កណ្តាល៖ ជនបង្ក២នាក់ ត្រូវបានកម្លាំង កងរាជអាវុធហត្ថ ស្រុកអង្គស្នួល និងស្រុកស្អាង ខេត្តកណ្តាល ចាប់ខ្លួន ភ្លាមៗ ក្រោយពេលដែលពួកគេ បានប្រើអំពើហិង្សា នៅក្នុងគ្រួសារ ដោយម្នាក់ស្រវឹងវាយបំផ្លាញ សម្ភារៈហើយ ដេញកាប់ ប្រពន្ធ កូន និងម្នាក់ទៀត បំផ្លិញបំផ្លាញទ្រព្យសម្បត្តិ គំរាមវាយម្តាយ និងមិនអោយឪពុកចូលផ្ទះ ។

យោងតាមរបាយការណ៏ របស់មន្រ្តីអាវុធហត្ថ ខេត្តកណ្តាល បានឲ្យដឹងថា ករណីទី១ បានកើតឡើង នៅវេលាម៉ោង ៦:៣៥នាទី ល្ងាចថ្ងៃទី១៤ ខែសីហា ឆ្នាំ២០១៥ នៅចំណុផ្ទះលក់នំបុ័ងយីហោ ឈាង ម៉េងហុង ស្ថិតនៅក្នុងភូមិចុងបង្គោល ឃុំបែកចាន ស្រុកអង្គស្នួល ដែលជនរងគ្រោះជាប្រពន្ធ មានឈ្មោះ បុិច ចន្ធី អាយុ៣៦ឆ្នាំ មុខរបរលក់នំបុ័ង ដោយឡែកជនបង្កជាប្តី មានឈ្មោះ ឈាង សាម៉េត អាយុ៤៦ឆ្នាំ​ មុខរបរ លក់នំបុ័ង ស្រុកកំណើតភូមិទួលចារ ឃុំសំរោង ស្រុកសំរោង ខេត្តតាកែវ ។

មុនពេលកើតហេតុ នៅមុនម៉ោង១២ថ្ងៃត្រង់ ជនសង្ស័យ(ប្តី)បានត្រឡប់ពី ផឹកក្រៅផ្ទះវិញ បានផឹកស្រាសាច់ដុំអស់១ដបនិង ABC ០២កំប៉ុងបន្ថែមទៀត បានឡូឡា រករឿងវាយប្រពន្ធមួយដៃនិង កាំបិតកាត់នំចាក់ចំក្បាលតែមិនមុត។

រហូតដល់ ម៉ោងកើតហេតុខាងលើ ជនសង្ស័យបានយកចបជីកដេញ វាយប្រពន្ធកូន និងវាយទូរទឹកកកសំរាប់ដាក់នំបណ្តាលឲ្យ បែកកញ្ចក់ទាំងពីរផ្ទាំង ។ ក្រោយចាប់ខ្លួន កម្លាំងអាវុធហត្ថ បានដកហូត ចបជីក ០១ កាំបិតកាត់នំ១ និងសម្ភារះខូចខាត រួមមាន ទូរទឹកកកចំនួន០១ សំរាប់ដាក់នំបុ័ង​ (បែកកញ្ចក់២ផ្ទាំង)។

ករណីទី២ បានកើតឡើង នៅល្ងាចថ្ងៃទី១៤ ខែសីហា ស្ថិតនៅចំណុចភូមិព្រែកតាវ៉ា ឃុំទឹកវិល ស្រុកស្អាង ខេត្តកណ្តាល ដែលមានជនសង្សយ័ឈ្មោះ ឡេង ប៊ុនលី ហៅ(ខួច) អាយុ២៧ឆ្នាំ និង ជនរងគ្រោះជាឪពុកឈ្មោះ ហុង ជៀបឡេង អាយុ៦៧ឆ្នាំ មានទីលំនៅភូមិឃុំកើតហេតុខាងលើ។

មុនពេលកើតហេតុនៅវេលាម៉ោង ៧:៥០នាទី ព្រឹកថ្ងៃទី១០ ខែសីហា ឆ្នាំ២០១៥ ជនបង្កជាកូន បានគំរាមទារប្រាក់ពីម្តា ចំនួន៣,០០០ដុល្លារ (បីពាន់ដុល្លា) ពេលនោះម្តាយប្រាប់ថា គ្មានប្រាក់ឲ្យទេ ហើយជនសង្ស័យគំរាមថាបើមិនឲ្យប្រាក់ ចំនួន៣,០០០ដុល្លារទេ នឹងវាយបំផ្លាញសំភារៈ​ ក្នុងផ្ទះអោយខ្ទេច និងមិនអោយឪពុកចូលផ្ទះឡើយ។

ក្រោយការចាប់ខ្លួន កម្លាំងអាវុធហត្ថ បានដកហូត ពូថៅចំនួន១ ដងប្រវែង៣តឹក ហើយសម្ភារៈ ដែលខូចខាតរួមមាន ពាងទឹកចំនួន០១ ទូរទស្សន៏ចំនួន០១ កង្ហារចំនួន០១ និងទូរដាក់ចានចំនួន០១។

បច្ចុប្បន្ន ជនសង្ស័យទាំង២នាក់ ត្រូវបានឃុំខ្លួន នៅទីបញ្ជាការដ្ឋាន អាវុធហត្ថ ខេត្តកណ្តាល ដើម្បីកសាង សំណុំរឿង បញ្ជូនទៅកាន់តុលាការ ចាត់ការតាមនីតិវិធី៕

ផ្តល់សិទ្ធដោយ ដើមអម្ពិល