ជ្រូកត្រចៀកខៀវ ២០ក្បាលត្រូវ បានស្លាប់ បាញ់ថ្នាំ សម្លាប់មេរោគ កប់ចោល

ជ្រូកត្រចៀកខៀវ ២០ក្បាលត្រូវ បានស្លាប់ បាញ់ថ្នាំ សម្លាប់មេរោគ កប់ចោល

ខេត្តបន្ទាយមានជ័យ ៖ មន្ត្រីបសុព្យាបាលខេត្តបន្ទាយមានជ័យ បានឃាត់រថយន្ត១គ្រឿងដឹកជ្រូក ចំនួន២០ក្បាលសុទ្ធតែជាជ្រូកមានជម្ងឺត្រចៀកខៀវ ត្រូវបានយកទៅសម្លាប់ និងបាញ់ថ្នាំសម្លាប់មេរោគ កប់ចោលកាលពីល្ងាចថ្ងៃទី១៧ កញ្ញា ២០១៥ នៅក្នុងបរិវេណមន្ទីរកសិកម្ម ខេត្តបន្ទាយមានជ័យ ។

លោក ប៉ាង វណ្ណាសេដ្ឋ ប្រធានមន្ទីរកសិកម្មខេត្តបន្ទាយមានជ័យ បានប្រាប់ថា បន្ទាប់ពីផ្ទុះជំងឺជ្រូកត្រចៀកខៀវនៅខេត្តសៀមរាប លោក គោស៊ុំ សារឿត អភិបាលខេត្តបន្ទាយមានជ័យ ណែនាំឱ្យលោក ហ៊ុយ ទូច ប្រធានការិយាល័យផលិតកម្ម និងបសុព្យាបាលខេត្តបន្ទាយមានជ័យ ចុះធ្វើការទប់ស្កាត់នៅព្រំប្រទល់ ខេត្តសៀមរាប និងខេត្តមន្ទាយមានជ័យ ។

លោកបានបញ្ជាក់ថា ក្រោយពេលដែលចុះទប់ស្កាត់ នៅវេលាម៉ោង៨យប់ ថ្ងៃទី១២ កញ្ញា២០១៥ មន្ត្រីជំនាញបានឃាត់រថយន្ត១គ្រឿងម៉ាក CANTER ពាក់ស្លាកលេខ 3A-0663 ដែលដឹកជ្រូកចំនួន ២០ក្បាល ម្ចាស់ឈ្មោះ សៅ សុខភ័ក្រ ភេទប្រុស ដែលស៊ីឈ្នួលដឹកជ្រូកឱ្យឈ្មោះ ឡាយ ជាថៅជ្រូកនៅខេត្តបាត់ដំបង ។

លោក ប៉ាង វណ្ណាសេដ្ឋ បានបន្តថា ក្រោយពេលដែលឃាត់រថយន្ត ដឹកជ្រូកដែលសង្ស័យមានជម្ងឺ ជ្រូកត្រចៀកខៀវបាននាំយកមកមន្ទីរកសិកម្មខេត្ត ដើម្បីបូមឈាមទៅពិនិត្យ នៅនាយកដ្ឋានផលិតកម្ម និងបសុព្យាបាល នៃក្រសួងកសិកម្ម ។ ក្រោយពេលពិនិត្យនៅថ្ងៃទី១៥ កញ្ញា ២០១៥ បានចេញលទ្ធផល គឺជ្រូក២០ក្បាលនេះមានជម្ងឺជ្រូកត្រចៀកខៀវ ។ ហើយម្ចាស់បាន សហការជាមួយមន្ត្រីជំនាញ ដើម្បីកំទេចចោលដោយសម្លាប់ និងបាញ់ថ្នាំសម្លាប់មេរោគទើប កប់ចោលនៅល្ងាចថ្ងៃទី១៧ កញ្ញា ២០១៥ នៅក្នុងបរិវេណមន្ទីរកសិកម្ម ខេត្តបន្ទាយមានជ័យ ។

លោកបានបញ្ជាក់ថា នៅខេត្តបន្ទាយមានជ័យ គឺរហូតថ្ងៃនេះមិនមានរកឃើញ មានជម្ងឺជ្រូកត្រចៀកខៀវកើតមាននៅឡើយទេ ហើយមន្ត្រីជំនាញកំពុងមាន វិធានការទប់ស្កាត់ជ្រូកដែលនាំចូលពី ប្រទេសជិតខាងមិនឱ្យកើតមាននៅក្នុងខេត្តបន្ទាយមានជ័យឡើយ ៕