ប្រទះឃើញសព ប្រជាការពារ សង្កាត់ទួលសង្កែម្នាក់ អណ្តែតទឹក សង្ស័យធ្វើអត្តឃាតដោយសារ មានជំងឺប្រចាំកាយ

ប្រទះឃើញសព ប្រជាការពារ សង្កាត់ទួលសង្កែម្នាក់ អណ្តែតទឹក សង្ស័យធ្វើអត្តឃាតដោយសារ មានជំងឺប្រចាំកាយ

រាជធានីភ្នំពេញ ៖ សេចក្តីរាយការណ៍បានឱ្យដឹងថា សពបុរសម្នាក់ដែលគេស្គាល់ថា ជាប្រជាការពារសង្កាត់ទួលសង្កែ ត្រូវប្រជាពលរដ្ឋប្រទះ ឃើញអណ្តែតទឹកទន្លេសាប តាំងពីវេលាម៉ោង៥ និង៣០នាទីព្រឹក ថ្ងៃទី៧ កញ្ញា នេះ នៅចំណុចខាងជើងស្ពានព្រែកព្នៅចម្ងាយប្រមាណ១០០ម៉ែត្រ ស្ថិតក្នុងភូមិព្រែកតារ័ត្ន សង្កាត់ព្រែកតាសេក ខណ្ឌជ្រោយចង្វារ។

សពត្រូវគេស្គាល់ឈ្មោះប្រាក់ វីរៈ អាយុ៣៣ឆ្នាំ មានទីលំនៅភូមិផ្សារតូច សង្កាត់ទួលសង្កែ ខណ្ឌប្ញស្សីកែវ។

បើតាមក្រុមគ្រួសារសពបានឱ្យដឹងថា សពជនរងគ្រោះបាន បាត់ខ្លួនតាំងពីព្រឹកថ្ងៃសៅរ៍ ហើយសង្ស័យលោតទឹកសម្លាប់ខ្លួននៅចំណុចភូមិផ្សារតូច បន្ទាប់ពីពិនិត្យសុខភាព នៅមន្ទីរពេទ្យជោរៃឃើញមាន ជំងឺមហារីកបេះដូង ជំងឺក្រពះ និងសួត ព្រមទាំងឡើងជាតិស្ករទៀតផង។

តាមប្រភពបានឱ្យដឹងថា កាលពីព្រឹកថ្ងៃសុក្រ សពបានទៅពិនិត្យសុខភាពឃើញ មានជំងឺដូចរៀបរាប់ខាងលើនេះហើយ ក៏ត្រឡប់មកផ្ទះវិញ ប្រាប់ក្រុមគ្រួសារ។ លុះនៅព្រឹកថ្ងៃសៅរ៍ មានអ្នករត់ម៉ូតូឌុបបានឃើញសព ចុះទៅមាត់ទន្លេ ហើយក៏បាត់រហូត ក្រោយមកមានការសង្ស័យ ក៏នាំគ្នាដើរទៅមើលឃើញតែមួក និងស្បែកជើងរបស់សព នៅមាត់ច្រាំងទន្លេ។

ប្រភពបន្តថា នៅព្រឹកថ្ងៃទី៧ កញ្ញានេះ ក្រុមគ្រួសារសពបាននាំគ្នាដើររក សពស្រាប់តែទទួលព័ត៌មានថា មានគេប្រទះឃើញសព អណ្តែតទឹកទើបនាំគ្នា ទៅមើលឃើញថា ពិតជាសពជនរងគ្រោះមែន ក៏ចាត់ចែងឱ្យគេស្រង់ឡើងគោក ហើយបញ្ជូនទៅធ្វើបុណ្យ នៅវត្តទួលសង្កែតែម្តង៕