ផឹកស៊ីស្រវឹង លួចកាំភ្លើងខ្លី ថៅកែសៀតចង្កេះ ទៅច្រៀងខារ៉ាអូខេ ត្រូវសមត្ថកិច្ចឃាត់ខ្លួន

ផឹកស៊ីស្រវឹង លួចកាំភ្លើងខ្លី ថៅកែសៀតចង្កេះ ទៅច្រៀងខារ៉ាអូខេ ត្រូវសមត្ថកិច្ចឃាត់ខ្លួន

ខេត្តកំពត ៖ បុរស3នាក់ត្រូវបាន កម្លាំងការិយាល័យកណ្តាល នគរបាលព្រហ្មទ័ណ្ឌស្នងការដ្ឋាន ខេត្តសហការជាមួយកម្លាំងនគរបាល ប៉ុស្តិ៍រដ្ឋបាលឃុំព្រៃថ្នង ស្រុកទឹកឈូ ចាប់ឃាត់ខ្លួន ព្រមទាំងដកហូតអាវុធខ្លីម៉ាក K59១ដើម និងគ្រាប់មួយ ចំនួននៅក្នុងបង់ កាលវេលាម៉ោង១២ យប់ថ្ងៃទី១៨ ខែសីហា ឆ្នាំ២០១៥ ។

ជនសង្ស័យទាំង៣នាក់ ដែលសមត្ថកិច្ចឃាត់ខ្លួនមាន១-ឈ្មោះ ទន់ គឹមហេង ភេទប្រុស អាយុ៣៣ឆ្នាំ មុខរបរអ្នកបើកអេស្កាវ៉ាទ័រ(អ្នកកាន់អាវុធ), ២-ឈ្មោះ ប៊ុន សុខយី ភេទប្រុស អាយុ២២ឆ្នាំ មុខរបរកម្មករ និង៣-ឈ្មោះសួង សុខភី ភេទប្រុស អាយុ២១ឆ្នាំមុខរបរកម្មករ ។ ទាំង៣នាក់ស្នាក់នៅ ការដ្ឋានបូមខ្សាច់ ស្ថិតក្នុងភូមិគោចិនលែង ឃុំថ្មី ស្រុកទឹកឈូ ។

ករណីឃាត់ខ្លួនជនសង្ស័យ ទាំង៣នាក់ខាងលើត្រូវបាន លោកឧត្តមសេនីយ៍ត្រី ម៉ៅ ចន្ទ័មៈធុរឹទ្ឋ ស្នងការរង និងជានាយការិយាល័យ កណ្តាលនគរបាលព្រហ្មទណ្ឌ ស្នងការដ្ឋានខេត្តឲ្យដឹងថា កម្លាំងសមត្ថកិច្ចនគរបាលការិយាល័យ កណ្តាលព្រហ្មទ័ណ្ឌខេត្តកំពុង ដុតដៃដុតជើងស៊ើបអង្កេតស្រាវជ្រាវ និងតាមប្រម៉ាញ់ករណីចោរប្លន់ប្រដាប់អាវុធកាលពីយប់ថ្ងៃទី១៦ ខែសីហា ឆ្នាំ២០១៥នេះផង ក៏ស្រាប់តែនៅវេលាម៉ោង១២យប់ថ្ងៃទី១៨ ខែសីហា មានពលរដ្ឋមករាយការណ៍ប្រាប់ថា មានឃើញបុរស៣នាក់ចូល ច្រៀងខារ៉ាអូខេនៅផ្ទះម្ចាស់ឈ្មោះ ចែ រ៉ែន ហើយក្នុងចំណោមបុរសទាំងបីនាក់នោះ គេឃើញបុរសម្នាក់មានសៀត កាំភ្លើងខ្លីនៅចង្កេះ១ដើមផង ។

ក្រោយពីទទួលបានព័ត៌មានរាយការណ៍ ពីពលរដ្ឋភ្លាម លោកក៏បានសុំការ ឯកភាពពីលោក ឯក ឆេងហ៊ួត ព្រះរាជអាជ្ញាសាលាដំបូងខេត្ត ដើម្បីដឹកនាំកម្លាំងចុះទៅពិនិត្យ កន្លែងដែលពលរដ្ឋបានផ្តល់ពត៌មាន ។

លោកបន្តទៀតថា នៅពេលកម្លាំងរបស់លោក រួមនិងកម្លាំងនគរបាលប៉ុស្តិ៍ទៅដល់ បានធ្វើការឆែកឆេរមុខសញ្ញាដែលពលរដ្ឋបានផ្តល់នោះ ។ ក្រោយពីហៅជនទាំង៣នាក់ ចេញមកក្រៅធ្វើការឆែកឆេរ ក៏ប្រទះឃើញមានអាវុធខ្លីមួយដើមដូចពលរដ្ឋ បានរាយការណ៍មែន ពេលនោះកម្លាំងសមត្ថកិច្ច ក៏បានដកហូតអាវុធ ព្រមទាំងឃាត់ខ្លួនអ្នកកាន់អាវុធ និងគូកន២នាក់ទៀត ដែលចូលច្រៀងខារ៉ាអូខេជាមួយគ្នា មកកាន់ស្នងការដ្ឋាននគរបាលខេត្ត ដើម្បីធ្វើការសាកសួរ ។

លោកបានបន្តទៀតថា ក្រោយពីសមត្ថកិច្ចធ្វើការសាកសួរ ជនសង្ស័យទាំង៣នាក់ មានម្នាក់ឈ្មោះ ទន់ គឹមហេង បានសារភាពប្រាប់សមត្ថកិច្ចថា កាំភ្លើងខ្លីដែលខ្លួនបាន យកមកសៀតចង្កេះ ចូលច្រៀងខារ៉ាអូខេនេះ ជាកាំភ្លើងរបស់ឈ្មោះ តិច ជាថៅកែការដ្ឋានខ្សាច់ ដែលគាត់លាក់នៅ លើគ្រែក្រោមពូកដេក ហើយថ្ងៃនោះឈ្មោះ តិច ម្ចាស់កាំភ្លើងមិននៅកន្លែង ទើបខ្លួនផឹកស្រានៅក្បែរ កន្លែងការដ្ឋានស្រវឹងគិតបបួលគ្នា ទៅច្រៀងខារ៉ាអូខេ ក៏ទៅយកកាំភ្លើងដាក់ក្រោម កែបម៉ូតូរួចឌុបគ្នាទៅចូល ច្រៀងខារ៉ាអូខេតែម្តងទៅ ។

ជនសង្ស័យបាន សារភាពប្រាប់សមត្ថកិច្ចទៀតថា ពេលខ្លួនចូលច្រៀងដំបូងខ្លួន មិនទាន់យកអាវុធទៅតាមខ្លួនទេ គឺដាក់ក្នុងកែបម៉ូតូ លុះច្រៀងបានមួយសន្ទុះ ទើបខ្លួនចេញទៅយកកាំភ្លើងពីកែបម៉ូតូ ហើយមកអង្គុយច្រៀងវិញបាន២-៣បទក៏ត្រូវសមត្ថកិច្ច មកឃាត់ខ្លួនតែម្តង។

ក្រោយពីការសាកសួរនៅរសៀលថ្ងៃទី២០ ខែសីហា ឆ្នាំ២០១៥នេះ សមត្ថកិច្ចបានកសាង សំណុំរឿងពីបទប្រើប្រាស់អាវុធខុសច្បាប់ ទៅសាលាដំបូងខេត្តដើម្បី ចាត់ការតាមនីតិវិធី ៕