អាលឺម៉ង់៖ សាកសពកូនស្រីមហាសេដ្ឋី ដែលត្រូវ បានគេចាប់ជំរិត កាលពីសប្ដាហ៍មុន ជាមួយនឹង ការដោះដូរ ទឹកប្រាក់ ១លាន យូរូ ស្មើរនឹង ១.១ លាន ដុល្លារអាមេរិក ត្រូវបាន ប្រទះឃើញ។ 

តាមប្រភពព័ត៌មាន បានឲ្យដឹងថា នាង  Anneli-Marie R អាយុ ១៧ឆ្នាំ ដែលមាន ឪពុកជាអ្នកជំនួញ និង មានទ្រព្យសម្បត្ដិ ដ៏ច្រើន ត្រូវបាន ចាប់ជំរិត កាលពីថ្ងៃព្រហស្បត្ដិ៍ សប្ដាហ៍មុន នៅពេលដែល នាងបណ្ដើរឆ្កែដើរលេង។ ក្រោយពី ការចាប់ខ្លួន នាងបានជាងមួយម៉ោង អ្នកចាប់ជំរិត បានទូរស័ព្ទ មករកឪពុកនាង ជាមួយនឹង ការទាមទារប្រាក់ ១លាន​យូរូ ខណៈដែលមាន លឺសម្លេងនាងស្រែក នៅក្នុងទូរស័ព្ទ ផងដែរនោះ។ យ៉ាងណាមិញ ឪពុកនាង បាននិយាយថា គាត់សុខចិត្ដ ផ្ដល់អ្វីៗគ្រប់យ៉ាង ឲ្យ តែកូនស្រីគាត់ មានសុវត្ថិភាព និងអាចត្រលប់មក ផ្ទះវិញបាន។ ជាមួយគ្នានោះ គាត់ក៏បាន សរសេរសំបុត្រ ជាមួយនឹង ក្ដីសង្ឃឹម ទៅកាន់ អ្នកចាប់ជំរិតនោះទៀតថា អ្នកពិតជាដឹងថា ខ្ញុំអាច ផ្ដល់នូវអ្វីៗគ្រប់យ៉ាង ដែលអ្នកត្រូវការ និងចង់បាន ដើម្បីឲ្យកូនស្រី ខ្ញុំត្រលប់ មកនៅក្នុងដៃខ្ញុំវិញ។ 

ប៉ុន្ដែ ៤ថ្ងៃក្រោយមក សាកសពរបស់នាង ត្រូវបាន ប្រទះឃើញ នៅទីធ្លា ផ្ទះកសិករ ដែលគេបោះបង់ចោល ក្បែរផ្ទះរបស់នាង នៅ ទីក្រុង Meissen ភាគខាងកើត ប្រទេសអាលឺម៉ង់ បន្ទាប់ពី ប៉ូលីសព្យាយាមស្វែងរក ជាមួយនឹង ឆ្កែជំនាញ និងមាន ការជិះឧទ្ធម្ភាគចក្រ ផងនោះ។ ប៉ូលីសបាននិយាយថា៖ អ្នកបួងសួង និងអ្នកដែលមានសង្ឃឹម ថានាង នឹងអាចត្រលប់មកវិញបាន ប្រែក្លាយជាស្រពាប់ស្រពោន គ្មានពាក្យនិយាយ ក្រោយពីប្រទះឃើញ សាកសពនាង។  នាពេលនេះ ឪពុកម្ដាយ ក្មេងស្រីរងគ្រោះ កំពុងតែស្ថិតនៅក្រោមការ មើលថែទាំងពី ប៉ូលីសជំនាញ ខាងចិត្ដសាស្ដ្រ យ៉ាងដិតដល់។

សម្រាប់ពេលនេះ ប៉ូលីសបានឃាត់ខ្លួន​ជនសង្ស័យ២នាក់ ដែលម្នាក់ អាយុ ៣៩ឆ្នាំ គ្មានការងារធ្វើ និងម្នាក់ទៀត អាយុ ៦១ឆ្នាំ ជាកម្មកររោងចក្រ។ តាមការសនិ្នដ្ឋាន របស់ប៉ូលីស បានបញ្ជាក់ឲ្យដឹងថា អ្នកចាប់ជំរិតនាង ប្រហែល ស្លន់ស្លោរ និងសម្លាប់នាងចោល ដោយសារតែ ពួកគេ មិនបាន ពាក់ម៉ាស ពេលចាប់ខ្លួននាង៕

រូបភាពពេលនៅរស់របស់ នាង Anneli-Marie R អាយុ ១៧ឆ្នាំ

ប្រភពពី បរទេស

កែសម្រួលដោយ ម៉ា

ខ្មែរឡូត