ព្រះសីហនុ៖ បុរសជនជាតិអូទ្រីសម្នាក់ ត្រូវបានគេប្រទះឃើញ ដេកស្លាប់ក្នុងបន្ទប់ផ្ទះសំណាក់ សុវណ្ណភូមិ ក្បែរឆ្នេរអូឈើទាល ស្ថិតនៅក្រុម ១៥ ភូមិ ៤ សង្កាត់លេខ៤ ក្រុងខេត្តព្រះសីហនុ នៅព្រឹកថ្ងៃទី ០៣ ខែកញ្ញា ឆ្នាំ២០១៥ វេលាម៉ោង ៩និង០០នាទី ។

ប្រភពពីសមត្ថកិច្ចបានឲ្យដឹងថា ជនបរទេសដែលស្លាប់មាន ឈ្មោះ KIRCHNER ANTON ភេទ ប្រុស កើតថ្ងៃទី ២២ ខែកក្កដា ឆ្នាំ១៩៤៩ សញ្ជាតិ អូទ្រីស កាន់លិខិតឆ្លងដែនលេខ P 3863471 សុពលភាព ថ្ងៃទី ១៤ ខែកញ្ញា ឆ្នាំ២០១៩ ។  

ប្រភពបុគ្គលិកផ្ទះសំណាក់ខាងលើ បានឲ្យដឹងថា ជនរងគ្រោះបានចូលមកស្នាក់ផ្ទះសំណាក់ខាងលើ កាលពីថ្ងៃទី ១៧ ខែសីហា ឆ្នាំ២០១៥ នៅបន្ទប់លេខ ២០៤ រហូតមកទល់ម៉ោង ០៩និង០០ព្រឹកថ្ងៃខែខាងលើ ក៏បានស្លាប់ ។

សពបច្ចុប្បន្នត្រូវបាន បញ្ជូនទៅរក្សាទុកនៅ មន្ទីរពេទ្យបង្អែកខេត្តព្រះសីហនុ បន្ទាប់ពីក្រុមនគរបាលបច្ចេកទេស និងវិទ្យាសាស្រ្ត នៃស្នងការដ្ឋាន នគរបាល ខេត្តព្រះសីហនុ និង លោកវេជ្ជបណ្ឌិត សែជូ សិទ្ធិជោតិ អនុប្រធានមន្ទីរសុខាភិបាលខេត្តព្រះសីហនុ ធ្វើការត្រួតពិនិត្យរួចរាល់ ក្រោមការដឹកនាំដោយលោក ព្រះរាជអាជ្ញារង រស់ សារ៉ាំ ។ រីឯមូលហេតុត្រូវបានក្រុមការងារបញ្ជាក់ថា សាកសពស្លាប់ដោយមូលហេតុគាំងបេះដូង ៕

ផ្តល់សិទ្ធដោយ ដើមអម្ពិល