ក្រុមអាជីវករ ក្រុងព្រះសីហនុ ត្អូញត្អែរថា ការតាំងពិព័រណ៍ ពាណិជ្ជកម្ម មិត្តភាពកម្ពុជា-ថៃ ធ្វើឱ្យពួកគាត់ ដាច់បាយ

ក្រុមអាជីវករ ក្រុងព្រះសីហនុ ត្អូញត្អែរថា ការតាំងពិព័រណ៍ ពាណិជ្ជកម្ម មិត្តភាពកម្ពុជា-ថៃ ធ្វើឱ្យពួកគាត់ ដាច់បាយ

ខេត្តព្រះសីហនុ ៖ ពលរដ្ឋដែលមានលំនៅឋាន នៅចំណុចអតីតមហោស្រពចាស់ និងគ្លីនិកឯកជនចំនួន ២កន្លែងផងដែរ ស្ថិតនៅក្នុងភូមិ២ សង្កាត់២ ក្រុងព្រះសីហនុ ក៏ដូចជាមន្ត្រីរាជការ អាជីវករលក់ដូរ បានត្អូញត្អែរថា បន្ទាប់ពីអាជ្ញាធរក្រុង/ខេត្ត បានអនុញ្ញាតឱ្យជនជាតិថៃមកដាក់តាំងពិព័រណ៍ លក់ទំនិញគ្រប់ប្រភេទនៅក្នុង ខេត្តជាច្រើនលើកនាពេលកន្លងមកនោះ ធ្វើឱ្យពួកគាត់ត្រូវប្រឈម នឹងការដាច់បាយ ដោយសារតែត្រូវបង្ខំ ចិត្តបិទតូបលក់ដូររបស់ខ្លួនព្រោះគ្មានអ្នកចូលទិញ ខណៈដែល ផ្សារចល័តរបស់ថៃ នាំចូលអីវ៉ាន់គ្រប់ប្រភេទ សម្រុកចូលយ៉ាងគំហុកមកកាន់ខេត្តព្រះសីហនុ ដោយជ្រកក្រោមស្លាកការ តាំងពិព័រណ៍មិត្តភាពកម្ពុជា-ថៃ ។

លោកអភិបាលរងខេត្តម្នាក់ សុំមិនបញ្ចេញឈ្មោះបានឱ្យដឹង តាមទូរស័ព្ទកាលពីរសៀលថ្ងៃទី៤ សីហា ២០១៥ ថា ផ្អែកតាម លិខិតលេខ៣៦៦ (សជណ/១៥) ចុះថ្ងៃទី១៦ កក្កដា ២០១៥ របស់លោក ឈិត សុខុន អភិបាលខេត្ត ដែលបានជម្រាប មកលោកស្រី តាន់ ទ្រីយ៉ា នាយិកាក្រុមហ៊ុន តាន់ ហ៊ួត ដែលបានសហការ ជាមួយអាជីវករលក់ដូរខេត្តច័ន្ទបូរី ខេត្តត្រាវ និងខេត្តស្រះកែវ ប្រទេសថៃ ក្នុងករណីសុំការអនុញ្ញាត រៀបចំពិព័រណ៍មិត្តភាពកម្ពុជា-ថៃ ដែលបានប្រព្រឹត្ត ឡើងកាលពីថ្ងៃទី២៩ កក្កដា ដល់ថ្ងៃទី៣ ខែសីហា ឆ្នាំ២០១៥ កន្លងមកនោះ គាត់សង្កេតឃើញថា លោកស្រីមិនបានអនុវត្តឱ្យ បានល្អប្រសើរទៅតាមការណែនាំរបស់ លោកអភិបាលខេត្តឡើយ ។

ដូចជា ការណែនាំឱ្យក្រុមហ៊ុនខាងលើ ត្រូវទំនាក់ទំនងឱ្យបានល្អ ជាមួយអាជ្ញាធរមូលដ្ឋាន សមត្ថកិច្ចពាក់ព័ន្ធនានា ដើម្បីធានាបាននូវសន្តិសុខ សណ្តាប់ធ្នាប់សាធារណៈ និងរក្សាអនាម័យ បរិស្ថានក្នុងអំឡុងពេល និងក្រោយពេលនៃការតាំងពិព័រណ៍ ដូចជា ការប្រើប្រាស់ទឹកស្អាត បង្គន់អនាម័យ បន្ទប់ទឹក... ។ល។

ប្រភពដដែល បានបន្ថែមថា លោកស្រីនាយិកា ក្រុមហ៊ុនខាងលើ មិនមានភាពទំនួលខុសត្រូវ លើបញ្ហាដែលបានលើកឡើងខាងលើនោះទេ បណ្តែតបណ្តោយឱ្យអតិថិជន ក៏ដូចជាភ្ញៀវទេសចរជាតិនិងអន្តរជាតិ ដែលមកចូលរួមក្នុងកម្មវិធី បត់ជើងតូច-ធំពាសវាលពាសកាល បណ្តាលឱ្យជះក្លិនឆ្អេះឆ្អាបនៅ លើទីលានសួនច្បារសាធារណៈ ដែលជាផលប៉ះពាល់ យ៉ាងធ្ងន់ធ្ងរផ្នែកបរិស្ថាន និងប្រជាពលរដ្ឋដែល មានលំនៅឋានក្បែរនោះ ។

មន្ត្រីសភាពាណិជ្ជកម្មខេត្តម្នាក់ សុំមិនបញ្ចេញឈ្មោះ បានឱ្យដឹងដែរថា ជុំវិញការតាំងពិព័រណ៍ ពាណិជ្ជកម្មមិត្តភាពកម្ពុជា-ថៃ ខាលើនេះ លោកស្រីនាយិកាក្រុមហ៊ុន មិនបានមកធ្វើការផ្លាស់ប្តូរយោបល់ ទៅវិញទៅមកដើម្បីរិះរកមធ្យោបាយក្នុងការរក្សាទៅ លើគុណភាពទំនិញគ្រប់ប្រភេទ ដែលត្រូវយកមកដាក់ តាំងបង្ហាញផលិតផលរវាងប្រទេសទាំងពីរនោះឡើយ ដែលជាលក្ខណៈឆ្គាំឆ្គងទៅ នឹងស្ថាប័នពាក់ព័ន្ធផ្នែក ពាណិជ្ជកម្មខេត្ត ។

ប្រជាពលរដ្ឋ មន្ត្រីរាជការ អាជីវករលក់ដូរ សំណូមពរដល់អាជ្ញាធរ ក្រុងក៏ដូចជាអាជ្ញាធរខេត្ត និងសម្តេចក្រឡា ហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ សូមមេត្តាជួយសម្រួល ដល់ពួកគាត់ ដែលជាអាជីវករលក់ដូរនៅក្នុង ខេត្តព្រះសីហនុទាំងមូលផង បើសកម្មភាពនេះ នៅតែបន្តទៀត ពួកគាត់នឹងគ្រោងសុំជួយអន្តរាគមន៍ ពីសម្តេចអគ្គមហាសេនាបតីតេជោ ហ៊ុន សែន ជាក់ជាមិនខាន ៕