន សម្រេចចិត្តបើកក្លិប បង្វឹកហើយ ក៏សុខចិត្តស៊ូទ្រាំ ប្រមូលថវិកាពីគ្រប់ទិស ទីដែលខ្លួនរកបានមកចិញ្ចឹម កីឡាករទាំងនោះ អស់ ប្រមាណច្រើនឆ្នាំ មកហើយ ។

អ្នកស្រី សាំង សុម៉ាលី ភរិយាលោក អេ ភូថង បានថ្លែងពាក់ព័ន្ធនឹង បញ្ហានេះថា ក្រោយការលា ឈប់ប្រដាល់ ស្វាមីអ្នកស្រី មិនអាចរក ចំណូលអ្វីបានក្រៅពី ទៅបង្ហាត់សិស្ស នៅក្នុងក្លិបផ្សេង និងជួយធ្វើការឲ្យ គេតិចតួចនោះទេ ។ ក្នុងនោះសកម្មភាព ថតកុនក៏ជា ប្រភពចំណូលតិចតួច ដើម្បីប្រើសម្រាប់ ផ្គត់ផ្គង់ផងដែរ ខណៈដែលអ្នកស្រីក៏បានចំណូល ពីការងារធ្វើជា គណៈកម្មការប្រដាល់ នៅទូរទស្សន៍បាយ័ន គឺយកមកទប់ ចំណាយនៅក្នុង ក្លិប«អេភូថងកីឡា» ទាំងអស់ ។ អ្នកស្រីថ្លែងថា ស្វាមីចូលចិត្ត អាណិតសិស្ស និងទទួលសិស្សក្រី ក្រមកនៅ ក្រោមបន្ទុកណាស់ ទើបចំនួនអ្នកអត់ ដែលចូលមករស់ នៅក្នុងក្លិបកើន ដល់១៧នាក់ ដែលធ្វើឲ្យអ្នកស្រី និងស្វាមី ត្រូវបង្កើនការប្រឹងប្រែងដើម្បី បានអង្ករគ្រប់ មួយពេលៗ ។ អ្នកស្រីនិយាយ ដោយត្រង់ថា ៖ «អ្នកទាំងអស់ គ្នាមិនដឹងទេ កាលពីមួយរយៈមុន ដោយសារតែពួក ខ្ញុំអត់មែនទែន ស្វាមីខ្ញុំ និងសិស្សគាត់ធ្លាក់ ខ្លួនធ្វើសំណង់តែ ម្ដងដើម្បីកុំឲ្យក្លិបប្រដាល់ ហ្នឹងរំសាយចោល ម្យ៉ាងសិស្ស ទាំងអស់គ្នាហ្នឹង ចង់ប្រដាល់ព្រោះ សុទ្ធតែជាអ្នកអត់ អញ្ចឹងមានតែទ្រាំចិញ្ចឹមទៅ មានតិចហូបតិច មានច្រើនហូប ច្រើនអញ្ចឹងទៅ» ។ នៅក្នុងផ្ទះផ្ទាល់ខ្លួន អ្នកស្រីប្រាប់ថា សូម្បីតែទូដែលបានទិញប្រើ ក្នុងពេលរក លុយបាន ក៏ត្រូវដាក់លក់ ឡាយឡុងដើម្បីយក លុយទិញអង្ករឲ្យសិស្ស និងកូនៗបានហូបជារៀងរាល់ថ្ងៃនោះ ដែរក្នុងពេល ដែលតម្រូវការគឺ មានរាល់ថ្ងៃ ប៉ុន្តែចំណូលដែល បានពីការចិញ្ចឹមសិស្ស គឺមិនមានសោះ ភាគច្រើន។

មន្ត្រីគណៈកម្មការប្រដាល់ប្រចាំនៅស្ថានីយទូរទស្សន៍បាយ័នរូបនេះថ្លែងថា ៖ «កាលបើក ក្លិបហ្នឹងដំបូង ខ្ញុំនិងប្ដីមិនសូវចោទទេ ទោះគេមិនសូវចាប់ គូកូនសិស្សឲ្យ ប្រកួតញឹកក៏ដោយ។ ប៉ុន្តែក្រោយពេល ពួកខ្ញុំធ្លាក់ខ្លួន គឺស្អីក្នុងផ្ទះក៏លក់ដែរ ព្រោះអង្ករ ២៥គីឡូក្រាមដាំបាន តែ៣ ទៅ៤ថ្ងៃប៉ុណ្ណោះ អញ្ចឹងហើយទើប ពួកខ្ញុំមិនដែល បានហូបអង្ករល្អទេ គឺទិញតែអង្ករទាហាន មកហូប ដើម្បីទប់រួច!»។ អ្នកស្រីថ្លែងថា សម្រាប់ការ ឡើងប្រដាល់ មួយលើករបស់កូនសិស្សទទួលបាន ប្រាក់ឧបត្ថម្ភ ពីប៉ុស្ដិ៍ទូរទស្សន៍ ១៥ម៉ឺនរៀល និងត្រូវបានសិស្ស ផ្ដល់ឲ្យតាម ទឹកចិត្ត ប៉ុន្តែជាក់ស្ដែងមកពីការផ្គូផ្គង មិនមានការ ជ្រោមជ្រែងទើបធ្វើឲ្យក្លិប ត្រូវដាច់ពោះក្នុង រយៈពេលចុងក្រោយ ។ ក្នុងមួយ
សប្ដាហ៍ពេលខ្លះ មិនមានការ ផ្គូផ្គងឲ្យប្រកួត ម្នាក់ផង បើទោះជាអ្នកស្រី និងស្វាមីទទូច សុំឲ្យជួយដាក់ សិស្សប្រកួតតាមប៉ុស្ដិ៍ក្ដី ។

ប្រភពក្រៅផ្លូវការបញ្ជាក់ថា កីឡាករនៅក្នុងក្លិប «អេភូថងកីឡា» ភាគច្រើនមិន សូវជាអន់ប៉ុន្មានទេ ប៉ុន្តែមកពីការផ្គូផ្គងតាម ប៉ុស្ដិ៍គេត្រូវការ ខ្សែច្រើនជាង ទើបពិបាកមានមុខ ។ ក្នុងនោះមានការ អះអាងថា ដើម្បីបាន ទទួលការផ្គូផ្គងគឺត្រូវ សូកប៉ាន់អ្នក ផ្គូផ្គងបណ្ដាលឲ្យក្លិប និងកីឡាករដែល គ្មានបង្អែកស្ទើរ តែគ្មានទីផ្សារតែម្ដង។ យ៉ាងណាក៏ដោយអ្នកស្រី សាំង សុម៉ាលី ប្រាប់ថា ពាក់ព័ន្ធនឹង បញ្ហាហ្នឹងអ្នក ស្រីមិនធ្លាប់ជួប ប្រទះនោះទេ ប៉ុន្តែមកពីកីឡាករនៅក្នុងក្លិប ផ្សេងមានចំនួន ច្រើនពេក ទើបទម្រាំដល់ ជុំត្រូវផ្ដល់ ឱកាសឲ្យកីឡាករ ក្លិបអេភូថងកីឡាឡើង វាយគឺមានរយៈពេល យូរបែបនេះ ៕