ចោរឆក់អស់ លក្ខណ៍២នាក់ ត្រូវសមត្ថកិច្ច ក្របួចបាន ខណៈកំពុង ធ្វើសកម្មភាព

ចោរឆក់អស់ លក្ខណ៍២នាក់ ត្រូវសមត្ថកិច្ច ក្របួចបាន ខណៈកំពុង ធ្វើសកម្មភាព

រាជធានីភ្នំពេញ ៖ ជនសង្ស័យឆក់ខ្សែ.ក២នាក់ត្រូវបានសមត្ថកិច្ច នគរបាលព្រហ្មទណ្ឌ កម្រិតស្រាលខណ្ឌ ៧មករាធ្វើការចាប់ខ្លួនភ្លាមៗ ខណៈធ្វើសកម្មភាពឆក់ខ្សែ.កជនបរទេស ដែលកំពុងជិះម៉ូតូកង់បី មិនបានសម្រេចកាលពីវេលាម៉ោង៥ល្ងាច ថ្ងៃទី២១ សីហា ២០១៥ នៅចំណុចមុខផ្ទះលក់ គ្រឿងសង្ហារឹមលេខ៦១៩ កែងផ្លូវលេខ៩៣និងផ្លូវលេខ៣១០ ស្ថិតក្នុងភូមិ៧ សង្កាត់បឹងកេងកងទី១ ខណ្ឌចំការមន រាជធានីភ្នំពេញ ។

សមត្ថកិច្ចបានឱ្យដឹងថា ជនសង្ស័យទាំង២នាក់មាន ១-ឈ្មោះ ចាន់ ផលពិសិដ្ឋ ភេទប្រុស អាយុ១៧ឆ្នាំ មុខរបរមិនពិតប្រាកដ ស្នាក់នៅផ្ទះជួលក្នុង សង្កាត់ចាក់អង្រែលើ ខណ្ឌមានជ័យ ជាអ្នកបើកម៉ូតូធ្វើសកម្មភាព និង២-ឈ្មោះ អាង ស្ទីវម៉ង់ ភេទប្រុស អាយុ១៧ឆ្នាំ មុខរបរមិនពិតប្រាកដ មានទីលំនៅ ផ្ទះលេខ១២៥បេអឺសូន្យ ភូមិ៥ សង្កាត់បឹងសាឡាង ខណ្ឌទួលគោក ជាអ្នកធ្វើសកម្មភាពឆក់ ។

ក្រោយពេលចាប់ខ្លួន សមត្ថកិច្ចដកហូត បានវត្ថុតាងរួមមាន ម៉ូតូម៉ាកយ៉ាម៉ាហា XT ពណ៌ស ពាក់ស្លាកលេខ ភ្នំពេញ 1AT-1615 មួយគ្រឿង, ទូរស័ព្ទដៃម៉ាកណូគា ពណ៌ទឹកប្រាក់១គ្រឿង ដែលមានលេខ ០៨៧ ២៦០ ១៧៩ និងខ្សែ.កលោហៈធាតុ ពណ៌លឿងប្រវែង១,៥តឹក១ខ្សែ ។

សមត្ថកិច្ចបានឱ្យដឹងទៀតថា មុនពេលកើតហេតុ កម្លាំងនគរបាលព្រហ្មទណ្ឌ កម្រិតស្រាលខណ្ឌ៧មករា កំពុងធ្វើការដើរល្បាត ក៏ប្រទះឃើញជនទាំង២នាក់ គួរឱ្យសង្ស័យ ក៏ធ្វើការតាមដាន រហូតដល់ចំណុច កើតហេតុស្រាប់តែជនសង្ស័យទាំង២នាក់ បានធ្វើសកម្មភាពឆក់ខ្សែ.កជនបរទេស ក៏ធ្វើការចាប់ខ្លួនភ្លាមៗតែម្តង ។

ជនសង្ស័យទាំង២នាក់ និងវត្ថុតាងត្រូវបញ្ជូន ទៅកាន់អធិការដ្ឋាននគរបាល ខណ្ឌ៧មករា ដើម្បីកសាងសំណុំរឿងបញ្ជូនទៅតុលាការ ចាត់ការតាមច្បាប់ ។